1, 2. O le ā le “mealilo” paia e tatau ona tatou naunau i ai, ma aiseā?

 O MEALILO! Talu ai e faagaee e mealilo ni lagona naunau ma le fia iloa, e masani ona faigatā mo tagata ona lē faailoa atu i isi. Peitaʻi, ua faapea mai le Tusi Paia: “O le mamalu o le Atua ia natia ai mea.” (Faataoto 25:2) Ioe, ona o Ieova o le Pule Silisili Ese ma o Lē na Foafoaina Mea, ua tonu ai la lona natia o nisi mea mai le iloaina e tagata, seʻia oo i lana taimi atofaina e faaali mai ai.

² Peitaʻi ane, o loo iai se mealilo mataʻina, ma le faafiafia loto o loo faaalia mai e Ieova i lana Afioga. Ua taʻua o ʻle mealilo paia sa i le finagalo o le Atua.’ (Efeso 1:9) O le iloaina o lenā mealilo e tele atu nisi mea e mafai ona tatou faia ai na i lo le tau ina faamalieina ai o lo tatou fia iloa. O le malamalama i lenei mealilo e mafai ona taʻitaʻia ai i le faaolataga ma tau maua ai sina malamalamaga i le atamai lē mafaatusalia o Ieova.

3, 4. Na faapefea ona saunia mai e le valoaga i le Kenese 3:15 se faamoemoe, ma o le ā le ʻmealilo,’ na faaaofia mai ai?

³ Ina ua agasala Atamu ma Eva, atonu na foliga mai ai ua mou atu foʻi ma le fuafuaga a Ieova ina ia aināina le lalolagi parataiso i ni tagata lelei atoatoa. Peitaʻi na vave ona toe foʻia e le Atua le faafitauli. Na ia fetalai mai: “Ou te faatupuina le feitagaʻi iā te oulua ma le fafine, o lau fanau foʻi ma lana fanau; na te tuʻimomomoina lou ulu, a o oe e te tuʻimomomoina lona mulivae.”—Kenese 3:15.

⁴ O ni upu lavelave nei ma le faigatā ona malamalama i ai. O ai lenei fafine? O ai le gata? O ai le “fanau” o le a tuʻimomomoina le ulu o le gata? Atonu sa tau matemate i ai Atamu ma Eva. Peitaʻi, ua saunia mai e fetalaiga a le Atua se faamoemoe mo so o se tagata faamaoni e tupuga mai lenā ulugalii lē faamaoni. O le a manumalo le amiotonu. O le a faataunuuina  le fuafuaga a Ieova. E faapefea? Ioe, o se matuā mealilo lava! Ua taʻua e le Tusi Paia, o le “atamai o le Atua i le mea lilo paia, le atamai sa natia.”—1 Korinito 2:7, NWT.

5. Faataʻitaʻi mai le māfuaaga ua faasolosolo ai ona faailoa mai e Ieova lana mealilo.

⁵ Ona o Ieova “o lē na te faaalia mea ua lilo,” na mulimuli ane ai faaalia mai auʻiliʻiliga tāua uma e tusa ai o le faagaoioia o lenei mealilo. (Tanielu 2:28) Peitaʻi o le a faifai mālie ona ia faia faasolosolo mai. Mo se faataʻitaʻiga, tatou te ono mafaufau i le auala e tali atu ai se tamā alofa pe a fesiligia o ia e sona atalii laʻitiiti, “Tamā ea, na faapefea ona ou fanau mai?” O se tamā e atamai, o le a ia avatu se tali i ni faamatalaga e mafai e le tamaitiiti i lea taimi ona malamalama i ai. A o faasolo ina matua le tamaitiiti, ona toe faamatala atili atu lea e le tamā iā te ia nisi mea. I se auala faapena, ua silafia ai foʻi e Ieova le taimi e mafai ai e ona tagata ona latou malamalama lelei i faaaliga o lona finagalo ma ana fuafuaga.—Faataoto 4:18; Tanielu 12:4.

