VAAI atu nei i le mea ua tupu! O Mose lena ma lana laau ua faaloaloa atu i luga o le Sami Ulaula. O i latou ua sao i le isi itu o tagata Isaraelu. Ae ua malelemo nei Farao ma lana autau i le sami. Sei o tatou vaai pe na faapefea ona tupu.

E pei ona tatou aʻoaʻoina, sa faatagaina Isaraelu e tuua Aikupito ina ua uma le mala lona 10. Pe tusa e 600,000 tamaloloa Isaraelu na ō, faatasi ma fafine ma tamaiti. Faapena foi ma se vaega tele o isi tagata, o e na talitonu i a Ieova, na latou o ma Isaraelu. Sa latou aveina uma a latou ‘oti ma mamoe ma povi ma i latou.

A o lei o i latou, sa fesili atu tagata Isaraelu i Aikupito mo ni lavalava ma isi mea e fai i auro ma ario. Sa fefefe tele tagata Aikupito, talu ai lena mala mulimuli i luga i a i latou. O lea sa latou ave ai i a Isaraelu mea na latou mananao ai.

Ina ua mavae ni nai aso ona oo atu lea o Isaraelu i le Sami Ulaula. O i ina sa latou malolo ai. I le taimi lava lena, ua amata ai ona faanoanoa Farao ma ona tagata ina ua latou tuuina atu Isaraelu e ō.

Ona toe suia faanatinati lea le manatu o Farao. Sa ia saunia loa ana kariota o le taua ma lana autau. Ona ia amata loa lea ona tuliloa tagata Isaraelu i ana kariota faapitoa e 600, faapena ai foi ma isi kariota uma a Aikupito.

Ina ua vaai atu Isaraelu ua ō mai Farao ma lana autau, sa fefefe tele i latou. Ua leai nei se mea e sosola i ai. O le Sami Ulaula i le tasi itu a o Aikupito i le isi itu. Ae sa tuu e Ieova se ao i le va o ona tagata ma Aikupito. O lea sa le mafai ai ona iloa e Aikupito Isaraelu ma osofai i a te i latou.

Ona fai atu lea o Ieova i a Mose e faaloaloa atu lana laau i le Sami Ulaula. Ina ua ia faia, sa faaagi ai loa e Ieova se matagi malosi mai sasae. O suāsami sa vaeluaina, ma sa taofia uma i itu e lua.

Ona amata loa lea ona savavali atu Isaraelu i le eleele matutu. Sa tele ni itula na faaaluina mo miliona o tagata ma a latou manu ia faasaoina mai le sami e oo atu i le isi itu. Mulimuli ane ona toe iloa atu ai lea e Aikupito ia Isaraelu. Ua sosola a latou pologa! Ona latou faavave atu ai lea i a i latou i le sami.

Ina ua latou faia, sa faapauu ese e le Atua uili o a latou kariota. Ua fefefe tele Aikupito ma ua amata loa ona latou alalaga: ‘O loo tau Ieova mo Isaraelu. Sei o tatou sosola ia mai i inei!’ Peitai ua fai si tuai.

O le taimi tonu lava lena na fai atu ai Ieova i a Mose ia faaloaloa atu lana laau i luga o le sami e pei ona e vaai atu i ai i le ata. Sa toe foi mai loa le faufaupuega vai i luga o Aikupito ma a latou kariota. O le vaega au uma sa mulimuli atu i a Isaraelu agai i le sami. Ma e lei i ai lava se tagata Aikupito e tasi na ola!

Sa fiafia uma tagata o le Atua ina ua faasaoina i latou! Ma sa latou usuina se pese faafetai i a Ieova e faapea: ‘Ua malo Ieova i se manumalo mamalu. Ua ia lafoaiina solofanua ma e o tietie ai i le sami.’ Sa ave e Miriama le tuafafine o Mose lana topa ma sa mulimuli uma i ai fafine ma a latou topa. Ma a o sisiva i latou ma le fiafia, sa latou usuina lava le pese e tasi lea sa usuina e tamaloloa: ‘Ua malo Ieova i se manumalo mamalu. Ua ia lafoaiina solofanua ma e o tietie ai le sami.’