Pe a tatou iai faatasi ma o tatou uso tapuaʻi, e pei o tatou faalogona o le tupu o Tavita lea na faapea mai: “Maʻeu le lelei ma le matagofie o le nonofo faatasi o uso i le autasi!” (Salamo 133:1) E lē otometi ona maua lo tatou autasi. E tatau ona tatou saosaolaumea uma i le faatumauina o lenā autasi.

1. O le ā se mea mataʻina e faatatau i tagata o le Atua?

Pe a e auai i se sauniga i se isi atunuu, atonu o le a e lē malamalama i le gagana. Peitaʻi, o le a e lagona e pei lava o loo e iai i la oe lava faapotopotoga. Aiseā? Talu ai e tutusa uma lomiga o loo tatou faaaogāina e suʻesuʻe ai le Tusi Paia, e tusa lava po o fea e tatou te iai. E tatou te taumafai malosi foʻi e faaalia le alofa o le tasi i le isi. Po o fea lava foʻi e tatou te nonofo ai, e tatou te “valaau uma lava i le suafa o Ieova, ma tapuaʻi ai ma le autasi.”​—Sefanaia 3:9, faamatalaga pito i lalo.

2. O le ā e mafai ona e faia ina ia faatupu ai le autasi?

“Ia matuā alofa le tasi i le isi mai i le loto.” (1 Peteru 1:22) E faapefea ona e faatatauina lenei fautuaga? Ia uaʻi atu i uiga lelei o isi, nai lo o le uaʻi atu i o latou vaivaiga. Ia taumafai e faifaimea faatasi ma uso ma tuafafine e eseese uma talaaga, nai lo o le tausisi na o i latou e tutusa mea e tatou te fiafia i ai. E mafai foʻi ona tatou taumafai malosi e liaʻiese ni uiga faailoga tagata atonu o loo iā i tatou.​—Faitau 1 Peteru 2:17. a

3. O le ā e te faia pe a lua feeseeseaʻi ma se isi Kerisiano?

E tatou te autasi, ae e tatou te lē lelei atoatoa foʻi. O nisi taimi e tatou te faia ai se mea e ono lē fiafia pe faatigā ai i se isi. Ua faailoa mai e le Afioga a le Atua iā i tatou ʻia faaauau ona fefaamagaloaʻi,’ ma faapea atili mai: “E pei ona finagalo malie Ieova e faamagalo iā te outou, ia faapea foʻi ona outou faia.” (Faitau le Kolose 3:13.) E tele taimi e tatou te faatigā ai iā Ieova, ae e na te faamagaloina lava i tatou. E na te faatalitalia foʻi la i tatou, ia faamagalo atu i o tatou uso. Pe a e iloa ua e faatigā i se tasi, ia e tausolomua e faaleleia le faafitauli.​—Faitau le Mataio 5:23, 24. b

 SAʻILIʻILI ATILI

4. ʻAlofia le faailoga tagata

E tatou te mananaʻo e alolofa i o tatou uso uma lava. Ae e ono faigatā ona tatou taliaina se tasi e eseese o tatou tulaga ma talaaga. O le ā e mafai ona fesoasoani iā i tatou? Faitau le Galuega 10:34, 35, ona talanoa lea i fesili nei:

• E talia e Ieova so o se ituaiga tagata e avea ma ana Molimau. E faapefea ona e faaaʻoaʻo iā te ia i le auala e te vaai ai i isi e eseese o outou tulaga ma talaaga?

• O ā ni faiga faailoga tagata o loo taatele i lou vaipanoa e te manaʻo e ʻalofia?

Faitau le 2 Korinito 6:11-13, ona talanoa lea i le fesili lenei:

• O le ā sou manatu, e faapefea ona e māfana atu i uso ma tuafāfine e ese o latou ituaiga?

5. Ia fefaamagaloaʻi ma le lotoatoa ma tausia le filemu

E faamagaloina atoatoa i tatou e Ieova, e ui e lē manaʻomia ona tatou faamagalo atu iā te ia. Faitau le Salamo 86:5, ona talanoa lea i fesili nei:

• O le ā le tele e faamagalo atu ai Ieova?

• Aiseā e te talisapaia ai le faamagaloga a Ieova?

• O ā ni tulaga e faafaigatā ai ona tatou tausia le filemu i le vā ma isi?

E faapefea ona tatou faaaʻoaʻo iā Ieova ma faatumauina le autasi ma o tatou uso ma tuafāfine? Faitau le Faataoto 19:11, ona talanoa lea i le fesili lenei:

• Pe a faatigā atu se tasi iā te oe, o le ā e mafai ona e faia e foʻia ai le faafitauli?

 O nisi taimi e tatou te faatigā ai i isi. Pe a tupu lenā mea, o le ā e tatau ona tatou faia? Faaali le VITIŌ, ona talanoa lea i le fesili o loo mulimuli mai.

• I le vitiō, o le ā na faia e le tuafafine ina ia tausia ai le filemu?

 AOTELEGA

E mafai ona e fesoasoani e faatumauina le autasi i le faapotopotoga, e ala i le faamagalo atu ma faaalia le alofa i ou uso ma tuafāfine uma.

Fesili Autalu

• E faapefea ona e ʻalofia le faailoga tagata?

• O le ā e te faia pe a lua feeseeseaʻi ma se isi Kerisiano?

• Aiseā e te manaʻo ai e faaaʻoaʻo i le faaaʻoaʻoga a Ieova o le faamagalo atu i isi?