1, 2. O ā ni mea tāua ua mou atu i tagata i aso nei, ma ua faapefea i nei mea ona aafia ai i tatou?

 SE‘I faapea ua leiloa po ua leaga fo‘i se meataalo sa sili ona fiafia i ai se tamaitiiti, o lea ua tagi masūsū ai lava. Ua faamomoiloto lava le faalogo atu i lana tagi! Ae po ua e taga‘i la i le toe fiafia o foliga o le tamaitiiti pe afai e toe maua mai e lona matua lea meataalo? E lē faigatā i le matua ona toe su‘e mai pe faaleleia lenā meataalo. Peita‘i i le tamaitiiti o se mea e matuā fiafia ma ofo tele ai o ia. O le mea lea na foliga mai ua mou atu, ae o lea ua toe faafo‘isia mai!

² Ua iai iā Ieova, le Tamā silisili, le mana e toe faafo‘isia pe toe faafouina ai le tulaga lea atonu e manatu lana fanau i le lalolagi, ua mou atu e lē toe maua. E tatou te lē o faasino atu i ni meataalo e leai se tāua. I nei “aso faigatā,” e tatau ona tatou onosaia ai le mou atu po o le lē toe maua o nisi mea e sili ona tāua. (2 Timoteo 3:1-5) Ua lamatia le tele o mea o loo sili ona pele i tagata, e pei o fale, o meatotino, le galuega, e oo lava i le soifua mālōlōina. E tatou te faanoanoa fo‘i a o mafaufau atu i le faaleagaina o le si‘osi‘omaga ma i‘uga e maua mai ai, ma le mou atu o le tele o meaola eseese. Peita‘i e leai se mea e sili atu ona tigā na i lo le maliu o sē pele iā i tatou. E tatou te matuā aafia ai i le faanoanoa e peisea‘ī ua leai se malosi o totoe.—2 Samuelu 18:33.

3. O le ā le faamoemoe faamāfanafanaloto o loo ta‘ua i le Galuega 3:21, ma o le a faapefea ona faataunuuina e Ieova?

³ Ma‘eu la se faamāfanafanaloto o le iloa e iai le mana o Ieova e toe faafo‘isia ai mea! O le a tatou mātauina, o loo iai se tulaga mata‘ina i mea e mafai ona faia e le Atua mo lana fanau i le lalolagi. O loo faaalia i le Tusi Paia e faapea, ua fuafuaina e Ieova le ‘toe faafo‘isiaina o mea uma lava.’ (Galuega 3:21) O le a faataunuuina e Ieova lenei fuafuaga e ala mai i le Malo Faa-Mesia, lea e  pulea e lona Alo o Iesu Keriso. Ua faamaonia na amata ona pule lenei Malo i le lagi i le tausaga e 1914. a (Mataio 24:3-14) O le ā o le a toe faafo‘isia mai? Se‘i o tatou talanoa i nisi o gaoioiga sili a Ieova e toe faafo‘isia ai mea. Ua tatou iloatino se tasi o nei gaoioiga. O isi gaoioiga o le a faatinoina i se tulaga telē i le lumana‘i.

4, 5. O le ā le mea na tupu i tagata o le Atua i le 607 T.L.M., ma o le ā le faamoemoe na saunia e Ieova mo i latou?

⁴ O le mea ua uma ona toe faafo‘isia e Ieova, o le tapua‘iga moni lea. Ina ia malamalama i le uiga o lenei manatu, se‘i tatou talanoaina puupuu le talafaasolopito o le malo o Iuta. O inā o le a tatou matuā malamalama ai i le faagaoioiga o le mana o Ieova lea e toe faafo‘isia ai mea.—Roma 15:4.

⁵ Se‘i manatu fo‘i i faalogona o na tagata Iutaia faamaoni i le 607 T.L.M. ina ua faaumatia Ierusalema. Sa matuā faaleagaina le aai na pele iā i latou, sa solofa ifo o latou papuipui. Ae o le mea sa sili ona mata‘utia, o le matuā malepe o le malumalu matagofie na fausia e Solomona, lea sa faaautū i ai le tapua‘iga mamā a Ieova i le lalolagi uma. (Salamo 79:1) O tagata na sao mai ai, sa faaaunuua i latou i Papelonia, ae tuua lo latou laueleele moni e fai ma nofoaga o manu fe‘ai. (Ieremia 9:11) I manatu o tagata, ua matuā leai lava se mea na totoe. (Salamo 137:1) Peita‘i, iā Ieova, o lē ua leva ona ia valoia maia lenei faaumatiaga, sa ia saunia se faamoemoe mo le toe faafo‘isia o mea i se taimi o i luma.

