A o faagasolo le faiva a Iesu, sa ia faamatilatila atu ai le tāua o le lotomaulalo. (Luka 14:8-11) E naunau o ia e saʻilia tane ma fafine o ē e mananaʻo e auauna i le Atua ma le lotomaulalo. E oo ane i le taimi lea, o loo iai pea nisi o i latou e lauiloa i le faia o agasala matuiā.

E mātau e le ʻau Faresaio ma le ʻautusiupu, le tosina atu iā Iesu ma lana feʻau o tagata e latou te manatu i ai e lē aogā. Ua latou faitio e faapea: “Ua talia e lenei tagata o ē e agasala, ma aai faatasi ma i latou.” (Luka 15:2) E manatu le ʻau Faresaio ma le ʻautusiupu e sili atu i latou i lo o tagata lautele, ma e latou te feutagaʻi ma na tagata e pei o le eleele e soli i o latou vae. Ua faaalia lo latou ʻinoʻino i tagata lautele, e ala i le taʻua o i latou o ‛am ha·’aʹrets o se upu Eperu e uiga atu i “tagata o le nuu [laueleele].”

Peitaʻi, e lē faapena le auala e feutagaʻi ai Iesu ma tagata. E na te faamamaluina, ma faaalia le agalelei ma le tigā alofa iā i latou. O lea, e naunau le toʻatele o ē e faatauvaa, lea e aofia ai ma i latou ua lauiloa i le faia o agasala e faalogologo atu iā Iesu. O ā la ni faalogona o Iesu e faatatau i faitioga i lona fesoasoani i ē e faatauvaa, ma o le ā le auala ua ia tali atu ai?

E maua le tali i se talafaatusa faagaeeloto, lea e talitutusa ma le talafaatusa sa ia faamatalaina i Kapanaumi. (Mataio 18:12-14) Ua faamatala e Iesu lenei talafaatusa i se auala ua pei ai le ʻau Faresaio o tagata amiotonu, ma o loo saogalemu i totonu o le lafu a le Atua. Peitaʻi, ua pei tagata faatauvaa o ni ē ua taasē ma lē mautonu i le mea e fai. Ua fetalai atu Iesu:

“Afai e iai se tasi o outou e iai ni mamoe se selau a ua leiloa le tasi, pe e lē tuua ea e ia le iva sefulu iva i le toafa, ae alu atu e saʻili mai le mamoe ua sē seʻia maua o ia? Pe a maua lea mamoe, ona ia faafuata lea i ona tauau ma le olioli. Pe a oo o ia i le fale, ona ia valaaulia lea o ana uō, ma ona tuaoi, ma faapea atu, ʻInā tatou olioli ia faatasi ma aʻu, auā ua ou maua laʻu mamoe na leiloa.’”—Luka 15:4-6.

O le ā le faatatauga o lenei manatu? Ua faapea atu Iesu: “O lea, ou te fai atu iā te outou, e sili atu ona olioli le lagi ona o le tagata agasala e toʻatasi ua salamō, nai lo o tagata amiotonu e toʻaiva sefulu iva e lē tatau i ai le salamō.”—Luka 15:7.

E mautinoa le faateʻia o le ʻau Faresaio i le fetalaiga a Iesu e faatatau i le salamō. E latou te manatu iā i latou lava o ni tagata amiotonu, ma e lē manaʻomia ona latou salamō. Ina ua faitioina e nisi o i latou Iesu i nai tausaga ua mavae ona o le aai faatasi ma le ʻauaolafoga ma ē agasala, na fetalai atu o ia: “Ua ou sau e valaau i ē agasala ae lē o ē e amiotonu.” (Mareko 2:15-17) E lē o iloa e nei Faresaio faafiaamiotonu e manaʻomia ona latou salamō. O lea, e lē o maua ai se olioli i le lagi. Peitaʻi, e olioli le lagi pe a salamō moni tagata agasala.

Ina ia toe faamamafa le manatu e olioli le lagi pe a salamō se tagata agasala ua taasē, ua faamatala e Iesu se isi talafaatusa i se gaoioiga masani e faia i le fale: “E faapea foʻi se fafine e iai ni tupe siliva e sefulu, afai e leiloa se tupe e tasi, pe e lē tutu ea e ia le molī, ma salu lona fale, ma suʻe māeʻaeʻa seʻia maua e ia? Pe a ia maua le tupe, ona ia faapotopoto mai lea o ana uō fafine, ma tuaoi, ma faapea atu, ʻInā tatou olioli ia faatasi ma aʻu, auā ua ou maua le tupe na leiloa.’”—Luka 15:8, 9.

E talitutusa le faatatauga e Iesu o lenei talafaatusa ma le talafaatusa e faatatau i le mamoe na leiloa. Ua fetalai atu o ia: “O lea, ou te fai atu ai iā te outou, e olioli agelu a le Atua pe a salamō se tagata agasala e toʻatasi.”—Luka 15:10.

Seʻi mafaufau i lenā mea. E naunau moni agelu a le Atua i le salamō o se tagata agasala. E mataʻina lenei tulaga, auā pe a salamō se tagata agasala ma ia maua se avanoa i le Malo o le Atua i le lagi, o le a ia maua se tulaga e sili atu ona maualuga nai lo o agelu. (1 Korinito 6:2, 3) Peitaʻi, e lē o faaalia e agelu ni uiga matauʻa ona o lenā tulaga. O ā la ni o tatou faalogona e tatau ona iai, pe a faaalia e se tagata agasala le salamō moni i le Atua?