Ua faatoʻā māeʻa ona tali atu Iesu i le ʻaufaitaulaga sili ma le ʻautoeaina, o ē na luʻia o ia po o le pule a ai ua ia faia ai mea uma. Ua lē magagana i latou i le tali ua avatu e Iesu. O lea, ua faamatala atu nei e Iesu se talafaatusa e faaalialia ai i lumāmea ituaiga o tagata e iai moni i latou.

“E iai se tamāloa e toʻalua ona atalii. Na alu atu o ia i le atalii muamua ma fai atu iā te ia, ʻLoʻu atalii e, alu e galue i le togāvine i le asō.’ Ona tali mai lea o le atalii, ʻOu te lē alu.’ Mulimuli ane, na salamō o ia ma alu. Ona ia alu atu lea i le atalii lona lua ma fai atu foʻi faapena. A ua tali mai o ia, ʻUa lelei tamā, o le a ou alu,’ ae e leʻi alu. O ai o atalii e toʻalua na faia le mea na loto i ai lo la tamā?” (Mataio 21:28-31, Faaliliuga a le Lalolagi Fou ua toe teuteuina i le faa-Peretania o le 2013) E manino le tali, o lē na faia le mea na loto i ai lona tamā, o le atalii muamua.

O lea ua fetalai ane ai Iesu i ē e tetee atu iā te ia: “E moni ou te fai atu iā te outou, e muamua atu le ʻauaolafoga ma fafine talitane iā te outou i le malo o le Atua.” E leʻi auauna i le taimi muamua le ʻauaolafoga ma fafine talitane i le Atua. Ae e pei o le atalii muamua, o lea ua latou salamō ma auauna nei i le Atua. E ese mai ai taʻitaʻi lotu, o ē e pei o le atalii lona lua. E latou te faapea mai o loo auauna i le Atua, ae o le mea moni e latou te lē o faia faapea. Ua fetalai atu Iesu: “Na sau Ioane [le Papatiso] iā te outou i le ala o le amiotonu ae tou te leʻi talitonu iā te ia. Peitaʻi, na talitonu i ai le ʻauaolafoga ma fafine talitane. A o outou, e ui ina outou vāai i ai, ae tou te leʻi salamō ma talitonu iā te ia.”—Mataio 21:31, 32.

Ua toe faamatala e Iesu se isi talafaatusa, lea e faaalia ai le tulaga o taʻitaʻi lotu e lē gata e faatalalē i le auaunaga i le Atua, ae o i latou foʻi o ni ē e sili ona leaga: “Sa totō e se tagata lona togāvine ma siʻo ai i le pa, ua ia eli le mea e tali ai le suāvine ma faatū le ʻolo, ona ia lisi atu lea o le togāvine i ē e galulue vine, ae malaga i nuu mamao. Ua oo i le taimi o le seleselega, ona ia auina atu lea o se pologa i ē e galulue vine, ina ia maua mai ai ni fua mai i ē e galulue vine. Peitaʻi, na latou puʻe o ia ma fasi, ma tuliese o ia e aunoa ma se mea. Na ia toe auina atu le isi pologa iā i latou; ae na latou tā i lona ulu ma agaleagaina o ia. Ona ia toe auina atu foʻi lea o le tasi, ma na latou fasiotia o ia; e toʻatele foʻi isi na ia aauina atu, ae na latou sasa i nisi, a o isi na latou fasiotia.”—Mareko 12:1-5.

Po o le a malamalama i latou o loo faalogologo i le uiga o le talafaatusa? Atonu o loo latou manatua upu nei a Isaia o loo taʻusalaina ai le nuu o Isaraelu: “O le togāvine a Ieova o ʻau o le aiga lea o Isaraelu, ma o tagata foʻi o Iuta o lana faatoʻaga lea na ia fiafia i ai. Sa ia faamoemoe pea mo le faamasinotonu, faauta foʻi! o le solitulafono.” (Isaia 5:7) E talitutusa lenā ma le talafaatusa a Iesu. O Ieova lē e ana le togāvine, ma o le togāvine o le nuu o Isaraelu, lea o loo puipuia e le Tulafono a le Atua e pei o se pa o loo siʻomia ai i latou. Na auina atu e Ieova perofeta e aʻoaʻoina ona tagata, ma fesoasoani iā i latou ina ia fuaina mai ni fua lelei.

Peitaʻi, na faileagaina ma fasiotia e “ē e galulue vine” “pologa” na auina atu iā i latou. Ua fetalai atu Iesu: “E toʻatasi na totoe [i lē e ana le togāvine], o lona atalii pele lea. Na ia auina atu o ia iā i latou ma faapea ifo, ʻLatou te āva i loʻu atalii.’ Ae na faapea ane ē e galulue vine iā i latou lava, ʻO le suli lenei. Seʻi tatou ō e fasioti o ia, ma fai mo i tatou lona tofi.’ Ona latou puʻe ai loa lea iā te ia ma fasioti.”—Mareko 12:6-8.

Ua fesili atu nei Iesu: “O le ā le mea o le a faia e lē e ona le togāvine?” (Mareko 12:9) Ua tali mai taʻitaʻi lotu: “E na te matuā faaumatia i latou ona o lo latou leaga, ma lisi atu le togāvine i isi tagata galulue vine, e latou te avatu ai iā te ia ni fua pe a oo i le tau e fuata ai mea.”—Mataio 21:41.

E tusa o lea ua folafolaina atu ma le lē iloa e taʻitaʻi lotu le faamasinoga o le a oo iā i latou, auā e aofia i latou i “ē e galulue vine” i le “togāvine” a Ieova, le nuu o Isaraelu. Ua talafeagai ona faatalitalia e Ieova mai i ē e galulue vine e latou te fuaina mai ni fua e pei o le faatuatua i lona Alo, le Mesia. Ua pulatoʻa atu Iesu i taʻitaʻi lotu ma fetalai atu: “Pe tou te leʻi faitau ea i lenei mau, ʻO le maa lea na tuulafoaʻiina e tufuga, ua avea ma maa tulimanu sili. E mai iā Ieova lenei mea, ma e ofoofogia i la tatou vaai’?” (Mareko 12:10, 11) Ina ua māeʻa lenā, ona taʻu manino atu lea e Iesu o le uiga o lana fetalaiga: “O le mea lea ou te fai atu ai iā te outou, E aveesea le malo o le Atua mai iā te outou, ae tuuina atu i se nuu e fua mai ai ona fua.”—Mataio 21:43.

Ua iloa e le ʻautusiupu ma le ʻaufaitaulaga sili, o le talafaatusa ua faamatalaina e Iesu e ʻfaatatau atu iā i latou.’ (Luka 20:19) O lenei mea ua atili ai ona latou mananaʻo e fasioti Iesu, le “suli” moni. Peitaʻi e leʻi taumafai i latou e fasioti Iesu i le taimi lenā, ona o lo latou fefefe i le motu o tagata o ē e manatu iā Iesu o se perofeta.