6-8. (a) O le ā le matua ua alia‘i mai pea i tusi a perofeta Eperu, ma o le a le ulua‘i faataunuuga o na valoaga? (e) Ua faapefea ona faataunuuina le tele o valoaga o le toe faafo‘isiaga i auauna a le Atua i ona pō nei?

⁶ O le mea moni, o le toe faafo‘isia o se mataupu lea ua alia‘i  mai pea i tusi a perofeta Eperu. b E ala mai iā i latou, na folafola ai e Ieova le toe maua mai o le laueleele, le toe nofoia e tagata, le toe lafulemu o le eleele, le puipuia mai manu fe‘ai ma osofa‘iga a fili. Sa ia faamatalaina lo latou laueleele ua toe maua mai e pei o se parataiso moni lava! (Isaia 65:25; Esekielu 34:25; 36:35) Ae sili ai, o le a toe amataina le tapua‘iga moni, ma toe fausia le malumalu. (Mika 4:1-5) O valoaga nei na maua ai e tagata Iutaia o ē na faaaunuua se faamoemoe, ma sa mafai ai ona latou tutumau a o faaaunuua i Papelonia mo le 70 tausaga.

⁷ Na oo mai le taimi o le toe faafo‘isiaga. Ina ua faasa‘olotoina mai Papelonia, sa toe fo‘i atu loa tagata Iutaia i Ierusalema ma toe fausia le malumalu o Ieova i inā. (Esera 1:1, 2) Ina ua latou faia le tapua‘iga mamā, sa faamanuiaina i latou ma lo latou laueleele e Ieova. Sa ia puipuia i latou mai fili ma manu fe‘ai na nofoia lo latou laueleele mo le faitau sefulu o tausaga. Ma‘eu so latou olioli i le mana o Ieova e toe faafo‘isia ai mea! Peita‘i e na o se ulua‘i faataunuuga lea o valoaga o le toe faafo‘isiaga, ma e faatapulaaina. O le faataunuuga silisili e tatau ona tupu i “aso e gata ai,” o o tatou taimi pe a fai ma tupu le Suli o le tupu o Tavita lea ua leva ona valoia mai.—Isaia 2:2-4; 9:6, 7.

⁸ E le‘i umi talu ona avea Iesu ma tupu o le Malo faalelagi i le tausaga e 1914, ae saga‘i mai loa o ia i mana‘oga faaleagaga o auauna faamaoni a le Atua i le lalolagi. Sa faasa‘olotoina e le tupu o Peresia o Kuresa, se vaega totoe o Iutaia mai Papelonia i le 537 T.L.M. Na faapena fo‘i ona faasa‘olotoina e Iesu se vaega totoe o Iutaia faaleagaga, o ona lava soo, mai aafiaga a “Papelonia le aai tele,” o lotu sesē uma a le lalolagi. (Faaaliga 18:1-5; Roma 2:29) I le 1919 ma faasolo mai, ua toe faafo‘isia ai le tapua‘iga mamā i lona tulaga talafeagai i olaga o Kerisiano moni. (Malaki 3:1-5) Talu mai lenā taimi, o loo tapua‘i pea tagata o Ieova iā te Ia i lona malumalu faaleagaga ua faamamāina, po o lana faatulagaga mo le tapua‘iga mamā. Aiseā e tāua ai lenei mea iā i tatou i aso nei?

9. Ina ua mavae le taimi o le ‘auaposetolo, o le ā na faia e lotu ua faapea mai o Kerisiano, i le tapua‘iga a le Atua, ae o le ā ua faia e Ieova i o tatou aso?

