A o faagasolo le vaitaimi na leai ai se timu, na faapea atu Ieova iā Elia: ʻIa e alu i Sarefata. O i inā o loo iai se fafine ua oti lana tane, ma o le a ia saunia se meaʻai mo oe.’ I faitotoʻa o le aai, na iloa atu ai e Elia se fafine mativa ua oti lana tane o loo fai fafie. Na talosaga atu Elia i lenei fafine mo se ipu vai. A o alu le fafine e aumai se ipu vai, na valaau atu Elia: ʻFaamolemole aumai ma sina fasi falaoa mo aʻu.’ Ae na tali mai le fafine: ʻE lē o iai saʻu falaoa e avatu ma oe. Ae e na o sina falaoamata lava ma sina suāuu o loo iai, e fai ai sina meaʻai mo i maʻua ma laʻu tama.’ Na faapea atu Elia iā te ia: ʻNa folafola mai e Ieova, pe afai e te saunia se falaoa mo aʻu, e lē uma le falaoamata ma le suāuu seʻia oo i le aso e toe timu ai.’

Ona alu lea o le fafine ma saunia le falaoa mo le perofeta a Ieova. E pei lava ona folafola mai e Ieova, na maua pea e le fafine ma lana tama meaʻai e aai ai i le taimi na leai ai se timu. Na iai pea le falaoamata ma le suāuu i fagu.

 Peitaʻi, e iai se mea faanoanoa na tupu. Na matuā maʻi tigāina le tama a le fafine ma iʻu ai lava ina maliu o ia. Ona talosaga atu lea o le fafine iā Elia mo se fesoasoani. Na ave e Elia le tamaitiiti i le potu pito i luga o le fale, ua faataoto o ia i luga o le moega ma tatalo: ʻIeova e, faamolemole ia e toe faafoʻisia mai le ola o lenei tamaitiiti.’ Pe e te iloa le māfuaaga e ofoofogia tele ai le faia e Ieova o lenei mea? Talu ai pe a fua i mea ua tatou aʻoaʻoina, e leai se tasi muamua na toetū mai i le oti. Ae o lenei foʻi fafine ma lana tama e lē o ni tagata Isaraelu.

Na toe faafoʻisia le ola o lenei tamaitiiti ma ua amata ona mānava o ia. Na faapea atu Elia i le fafine: ʻFaauta! Ua ola lau tama.’ Na matuā fiafia o ia ma faapea atu iā Elia: ʻE moni lava o oe o le tagata o le Atua. Ou te iloa lenei mea, talu ai ua e faailoa mai e na o mea lava ua faatonuina ai oe e Ieova ma e taunuu lava.’