6. (a) O le ā le fuafuaga e faia ai se feagaiga? (e) Aiseā ua matuā mataʻina ai le tausolomua iā Ieova ona ia osia ni feagaiga ma tagata?

⁶ Na faapefea ona faia mai e Ieova na faaaliga? Sa ia faaaogā se faasologa o ni feagaiga e faaali mai ai le tele o mea. E mautinoa, atonu e iai se taimi e te faia ai se ituaiga o feagaiga faapea—atonu pe i le faatauina o se fale, pe i le nonō mai po o le nonō atu o se vaega tupe. O feagaiga faapena e avea ma faatulagaga faaletulafono e faamaonia ai, o le a faatinoina uma maliega ua ioe faatasi i ai. Ae aiseā o le a manaʻomia ai e Ieova ona faia ni feagaiga aloaʻia ma tagata? E mautinoa, e lava ma totoe lana afioga e fai ma faamautinoaga o ana folafolaga. O le mea moni lenā, peitaʻi i le tele o taimi, ua lagolagoina ai ma le alofa e le Atua ana afioga e ala i ni feagaiga faaletulafono. O nei maliega lē motusia ua maua ai e i tatou o tagata lē lelei atoatoa, se faavae e sili atu ona mausalī e talitonuina ai nei folafolaga a Ieova.—Eperu 6:16-18.

7, 8. (a) O le ā le feagaiga na osia e Ieova ma Aperaamo, ma o le ā le malamalamaga ua maua e tusa ai ma le mealilo paia? (e) Na faapefea ona toe faapatino mai e Ieova le gafa o le a auala mai ai le fanau folafolaina?

⁷ I le silia ma le luaafe tausaga talu ona tuliesea le tagata mai le Parataiso, na fetalai Ieova i lana auauna faamaoni o Aperaamo: “O le mea lea ou te matuā faamanuia ai iā te oe, ma ou matuā faatoʻateleina lava lau fanau e pei o fetu o le lagi . . . o lau fanau foʻi e manuia ai atu nuu uma lava o le lalolagi; auā ua e usiusitai i laʻu upu.” (Kenese 22:17, 18) Sa lē na o se folafolaga lenei mea, auā sa faatulaga e Ieova lea faamatalaga i se feagaiga faaletulafono, ma lagolagoina e ala i lona faia o se tautōga. (Kenese 17:1, 2; Eperu 6:13-15) Maʻeu le mataʻina o le faia e le Alii Pule Silisili Ese o se feagaiga ina ia faamanuiaina le fanau a tagata!

⁸ Na faaalia e le feagaiga na osia ma Aperaamo e faapea, o le a oo mai le fanau folafolaina o se tagata, auā o le a avea o ia o sē e tupuga mai iā Aperaamo. Ae o ai o ia? I se taimi mulimuli ane, na faaalia ai e Ieova e faapea o le a avea le atalii o Aperaamo o Isaako ma augātamā o le fanau. Mai atalii e toʻalua o Isaako, sa filifilia mai ai Iakopo. (Kenese 21:12; 28:13, 14) Mulimuli ane, na taʻu atu e Iakopo nei upu faavaloaga i se tasi o ona atalii e toʻa 12: “E lē avea le tootoo iā Iuta, po o le faipule ai ona vae seʻia maliu mai Sailo [po o le “O Lē ua Iai le Aiā,” faamatalaga pito i lalo, NWT], e usiusitai foʻi atu nuu iā te ia.” (Kenese 49:10) I lenā taimi, na iloa faapea, o le a avea le fanau ma tupu, o lē o le a tupuga mai i le gafa o Iuta!

9, 10. (a) O le ā le feagaiga na faia e Ieova ma le nuu o Isaraelu, ma o le ā le puipuiga na maua mai i lenā feagaiga? (e) Na faataʻitaʻia mai faapefea e le Tulafono le manaʻomia e tagata o se togiola?