⁹ Se‘i manatu i le talafaasolopito anamua. E tele faamanuiaga faaleagaga na maua e Kerisiano i tuā i aso o le ‘auaposetolo. Peita‘i na valoia mai e Iesu ma le ‘auaposetolo e faapea, o le a faaleagaina ma mou atu le tapua‘iga moni. (Mataio 13:24-30; Galuega 20:29, 30) Ina ua mavae taimi o le ‘auaposetolo, ona alia‘i mai ai lea o lotu ua faapea mai o Kerisiano. Sa taliaina e ona ta‘ita‘i lotu a‘oa‘oga ma gaoioiga faapaupau. Ona o a latou faiga na toetoe lava lē mafai ai e tagata ona faalatalata atu i le Atua. Sa latou faamatalaina o Ia o se Tolutasi e lē mafai ona malamalama i ai se isi, ma sa latou a‘oa‘oina tagata ina ia ta‘utino atu agasala i patele ma ia tatalo atu iā Maria ma “sagato” eseese na i lo le ta‘utino atu iā Ieova. I le taimi nei la, o le ā ua faia e Ieova ina ua mavae atu le tele o senituri o le liliu ese mai le mea moni? I lenei lava lalolagi ua saisaitia i talitonuga sesē faalotu ma ua tumu i amioga faalēmata‘u, ua saga‘i mai ai o ia ma toe faafo‘isia mai le tapua‘iga mamā! E lē o se fia faaalialia, peita‘i e mafai ona tatou faapea atu, ua avea lenei toe faafo‘isiaga o se mea ua tupu e sili ona tāua i nei ona pō.

10, 11. (a) O ā vala autū e lua o loo aofia i le parataiso faaleagaga, ma ua faapefea ona aafia ai oe? (e) O ai tagata ua aoaoina mai e Ieova i le parataiso faaleagaga, ma o le ā o le a faaeaina i latou e vaai i ai?

¹⁰ O lea ua olioli ai Kerisiano moni i aso nei i se parataiso faaleagaga, lea o loo faaauau pea ona faamatagofieina. O le ā o loo aofia ai i lenei parataiso? E lua vala autū. O le mea muamua, o le tapua‘iga mamā i le Atua moni, o Ieova. Ua ia faamanuiaina i tatou i se tapua‘iga lea ua aunoa ma ni pepelo ma a‘oa‘oga ua faauiga sesē. Ua ia foa‘i mai mo i tatou taumafa faaleagaga. O lea ua mafai ai ona tatou a‘oa‘oina mea e uiga i lo tatou Tamā faalelagi, ia faafiafiaina lona finagalo, ma faalatalata atu iā te ia. (Ioane 4:24) O le vala lona lua o lenei parataiso faaleagaga e aofia ai tagata. E pei ona valoia mai e Isaia, i “aso e gata ai,” e a‘oa‘oina ai e Ieova ona tagata tapua‘i i ala o le filemu. Ua māfua ai ona tatou lē toe auai i ni faigātaua. E ui lava  i o tatou vaivaiga, ae ua ia fesoasoani mai iā i tatou ina ia ofu i le “tagata fou.” Ua ia faamanuiaina a tatou taumafaiga e ala i lona agaga paia, lea tatou te fuaina mai ai uiga matagofie. (Efeso 4:22-24; Kalatia 5:22, 23) Ua aafia moni oe i le parataiso faaleagaga pe a e gaoioi e ōgatusa ma le agaga o le Atua.

¹¹ Ua aoaoina mai e Ieova i lenei parataiso faaleagaga tagata ua ia alofagia—o ē alolofa iā te ia, o ē faatāuaina le filemu, ma “manatu mamafa i o latou mana‘oga faaleagaga.” (Mataio 5:3, NWT) O le a faaeaina i latou e vaai i le toe faafo‘isiaga e sili atu ona mata‘ina—le faaleleia o le lalolagi aoao atoa ma tagata.

12, 13. (a) Aiseā e ao ai ona iai se isi faataunuuga o valoaga e uiga i le toe faafo‘isiaga? (e) O le ā le fuafuaga a Ieova mo le lalolagi e pei ona sa ta‘ua i Etena, ma aiseā ua aumaia ai e lenei mea se faamoemoe mo le lumana‘i?

