LESONA 05
O le Tusi Paia o le Feʻau Mai i le Atua mo i Tatou
Na foaʻi mai e Ieova iā i tatou le Tusi Paia. O se meaalofa tautele, ma o le tuufaatasiga o tusi e 66. Ae atonu e te taumānatu: ʻNa faapefea ona iai le Tusi Paia? O ai le tusitala?’ Ina ia maua tali o na fesili, seʻi iloilo pe na faapefea ona tatou maua le Tusi Paia.
1. Pe afai o tane na tusia le Tusi Paia, aiseā e faapea atu ai o le Atua le Tusitala?
E tusa ma le 40 tane na tusia le Tusi Paia, i se vaitaimi e silia ma le 1,600 tausaga, e amata mai i le 1513 T.L.M. e oo i le pe tusa o le 98 T.A. E ui e eseese uma talaaga o tane na tusia, ae e lē feteenaʻi manatu na latou tusia i le Tusi Paia. Aiseā na lē feteenaʻi ai? Ona o le Atua o le Tusitala o le Tusi Paia. (Faitau le 1 Tesalonia 2:13.) E leʻi tusia e nei tane ni o latou lava manatu. Peitaʻi na latou tautatala “i mea na faailoa mai e le Atua e ala i le taʻitaʻiga a le agaga paia.” a (2 Peteru 1:21) Na faaaogā e le Atua lona agaga paia, e faagaeeina pe uunaʻia nei tane e tusia ona manatu.—2 Timoteo 3:16.
2. O ai e mafai ona maua aogā mai i le Tusi Paia?
E maua e ʻatunuu uma, ma ituaiga uma, ma gagana uma, ma tagata uma’ aogā mai i le tala lelei o loo i le Tusi Paia. (Faitau le Faaaliga 14:6.) Na faamautinoa e le Atua o le a sili atu ona tele gagana e lomia ai le Tusi Paia, nai lo o se isi lava tusi i aso nei. E toetoe o tagata uma ua iai Tusi Paia, e tusa lava po o fea e nonofo ai ma po o le ā foʻi le gagana e tautatala ai.
3. Na faapefea ona faasaoina e Ieova le Tusi Paia?
Na tusia uluaʻi kopi o le Tusi Paia i paʻu o laau ma paʻu o manu, o ni mea e vave ona leaga. Ae na toe tusia ma le faaeteete e tane e naunau i le Tusi Paia nisi kopi. E ui na taumafai nisi o tagata maualuluga e tafiesea le Tusi Paia, ae na lotomalilie nisi e lamatia o latou ola ina ia puipuia ai. E leʻi faatagaina e Ieova so o se tasi po o so o se mea, e taofia ai tagata mai le mauaina o le Tusi Paia. Ua taʻua i le Isaia 40:8: “O le afioga a lo tatou Atua e tumau lea e faavavau.”
SAʻILIʻILI ATILI
Iloilo le auala na faagaeeina ai e le Atua tane na tusia le Tusi Paia, le auala na ia faasaoina ai, ma le auala na ia faamautinoa ai e maua e tagata uma.
4. Ua faailoa mai i le Tusi Paia lona Tusitala
Faaali le VITIŌ, ona faitau lea o le 2 Timoteo 3:16, ma talanoa i fesili nei:
-
Pe afai o tane na tusia le Tusi Paia, aiseā e taʻua ai o le Afioga a le Atua?
-
Pe e te talitonu e mafai e le Atua ona faailoa mai ona manatu i tane na tusia le Tusi Paia?
E tusia e se failautusi se tusi, ae o manatu o loo ia tusia e mai i lē e ana le tusi. I se tulaga talitutusa, na tusia e tagata le Tusi Paia, ae o le feʻau o loo iai e mai i le Atua
5. Na faasaoina le Tusi Paia mai i taumafaiga e tafiesea
E tatou te faatalitalia e faasaoina e le Atua le Tusi Paia, auā o se tusi mai iā te ia. I le talafaasolopito, na taumafai tagata maualuluga e tafiesea le Tusi Paia. E leʻi mananaʻo foʻi taʻitaʻi lotu e faitau i ai tagata. Ae e ui i teteega ma le faamataʻu mai o le oti, e toʻatele tagata na lamatia o latou ola ina ia faasaoina ai le Tusi Paia. Ina ia aʻoaʻo atili e faatatau i se tasi o i latou, faaali le VITIŌ, ona talanoa lea i fesili nei:
-
Pe e uunaʻia oe e faitau le Tusi Paia, i le iloaina o le auala na faasaoina ai? Aiseā?
Faitau le Salamo 119:97, ona talanoa lea i le fesili lenei:
-
O le ā na uunaʻia ai le toʻatele o tagata e faaliliu ma tufatufa atu le Tusi Paia, e ui na lamatia ai o latou ola?
6. O se tusi mo tagata uma
O le Tusi Paia, o se tusi ua sili atu ona tele gagana ua faaliliu ma tufatufa atu ai i le talafaasolopito. Faitau le Galuega 10:34, 35, ona talanoa lea i fesili nei:
-
Aiseā e finagalo ai le Atua e faaliliu ma tufatufa atu lana Afioga i le tele o gagana?
-
O le ā se mea e te fiafia ai i le Tusi Paia?
Toetoe
100%
o le faitau aofaʻi o tagata i le lalolagi
ua maua le Tusi Paia i gagana e latou te malamalama ai
Ua maua i le silia ma le
3,000
gagana
le Tusi Paia atoa po o se vaega
5,000,000,000
Le fua faatatau o kopi na lomiaina,
ma ua sili mamao atu i lo o se isi lava tusi
UA FAAPEA MAI NISI: “O le Tusi Paia o se tusi ua leva, ma na tusia e tagata.”
-
O le ā sou manatu?
-
O le ā se faamaoniga e iloa ai o le Tusi Paia o le Afioga a le Atua?
AOTELEGA
O le Tusi Paia o le Afioga a le Atua, ma ua ia faamautinoa e maua e tagata uma.
Fesili Autalu
-
O le ā le uiga o le faagaeeina e le Atua o tane e tusia le Tusi Paia?
-
O le ā se mea e mataʻina ai le faasaoina, faaliliuina ma le tufatufaina o le Tusi Paia?
-
O ā ni ou lagona i le iloaina, na faia e le Atua taumafaiga uma ina ia fesootaʻi mai ai iā te oe?
MANATU FAAOPOOPO
Faitau i le talafaasolopito o le Tusi Paia, mai i uluaʻi tusitusiga seʻia oo mai i faaliliuga i aso nei.
“Le Auala na Faasaoina ai le Tusi Paia Seʻia Oo Mai i Aso Nei” (Ala Mai!, Aperila-Iuni 2008)
Le auala na faasaoina ai le Tusi Paia mai i ni lamatiaga se tolu.
Le auala na lamatia ai ola o tagata na faaliliuina le Tusi Paia.
Ua kopi ma faaliliuina le Tusi Paia i le tele o taimi. E faapefea ona e mautinoa e lē o suia le feʻau a le Atua?
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