⁹ I le 1513 T.L.M., na faia ai e Ieova se sauniuniga, lea na faatulaga mai ai le tele o isi faaaliga atili e faatatau i le mealilo paia. Sa ia osia se feagaiga ma le fanau a Aperaamo, o le nuu lea o Isaraelu. E ui e lē o toe faaaogāina i le taimi nei lenā  feagaiga, ae sa avea lenei feagaiga o le Tulafono na tuu atu iā Mose ma vaega sili ona tāua o le fuafuaga a Ieova, ina ia aumaia le fanau folafolaina. E faapefea? Seʻi talanoaina ni auala se tolu. Muamua, sa pei le Tulafono o se pa puipui. (Efeso 2:14) O ona poloaʻiga amiotonu sa avea o se papupuni i le va o tagata Iutaia ma tagata o Nuu Ese. O lea na aogā ai le Tulafono ina ia faasaoina pea le gafa lea o le a tupuga mai ai le fanau o le folafolaga. Na telē le aogā o lenā puipuiga, auā na mafai ai ona tumau pea le nuu o Isaraelu ina ua oo i le taimi atofaina a le Atua mo le fanau mai o le Mesia i le ituaiga o Iuta.

¹⁰ Lona lua, sa matuā faamaonia mai e le Tulafono le manaʻomia e tagata o se togiola. Ona o le Tulafono e lelei atoatoa, na mafai ai ona faaalialia le leai o se tomai i tagata agasala e tausisia atoatoa ai le Tulafono. Na faaalia ai le “solitulafono ina seʻia maliu mai le fanau na folafola i ai.” (Kalatia 3:19) E ala i taulaga na osia i manu, na faia ai e le Tulafono se togisala lē tumau mo agasala. Peitaʻi, talu ai na tusi mai Paulo faapea, “e lē mafai ona aveeseina o agasala i le toto o povi poʻa ma ʻoti,” ua avea ai la nei taulaga o ni faaataga o le taulaga togiola a Keriso. (Eperu 10:1-4) Sa avea lenā feagaiga i tagata faamaoni i Isaraelu, o se “taʻitaʻitama . . . na te taʻitaʻiina i [latou] iā Keriso.”—Kalatia 3:24.

11. O le ā le faamoemoe mamalu na ofoina atu e le Tulafono i le nuu o Isaraelu, ae aiseā na latou lē maua ai lea tulaga o se nuu atoa?

¹¹ Lona tolu, o lenā feagaiga na tuuina atu ai i le nuu o Isaraelu se faamoemoe mamalu. Na fetalai atu Ieova afai e faamaoni i lenā feagaiga, o le a avea i latou “ma malo o ositaulaga, ma nuu paia.” (Esoto 19:5, 6) Mulimuli ane, sa maua mai iā Isaraelu faaletino uluaʻi sui o le malo faalelagi o tupu ma ositaulaga. Peitaʻi, i le avea o se nuu atoa, sa fouvale Isaraelu i le Tulafono, sa teena le Mesia ma latou lē mauaina ai lenā folafolaga. O ai la nisi, o le a faaatoaina le malo o ositaulaga? O le a faapefea foʻi ona fesootaʻi mai lenā nuu faamanuiaina i le fanau folafolaina? O vala na o le mealilo paia o le a faaalia mai i le taimi atofaina a le Atua.

12. O le ā le feagaiga na osia e Ieova ma Tavita, ma o le ā le malamalama na faasusuluina mai ai i le mealilo paia a le Atua?

¹² I le senituri e 11 T.L.M., na faasusulu atili mai ai e Ieova le malamalama i le mealilo paia ina ua ia toe osia se isi feagaiga. Na ia folafola mai i le tupu faamaoni o Tavita: “Ona ou faatūina ai lea o so lau fanau pe a mavae atu oe, . . . ou te faatumauina foʻi lona malo. . . . Ou te faatumauina foʻi le nofoalii o lona malo e faavavau.” (2 Samuelu 7:12, 13; Salamo 89:3) O lona uiga, sa faasino tonu mai le gafa e tupuga mai ai le fanau folafolaina, i le gafa o Tavita. Ae pe mafai ea e se tagata e faatauvaa sona tupuaga ona pule e faavavau? (Salamo 89:20, 29, 34-36) Pe mafai ea e se tupu faaletagata faapena ona ia laveaʻia tagata mai le agasala ma le oti?