¹² O le tele o valoaga mo le toe faafo‘isiaga, o loo aofia ai isi mea e sili atu i le na o le itu faaleagaga. Mo se faaa‘oa‘oga, na tusia e Isaia e faatatau i le taimi o le a toe faamālōlōina uma ai ē mama‘i, o ē pipili, o ē tauaso, o ē logonoa, ma o le a lē toe iai le oti. (Isaia 25:8; 35:1-7) E le‘i iai i Isaraelu anamua ni faataunuuga faaletino o na folafolaga. E ui ina ua iai se faataunuuga faaleagaga o nei folafolaga i o tatou aso, ae e mafai ona tatou talitonu o le a iai se faataunuuga atoatoa o lenā mea i le itu faaletino i le lumana‘i. E faapefea ona tatou iloa lea mea?

¹³ I tuā i Etena, na faamanino mai ai e Ieova lana fuafuaga mo le lalolagi: E ao ona aināina e se aiga faaletagata e fiafia, e soifua mālōlōina ma e autasi. Sa tatau ona tausia e le tamāloa ma le fafine le lalolagi ma meaola uma, ma ia faia le lalolagi atoa ina ia avea o se parataiso. (Kenese 1:28) Ua matuā ese lenā fuafuaga ma le tulaga o mea o loo iai nei. E ui i lea, e mafai ona tatou mautinoa, e lē taitai suia fuafuaga a Ieova. (Isaia 55:10, 11) O le a aumaia e Iesu, le Tupu Faa-Mesia ua tofia mai e Ieova, lenei Parataiso i le lalolagi aoao.—Luka 23:43.

14, 15. (a) O le a faapefea ona ‘faafouina e Ieova mea uma lava’? (e) O le a faape‘ī le olaga i le Parataiso, ma o le ā le vala o loo sili ona e faatalitalia ma le naunauta‘i?

¹⁴ Ma‘eu le mafai ona vaai atu ua suia le lalolagi atoa e avea  ma Parataiso! Ua fetalai mai Ieova e faatatau i lenā taimi: “Faauta, ou te faia ia fou mea uma lava.” (Faaaliga 21:5) Se‘i manatu i lenā folafolaga. Pe a māe‘a ona faaaogā e Ieova lona mana e faaoo mai ai le sala i lenei faiga o mea amioleaga, ona totoe ai lea o le “lagi fou ma le lalolagi fou.” O lona uiga o le a pulea mai e se faigāmalo fou i le lagi se faapotopotoga fou i le lalolagi, lea o le a faia a‘e i tagata e alolofa iā Ieova, ma faia lona finagalo. (2 Peteru 3:13) O le a taofiofia uma gaoioiga a Satani ma ana temoni. (Faaaliga 20:3) Ona faato‘ā maua ai lea e tagata le sa‘olotoga mai faiga faapi‘opi‘o, le feitaga‘i, ma aafiaga leaga, lea ua masani ona tutupu i le fia afe tausaga. E mautinoa le matuā lagonaina o le mapusaga.

¹⁵ Ona mafai ai lea ona tatou tausia lenei lalolagi matagofie e tusa ai ma le ulua‘i finagalo o le Atua. O loo iai i le lalolagi ona lava malosiaga e toe faafo‘isia ai le lelei o tulaga o mea. E mafai lava e vaituloto ma vaitafe ua faapolusioneina i le taimi nei, ona toe faamamāina pe afai e aveesea mea o loo māfua ai le polusione; e mafai fo‘i ona toe lauolaola laufanua ua faaleagaina i faigātaua pe a mou atu taua. Ma‘eu se fiafiaga i le galuea‘iina o le laueleele, ma toe suia ina ia avea o se paka e peisea‘ī o se togālaau! O le a pei le lalolagi aoao o Etena, e anoanoa‘i mea eseese e maua ai. O le a lē toe faatama‘ia ma le lē pulea e tagata meaola ma laau, ae o le a latou ola manuia ma foafoaga uma lava i le lalolagi. E oo lava i tamaiti e leai se mea e toe fefefe ai fua i manu fe‘ai.—Isaia 9:6, 7; 11:1-9.

