E iai se tagata Isaraelu e igoa iā Elekana, ma e toʻalua ana avā o Hana ma Penina. Peitaʻi, e sili atu lona alofa iā Hana. Na taufaalili Penina iā Hana i taimi uma, talu ai e leai se fanau a Hana ae e toʻatele le fanau a Penina. I tausaga taʻitasi, e ō ai Elekana ma lona aiga e tapuaʻi i le faleʻie paia i Sailo. I se tasi taimi a o latou iai i inā, na vaaia ai e Elekana le matuā faanoanoa o si ana avā pele o Hana. Na fai atu o ia: ʻFaamolemole Hana aua e te tagi. O lea ou te ii e faamāfanafana iā te oe. Ou te alofa iā te oe.’

Mulimuli ane, ona alu ai lea o Hana e tatalo na o ia. Sa tagi pea o ia a o talosaga atu iā Ieova e fesoasoani mai. Na ia folafola atu iā Ieova: ʻIeova, afai e te aumai mo aʻu se tama tama, o le a ou tuuina atu o ia iā te oe, ma o le a ia auauna iā te oe i lona olaga atoa.’

Na iloa atu e le Ositaulaga Sili o Eli le tagi masūsū o Hana, ma manatu ai ua onā o ia. Na faapea atu Hana: ʻLoʻu alii e, ou te lē o onā. E iai soʻu faafitauli faigatā ma o loo oʻu tatalo atu iā Ieova e faatatau i lea faafitauli.’ Ina ua iloa e Eli e sesē o ia, ona ia fai atu lea iā Hana: ʻTau ina ia foaʻi atu e le Atua le mea o loo e talosaga atu ai.’ Na toe lelei faalogona o Hana ma alu o ia i lona ala. E leʻi atoa se tausaga ae ia fanauina se tama tama ma faaigoa iā Samuelu. Seʻi mafaufau i le matuā fiafia o Hana i lenā mea!

 E leʻi galo iā Hana lana folafolaga iā Ieova. O le taimi lava na teʻa ai Samuelu mai i le susu, na ave ai loa o ia e Hana i le faleʻie paia. Na ia faapea atu iā Eli: ʻO le tama lenei na ou tatalo atu ai iā Ieova. Ua ou tuuina atu o ia iā Ieova i aso uma o lona ola.’ I tausaga taʻitasi e asiasi atu ai Elekana ma Hana iā Samuelu, ma avatu se ofu fou lima pupuu mo ia. Na foaʻi atu e Ieova iā Hana isi tama tama e toʻatolu ma fanau teine e toʻalua.