E iai tamāloloa ua ō mai mai i le itu i Sasaʻe e saʻiliʻili i fetu ma le manatu, e mafai ona latou iloa ai le uiga o mea e tutupu i olaga o tagata. (Isaia 47:13) A o iai i latou i le itu i Sasaʻe, ua latou vaaia ai se “fetu” ma mulimuli atu i ai mo le tele o maila. Ua taʻitaʻia i latou e lenei fetu i Ierusalema ae e lē o Peteleema.

Ua latou taunuu i Ierusalema ma ua latou tuufesili: “Po o fea o iai lē ua fanau mai o le tupu o tagata Iutaia? Auā na matou vaaia lona fetu a o matou iai i sasaʻe, ma ua matou ō mai ai e ifo atu iā te ia.”—Mataio 2:1, 2.

Ua faalogo le tupu o Herota o Ierusalema i lenei tala, ma ua matuā ita ai o ia. Ua ia faapotopoto i le ʻaufaitaulaga sili ma isi taʻitaʻi lotu o Iutaia, ma fesili atu iā i latou po o fea e fanau ai le Keriso. Ua latou tali atu e faavae mai i Tusitusiga Paia: “O Peteleema.” (Mataio 2:5; Mika 5:2) Ua aami faalilolilo e Herota o ē e saʻiliʻili i fetu ma faapea atu: “Ia outou ō ma matuā saʻili i le tamaitiiti, a outou maua, ia toe foʻi mai e taʻu mai iā te aʻu, o aʻu foʻi ou te fia alu atu e ifo iā te ia.” (Mataio 2:8) O le mea moni, o loo manaʻo Herota e saʻili le tamaitiiti ina ia fasiotia.

Ina ua ō ese ē e saʻiliʻili i fetu, ona tupu ai lea o se mea uigaese. O loo muamua atu iā i latou le “fetu” lea na latou vaaia i Sasaʻe. E lē o se fetu e masani ai, ae o se fetu ua aumaia faapitoa e taʻitaʻia i latou. Ua faaauau ona mulimuli i ai ē e saʻiliʻili i fetu, seʻia oo ina tū i luga aʻe o le fale o loo iai Iosefa, Maria ma le la tama.

Ua ulufale atu ē e saʻiliʻili i fetu i le fale, ma ua latou vaaia ai Maria ma le tamaitiiti. Ua latou faapaʻuʻū ma ifo atu iā Iesu, ma avatu meaalofa o auro, o mea manogi ma muro. Ua lapataʻia i latou e le Atua i se miti ina ia aua neʻi toe foʻi iā Herota. O lea, ua suia ai loa le auala e latou te uia a o toe foʻi atu i lo latou atunuu.

Faamata o ai na aumaia le “fetu” lea na taʻitaʻia ē e saʻiliʻili i fetu? Manatua, e leʻi taʻitaʻiina saʻo i latou e le fetu iā Iesu i Peteleema. Nai lo lea, na taʻitaʻiina i latou i Ierusalema iā Herota, o lē sa saʻili ina ia fasiotia Iesu. O le mea tonu lenā e tupu, pe ana lē faalaa ane le Atua ma lapataʻia ē e saʻiliʻili i fetu, e aua le taʻuina iā Herota le nofoaga o loo iai Iesu. Ua manino mai la, o le fili o le Atua o Satani, lea na manaʻo e fasiotia Iesu, ma sa ia faaaogāina lea auala e taumafai ai e faataunuu lenei fuafuaga.