Pe tusa ma le lua masina talu ona ō ese tagata Isaraelu mai i Aikupito, ae latou taunuu i le mauga o Sinai ma faatutū ai i inā o latou faleʻie. Na valaauina e Ieova Mose e alu aʻe i luga o le mauga, ma faapea atu iā te ia: ʻNa ou faasaoina tagata Isaraelu. Pe afai e latou te usiusitaʻi iā te aʻu ma tausia aʻu tulafono, o le a avea i latou ma oʻu nuu faapitoa.’ Na toe alu ifo Mose mai i le mauga ma faamatala atu i tagata Isaraelu le mea sa faailoa mai e Ieova iā te ia. O le ā la latou tali atu? Na latou faapea atu: ʻE matou te faia mea uma lava e fai mai ai Ieova.’

Na toe alu Mose i luga o le mauga, ma o i inā na faapea mai ai Ieova: ʻE toe tolu aso ona ou avatu lea o se faatonuga iā te oe. Ia lapataʻi tagata e aua neʻi o latou taumafai e ō mai i luga o le mauga o Sinai.’ Na alu ifo Mose mai i le mauga ma fai atu i tagata Isaraelu, ina ia nofosauni mo le taimi e fetalai mai ai Ieova.

I le aso lona tolu, na vaaia ai e tagata Isaraelu le emo o uila ma se ao uliuli i luga o le mauga. Na latou faalogoina foʻi le pāpā leotetele o faititili ma le leo o se pū. Ona alu ifo ai lea o Ieova i luga o le mauga i le afi. O le fefefe tele o tagata Isaraelu na latou gatete ai. Na ufitia le mauga atoa i le asu ma na matuā lūlūina foʻi. Na faasolosolo lava ina matuā leotele le leo o le pū. Ona faapea mai lea o le Atua i tagata Isaraelu: ʻO aʻu o Ieova. E lē tatau ona outou tapuaʻi i nisi atua e ese mai iā te aʻu.’

Na toe alu Mose i luga o le mauga. O i inā na avatu ai e Ieova iā Mose, tulafono mo tagata i le auala e tatau ona latou tapuaʻi atu ai iā te Ia, faapea a latou amioga e tatau ona iai. Na tusi i lalo e Mose na tulafono, ona faitau atu lea i tagata Isaraelu. Na folafola atu e tagata Isaraelu: ʻE matou te faia mea uma lava e fai mai ai Ieova.’ Na latou faia se folafolaga i le Atua. Ae po o le a latou tausia lenā folafolaga?