13, 14. (a) E tusa ai o le Salamo 110, o le ā le folafolaga na faia e Ieova i lana Tupu faauuina? (e) O ā isi faaaliga atili e faatatau i le fanau sa faatalitalia, na faia e Ieova e auala mai i perofeta?

¹³ Ina ua faagaeeina Tavita, na ia tusi mai: “Ua tulei mai le afioga a Ieova i loʻu Alii, Ia e nofo i loʻu itu taumatau, seʻia ou faia ē ua ita iā te oe ma mea e tū ai ou vae. Ua tautō Ieova, e lē salamō lava ia, O oe lava o le ositaulaga e faavavau, e uiga faatasi ma Mekisateko.” (Salamo 110:1, 4) Sa faatatau saʻo atu lava upu a Tavita i le fanau na folafolaina, po o le Mesia. (Galuega 2:35, 36) O le a pule lenei Tupu, e lē mai Ierusalema, ae mai le lagi i le “itu taumatau” o Ieova. Mai lenā tulaga ua ia pule ai e lē na o laueleele o Isaraelu, ae o le lalolagi atoa. (Salamo 2:6-8) E iai foʻi se isi mea na faaalia mai ai. Seʻi mātau foʻi na fofogaina mai e Ieova se tautōga aʻiaʻi e faapea, o le a avea le Mesia ma “ositaulaga . . . e uiga faatasi ma Mekisateko.” I le pei o Mekisateko, o lē na auauna o se tupu ma o se ositaulaga foʻi i aso o Aperaamo, o le a faapena foʻi i le fanau o loo faatalitalia, ona maua tuusaʻo mai lava i le Atua lona tofiga e auauna ai o se Tupu ma o le Ositaulaga foʻi!—Kenese 14:17-20.

¹⁴ I le faagasologa o tausaga, sa faaaogā ai e Ieova ana perofeta e faia mai ni faaaliga atili o mea e faatatau i lana mealilo paia. Mo se faaaʻoaʻoga, na faaalia mai e Isaia faapea, o le a maliu le  fanau i se maliu faataulaga. (Isaia 53:3-12) Na valoia e Mika le nofoaga o le a fanau mai ai le Mesia. (Mika 5:2) Na valoia foʻi e Tanielu le taimi tonu o le a aliaʻi mai ai le fanau ma le taimi e maliu ai.—Tanielu 9:24-27.

15, 16. (a) Na faapefea ona ʻfanau mai le Alo o Ieova i se fafine’? (e) O le ā na tuufaasolo iā Iesu mai ona mātua faaletagata, ma o anafea na ia taunuu mai ai o le fanau o le folafolaga?

¹⁵ Na tumau pea ona avea o se mealilo le auala o le a faataunuuina ai nei valoaga, seʻia oo ina matuā aliali lelei mai le fanau. Ua faapea mai le Kalatia 4:4: “Ua oo atu i le faaatoaga o tausaga, ona auina mai lea e le Atua o lona Alo, na fanau i le fafine.” I le tausaga e 2 T.L.M., na taʻu atu ai e se agelu i le taupou Iutaia e igoa iā Maria e faapea: “Faauta foʻi, o le a tō oe, ma e fanauina se tama tane, e te faaigoa iā te ia o Iesu. E sili o ia, e taʻua foʻi o le Alo o le Silisili ese; e foaʻi atu e le Alii le Atua iā te ia le nofoaiga a Tavita lona tamā . . . E afio ifo le Agaga Paia i luga iā te oe, e faamalumalu ifo foʻi iā te oe le mana o le Silisili ese; o le mea lea e taʻua ai le tama paia e fanau mai, o le Alo o le Atua.”—Luka 1:31, 32, 35.