16. I le Parataiso, o le ā le toe faafo‘isiaga o le a aafia ai tagata faamaoni uma ta‘ito‘atasi?

¹⁶ O le a tupu tonu lava fo‘i iā i tatou le tulaga o le toe faafo‘isiaga. Pe a mavae atu Amaketo, o le a vaaia ai e i latou e faasaoina ni faamālōlōga faavavega i le lalolagi aoao. E pei lava ona faia e Iesu a o iai i le lalolagi, o le a faapena fo‘i ona ia faaaogā lona mana mai le Atua, e toe faapupulaina ai o ē tauaso, e toe faalogo ai ē tutuli, e toe malolosi ai ē ua faama‘ia o latou tino. (Mataio 15:30) E fiafia tagata ua pulapula lā goto o latou soifua ona o le a toe talavou. O le a toe ola mālōlōina ma tiotio. (Iopu 33:25) O le a lē toe maanuminumi pa‘u o le tino, o le a toe malolosi  uma vae ma lima, ma o le a fegaoioia‘i maso o le tino i se malosi ua faafouina. O le a lagonaina e tagata faamaoni le faasolosolo mālie ona mavae atu aafiaga o le agasala ma le lē lelei atoatoa, se‘ia oo ina mou atu e faavavau. Ma‘eu so tatou faafetaia o Ieova le Atua ona o lona mana ofoofogia e faafo‘isia ai mea! Se‘i o tatou ua‘i atu nei la i se tasi o vala e sili ona faamāfanafanaloto o lenei taimi mata‘ina o le toe faafo‘isiaga.

17, 18. (a) Aiseā na a‘oa‘ia ai e Iesu le ‘au Satukaio? (e) O ā tulaga na māfua ai ona ole atu Elia iā Ieova ina ia toe faatūina mai se tagata?

¹⁷ I ona pō o le ‘auaposetolo, e le‘i talitonu nisi ta‘ita‘i lotu, le ‘au Satukaio, i le toetū. Na a‘oa‘ia i latou e Iesu i ana fetalaiga e faapea: “Ua outou sesē lava, ina ua outou lē iloa upu o Tusi, ma le mana o le Atua.” (Mataio 22:29) Ioe, ua faaalia e le Tusi Paia, o loo iā Ieova lenā mana e toe faafo‘isia ai ola. E faia faapefea?

¹⁸ Se‘i manatu i le mea na tupu i aso o Elia. O loo sii e se fafine ua oti lana tane le tino o si ana tama e to‘atasi ua oti. Atonu sa matuā faate‘ia ai lava le perofeta o Elia lea ua fai sina umi o talimālō ai lenei fafine. I se taimi muamua atu, sa faasaoina ai e Elia lenei tamaitiiti mai le matelāina. Atonu la sa matuā alofa lava Elia i lenei tamaitiiti. Na matuā nutimomoia le loto o si nei tinā, auā e na o le pau lea o le tagata ola na te manatuaina ai lana tane ua maliu. Atonu sa iai lona faamoemoega o lana tama o le a tausia o ia pe a oo ina loomatua. Sa matuā popole fo‘i le fafine ona o lona manatu ua faasalaina o ia i ni ana mea sesē na faia i taimi ua tuana‘i. Sa lē mafai ona onosaia e Elia le vaai atu i lenei tulaga faigatā. O lea na tago atu ai Elia ma aveese mālie le tino oti o le tama mai le fatafata o lona tinā lea sa afisi ai, ae sii atu i lona potu, ma tatalo atu iā Ieova le Atua ina ia toe faaola mai le tama.—1 Tupu 17:8-21.

19, 20. (a) Na faaalia faapefea e Aperaamo lona faatuatua i le mana o Ieova e toe faafo‘isia ai mea, ma o le ā le faavae o lenā faatuatua? (e) Na faapefea ona tauia e Ieova le faatuatua o Elia?

¹⁹ E lē o Elia le tagata muamua na talitonu i le toetū. I senituri muamua atu, sa iai māfuaaga na talitonu ai Aperaamo o loo iā Ieova lenā mana e toe faafo‘isia ai ola. Ina ua 100 tausaga o  Aperaamo ae 90 tausaga o Sara, na toe faafo‘isia ai e Ieova iā i la‘ua le malosi faafanautama, ma mafai faavavega ai e Sara ona ia fanauina mai se tama tane. (Kenese 17:17; 21:2, 3) Mulimuli ane, ina ua avea le tamaitiiti ma tagata matua, ona faatonuina lea e Ieova Aperaamo ina ia osia le taulaga i lona atalii. Sa faaalia e Aperaamo lona faatuatua, i lona talitonu mautinoa e mafai e Ieova ona toe faatū mai lona atalii pele o Isaako. (Eperu 11:17-19) Atonu o le faatuatua malosi lea o Aperaamo na mafai ai ona ia faamautinoa i ana auauna a o le‘i aga‘i i le mauga e ofo atu lona atalii e faapea, o le a la toe fo‘i uma ane lava ma Isaako.—Kenese 22:5.

