Lesona 11

O Talitonuga ma Tū e Lē Fiafia i ai le Atua

O ā ituaiga talitonuga ma aganuu e sese? (1)

Pe tatau ona talitonu Kerisiano o le Atua o se Tolutasi? (2)

Aisea e lē faamanatu ai e Kerisiano moni le Kirisimasi, Eseta, po o aso fanau? (3, 4)

Pe e mafai ona faaleagaina e ē ua maliliu ē o ola? (5) Pe na maliu Iesu i luga o se koluse? (6) O le ā le tāua o le faafiafiaina o le Atua? (7)

1. E lē o talitonuga uma ma aganuu e leaga. Ae e lē taliaina e le Atua pe afai e tupuga mai i lotu sese po o le feteenai foi ma aʻoaʻoga a le Tusi Paia.​—Mataio 15:6.

2. Tolutasi: Pe o se tolutasi Ieova​—e tolu peresona i le Atua e toatasi? E leai! O Ieova o le Tamā, e na o ia lava “le Atua moni e toatasi.” (Ioane 17:3; Mareko 12:29) O Iesu o lona Alo ulumatua, ma e usiusitai atu o ia i le Atua. (1 Korinito 11:3) E sili le Tamā i lo le Alo. (Ioane 14:28) O le agaga paia e lē o se peresona; o le mana galue o le Atua.​—Kenese 1:2; Galuega 2:18.

3. Kirisimasi ma le Eseta: Sa lei fanau Iesu ia Tesema 25. Na fanau mai o ia ia Oketopa 1, i se vaitau o le tausaga na tausia ai e leoleo mamoe a latou lafu i le fanua i le po. (Luka 2:8-12) Sa lei faatonuina lava e Iesu ia Kerisiano ina ia faamanatu lona fanau mai. Nai lo le faamanatuina o lona fanau mai, na ia fetalai atu i ona soo ina ia faamanatu, pe ia manatua lona maliu. (Luka 22:19, 20) O le Kirisimasi ma ona tū e faapogaia mai i lotu sese anamua. E faapena foi i tū o le Eseta, e pei o le faaaogaina o fuamoa ma lapiti. Sa lei faamanatuina e uluai Kerisiano le Kirisimasi po o le Eseta, e lē faia foi e Kerisiano moni i aso nei.

4. Aso Fanau: E na o le lua aso fanau o loo taʻua i le Tusi Paia na faamanatuina, o aso fanau o tagata sa lei tapuai ia Ieova. (Kenese 40:20-22; Mareko 6:21, 22, 24-27) Sa lei faamanatuina e uluai Kerisiano ni aso fanau. O le aganuu  o le faamanatuina o aso fanau e tupuga mai lea i lotu sese anamua. E foai atu e Kerisiano moni meaalofa ma e iai nisi taimi e fiafia faatasi ai a o faagasolo le tausaga.

5. Mataʻu i Ē ua Maliliu: O ē ua maliliu e lē mafai ona latou faia pe toe lagonaina se mea. E lē mafai ona tatou fesoasoani atu ia i latou, ma e lē mafai foi ona latou faaleagaina i tatou. (Salamo 146:4; Failauga 9:5, 10) E mafai ona oti le agaga pe a oti le tino. (Mataio 10:28; Esekielu 18:4) Peitai o nisi taimi, o agelu amioleaga, e taʻua o temoni, e faatagā faafoliga o agaga o ē ua maliliu. O so o se aganuu lava e fesootai atu i le matataʻu i ē ua maliliu po o le tapuai atu i ē ua maliliu e sese.​—Isaia 8:19.

6. Koluse: Sa lei maliu Iesu i luga o se koluse. Na maliu o ia a o tautau i se pou, po o se laau saʻo. O le upu Eleni ua faaliliuina o le “koluse” i le tele o Tusi Paia, o lona uiga e na o se fasi laupapa e tasi. O le faatusa o le koluse e tupuga mai i lotu sese anamua. Sa lei faaaogaina pe na tapuai atu uluai Kerisiano i le koluse. O lea, pe e te manatu ea e saʻo le faaaogaina o se koluse i le tapuaiga?​—Teuteronome 7:26; 1 Korinito 10:14.

7. Atonu e faigata tele ona lafoaia nisi o nei talitonuga ma aganuu. Atonu e taumafai tauaiga ma uo e tauanauina oe ia aua neʻi suia ou talitonuga. Ae o le faafiafiaina o le Atua e sili lea ona tāua nai lo le faamalieina o tagata.​—Faataoto 29:25; Mataio 10:36, 37.

[Ata i le itulau 22]

E lē o se Tolutasi le Atua

[Ata i le itulau 23]

O le Kirisimasi ma le Eseta e tupuga mai i lotu sese anamua

[Ata i le itulau 23]

E leai se mafuaaga e tapuai atu ai i ē ua maliliu po o le matataʻu ai fua ia i latou