¹⁶ Mulimuli ane, ona tuua lea e Ieova le soifua o lona Alo i le lagi i le manava o Maria, ina ia mafai ai ona fanau mai Iesu i se fafine. O Maria o se fafine sa lē lelei atoatoa. Peitaʻi, e leʻi mafai ona tuufaasolo mai lona tulaga lē lelei atoatoa iā Iesu, auā o Iesu o le “Alo o le Atua.” I le taimi e tasi, sa avatua e mātua faaletagata o Iesu, o ē na tupuga mai iā Tavita, aiā iā te Ia, e lē gata o aiā faaletino ae faapea foʻi i aiā faaletulafono e avea ai o ia ma suli o Tavita. (Galuega 13:22, 23) I le papatisoga o Iesu i le 29 T.A., na faauuina ai o ia e Ieova i le agaga paia ma fetalai mai: “O loʻu Atalii pele lenā.” (Mataio 3:16, 17) Ioe, o lea ua taunuu mai le fanau! (Kalatia 3:16) Ua oo loa i le taimi e faaalia atili ai isi mea e uiga i le mealilo paia.—2 Timoteo 1:10.

17. Na faapefea ona faamalamalamaina le uiga o le Kenese 3:15?

¹⁷ A o faagasolo lana faiva, na faailoa mai ai e Iesu e faapea, o Satani, o le gata lea o loo taʻua i le Kenese 3:15, ma o le fanau  a le gata, o i latou o loo mulimuli atu iā Satani. (Mataio 23:33; Ioane 8:44) Mulimuli ane, sa faailoa mai le auala o le a nutimomoia uma ai i latou nei e faavavau. (Faaaliga 20:1-3, 10, 15) Sa faailoa mai le fafine e faapea o le “Ierusalema i lugā” po o le faletua o le Atua, lea e faasino atu i le vaega faalelagi o le faalapotopotoga a Ieova e faia aʻe i meafaiola agaga. a—Kalatia 4:26; Faaaliga 12:1-6.

18. O le ā le fuafuaga o “le feagaiga fou”?

¹⁸ Atonu o le faaaliga aupito sili lava ona mataʻina, lea na tupu i le pō a o malama le aso na maliu ai Iesu, ina ua ia taʻu atu i ona soo faamaoni e faatatau i “le feagaiga fou.” (Luka 22:20) I le pei o le feagaiga na avea ma faataʻimuaga, le feagaiga lea o le Tulafono na tuu atu iā Mose, ua faapena foʻi i lenei feagaiga fou ona aumaia ai se “malo o ositaulaga.” (Esoto 19:6; 1 Peteru 2:9) Peitaʻi, e lē faavaeina e lenei feagaiga se malo faaletino, ae o le malo faaleagaga, “le Isaraelu [a] le Atua,” ua faia atoa i soo faamaoni faauuina o Keriso. (Kalatia 6:16) O i latou nei o loo iai i le feagaiga fou, o le a galulue faatasi ma Iesu i le faamanuiaina mai o tagata!

19. (a) Aiseā e taulau ai le feagaiga fou i le aumaia o se “nuu faatupu, o ositaulaga foʻi”? (e) Aiseā ua taʻua ai Kerisiano faauuina “o le tagata fou,” ma e toʻafia i latou o le a auauna i le lagi faatasi ma Keriso?

¹⁹ Ae aiseā ua taulau ai le feagaiga fou i le aumaia o se “malo o ositaulaga” ina ia manuia ai tagata? Talu ai, na i lo le faasalaina o soo o Keriso faapea o ni tagata agasala, ae ua faamagaloina ai a latou agasala e ala mai i lana taulaga. (Ieremia 31:31-34) Pe a taʻuamiotonuina loa i latou e Ieova, ona avea lea o i latou ma vaega o lona aiga faalelagi ma faauuina i le agaga paia. (Roma 8:15-17; 2 Korinito 1:21) O lea ua oo ai iā i latou  se “fanaufouina . . . i le faamoemoe ua ola . . . o loo teu i le lagi.” (1 Peteru 1:3, 4) Talu ai e matuā fou lenā tulaga faamamaluina i tagata, o lea ua taʻua ai Kerisiano o ē ua faauuina i le agaga, “o le tagata fou.” (2 Korinito 5:17, LT) Ua faaalia mai e le Tusi Paia e faapea, e toʻa 144,000 i latou o le a pule mai i le lagi, i le fanau a tagata ua togiolaina.—Faaaliga 5:9, 10; 14:1-4.