²⁰ Sa faasaoina e Ieova le ola o Isaako, e le‘i mana‘omia ai la se toetū i lenā taimi. Peita‘i, na oti le tama a le fafine ua oti lana tane i le taimi o Elia, ae e le‘i umi se taimi. Sa tauia e Ieova le faatuatua o le perofeta e ala i le toe faatūina mai o le tamaitiiti! Ona toe faafo‘i atu lea e Elia le tamaitiiti i lona tinā, ma le faaupuga lē mafaagaloina: “Faauta mai, ua ola lau tama”!—1 Tupu 17:22-24.

21, 22. (a) O le ā le fuafuaga o toetū ia o loo tusia i le Tusi Paia? (e) I le Parataiso, o le ā le tele o le a faataunuuina ai le toetū, ma o ai o le a faatinoina?

²¹ O lea la, o le taimi muamua lenā ua ta‘ua ai i le Tusi Paia le faaaogāina e Ieova o lona mana e toe faafo‘isia ai le ola o se tagata. Mulimuli ane, sa tuuina fo‘i e Ieova le mana iā Elisaia, Iesu, Paulo, ma Peteru, ina ia toe faatutū mai ai ē na feoti. O le mea moni, o i latou na toe faatutūina na mulimuli ane toe feoti fo‘i. E ui i lea, o na tala i le Tusi Paia ua aumaia ai iā i tatou se vaaiga matagofie i mea o le a oo mai.

²² I le Parataiso, o le a faataunuuina ai e Iesu lana vaega e avea “o le toe tū ma le ola.” (Ioane 11:25) O le a ia toe faatutūina le faitau miliona o tagata, ma tuuina atu iā i latou se avanoa e ola ai e faavavau i le lalolagi Parataiso. (Ioane 5:28, 29) Se‘i e mafaufau i le toe mauaina o mafutaga ma uō ma aiga pele ua leva ona valavala i le oti, a o latou toe faafeiloa‘i solo ma le matuā olioli lava! O le a vivii atu tagata uma iā Ieova ona o lona mana e toe faafo‘isia ai mea.

23. O le ā le faaaliga silisili o le mana o Ieova, ma ua faapefea i lenei faaaliga ona faamautinoa mai ai lo tatou faamoemoe mo le lumana‘i?

 ²³ Ua aumaia e Ieova se faamautinoaga a‘ia‘i o le moni o na faamoemoega. O le faaaliga silisili lava o lona mana, o lona toe faatūina lea o lona Alo o Iesu, e avea o se agaga malosi, ma faatulaga ai o ia e lona lua atu iā Ieova. Na faaali atu Iesu o lē ua toe faatūina, i le faitau selau o i latou na avea ma molimau na vaaitino iā te ia. (1 Korinito 15:5, 6) Ua tatau ona lava ma totoe na faamaoniga, e oo lava i ē o tau masalosalo. O loo iā Ieova le mana e toe faafo‘isia ai le ola.

24. Aiseā e mafai ai ona tatou mautinoa o le a toe faatutūina mai e Ieova ē ua maliliu, ma o le ā le faamoemoe e mafai ona tatou teumaluina?

²⁴ E lē gata o loo iai iā Ieova le mana e toe faatūina mai ai ē ua maliliu, ae o lona finagalo lava fo‘i lea. Sa faagaeeina le tagata faatuatua o Iopu e faapea atu, o loo finagalo alofa Ieova e toe faatutūina mai ē ua maliliu. (Iopu 14:15) Pe e te lē fia faalatalata atu ea la i lo tatou Atua, o lē o loo naunau e faaaogā lona mana e toe faafo‘isia ai le ola i se auala alofa faapena? Ae ia manatua, o le toetū ua na o se tasi lea o vala o galuega silisili tau faafo‘isiaga o le a faia e Ieova i le lumana‘i. A o e matuā faalatalata atu iā te ia, se‘i e teumaluina pea le faamoemoe tāua e faapea, e mafai ona e iai i inā ma e vaai atu a o “faia ia fou mea uma lava” e Ieova.—Faaaliga 21:5.