20. (a) O le ā le faaaliga e faatatau i le mealilo paia na faia i le 36 T.A.? (e) O ai o le a mauaina faamanuiaga sa folafola atu iā Aperaamo?

²⁰ O i latou nei faauuina, faatasi ai ma Iesu, ua avea ma ʻfanau a Aperaamo.’ b (Kalatia 3:29) Na muamua filifilia tagata Iutaia faaletino. Peitaʻi, i le 36 T.A., na faaalia mai ai se isi vala o le mealilo paia: O tagata o Nuu Ese, po o i latou e lē ni Iutaia, o le a mauaina foʻi le faamoemoe faalelagi. (Roma 9:6-8; 11:25, 26; Efeso 3:5, 6) Pe o le a na o Kerisiano faauuina ea e mauaina faamanuiaga sa folafola atu iā Aperaamo? E leai, auā o le taulaga a Iesu e aogā mo le lalolagi uma. (1 Ioane 2:2) Mulimuli ane, na faailoa mai ai e Ieova e faapea, pe a oo mai le iʻuga o le faiga o mea a Satani, o le a faasaoina ai se “motu o tagata e toʻatele” e lē mafaitaulia e se tasi. (Faaaliga 7:9, 14) E lē mafaitaulia isi o le a toe faatutūina aʻe ma le faamoemoe o le ola e faavavau i le Parataiso!—Luka 23:43; Ioane 5:28, 29; Faaaliga 20:11-15; 21:3, 4.

21, 22. I ā auala ua faaalia mai ai le atamai o Ieova e ala i lana mealilo paia?

²¹ O le mealilo paia o se faailoaga mataʻina o “le poto uiga eseese o le Atua.” (Efeso 3:8-10) Maʻeu se atamai ua faaalia mai e Ieova i le fuafuaina o lenei mealilo, faapea foʻi i le faasolosolo mālie ona faailoa mai! Sa ia manatunatu loloto ma le atamai i tulaga e gata mai ai le mafai o tagata, ma tuu atu iā i latou e faaalia atu mea moni o i o latou loto.—Salamo 103:14.

 ²² Sa faaalia foʻi e Ieova le lē mafaatusalia o lona atamai, i lona filifilia lea o Iesu e fai ma Tupu. E sili atu ona maufaatuatuaina le Alo o Ieova na i lo se isi lava foafoaga ola o loo iai. A o soifua Iesu o se tagata e iai le toto ma aano, na fesagaʻi o ia ma le tele o puapuaga. Ua malamalama lelei o ia i faafitauli o tagata. (Eperu 5:7-9) Ae faapefea i latou o le a pule lagolago atu iā Iesu? A o faagasolo senituri, ua faauuina ai tane ma fafine o ē na filifilia mai ituaiga uma, o gagana, ma talaaga. E mautinoa lava le tele o faafitauli sa fetaiaʻi ma i latou nei, ma manumālō mai ai. (Efeso 4:22-24) O le a avea o se fiafiaga le ola ai i le taʻitaʻiga a nei tupu ma ositaulaga agaalofa!

23. O le ā le faaeaga ua iai i Kerisiano i le fesootaʻi atu ma le mealilo paia a Ieova?

²³ Na tusi mai Paulo e faapea: “O le mealilo lea, sa natia talu mai i augātagata ma tupulaga ua mavae . . . ua faaalia mai ai i ona tagata paia.” (Kolose 1:26) Ioe, ua oo nei ina malamalama le ʻaupaia faauuina a Ieova i le tele o mea e uiga i le mealilo paia, ma ua latou tufa atu lenā malamalama i le faitau miliona o tagata. Maʻeu se faaeaga ua iā i tatou uma! “Ua faailoa mai iā te i tatou [e Ieova] le mealilo sa i lona finagalo.” (Efeso 1:9) Seʻi o tatou tufa atu lenei mealilo ofoofogia i isi, ma fesoasoani atu ina ia latou malamalama foʻi i le atamai silisili o Ieova le Atua!