Lesona 13

E Mafai Faapefea Ona E Mauaina le Lotu Moni?

Pe e talia e le Atua lotu uma, pe e na o le tasi le lotu na te taliaina? (1)

Aisea ua tele ai lotu o faapea mai o lotu Kerisiano? (2)

E mafai faapefea ona e iloaina Kerisiano moni? (3-7)

1. Na amataina e Iesu le lotu Kerisiano moni e tasi. O lea, i aso nei, e tatau ona tasi le tino po o le vaega o tagata, o ē tapuai moni ia Ieova le Atua. (Ioane 4:23, 24; Efeso 4:4, 5) Ua aʻoaʻo mai e le Tusi Paia e faapea e toaitiiti tagata o loo ui i le ala va apiapi e tau atu i le ola.​—Mataio 7:13, 14.

2. Ua valoia mai e le Tusi Paia e faapea pe a mavae le maliliu o aposetolo, o le a sosolo mālie mai aʻoaʻoga sese ma faiga e lē faa-Kerisiano i totonu o le faapotopotoga Kerisiano. O le a tosina ese mai e tagata ia ē talitonu ina ia mulimuli atu ia i latou nai lo le mulimuli atu ia Keriso. (Mataio 7:15, 21-23; Galuega 20:29, 30) O le pogai lea ua tatou vaaia ai le tele o lotu eseese o loo faapea mai o lotu Kerisiano. E mafai faapefea ona tatou iloaina Kerisiano moni?

3. O le faailoga e sili ona mataina o Kerisiano moni o le iai lea ia i latou o le fealofani moni. (Ioane 13:34, 35) E lē o aʻoaʻoina i latou ina ia manatu e sili atu lo latou lelei i lo tagata o isi ituaiga po o isi lanu. E lē o aʻoaʻoina foi i latou ina ia ʻinoʻino atu i tagata o isi atunuu. (Galuega 10:34, 35) O lea e lē auai i latou i taua. O Kerisiano moni e feagai ma isi e pei o ni uso ma tuafāfine.​—1 Ioane 4:20, 21.

4. O le isi faailoga o le lotu moni o le iai lea i ona sui le faatāuaina o le Tusi Paia. Latou te taliaina o le Afioga a le Atua ma talitonu i mea o fai mai ai. (Ioane 17:17; 2 Timoteo 3:16, 17) Latou te faatāuaina le Afioga a le Atua nai lo manatu po o aganuu a tagata. (Mataio 15:1-3, 7-9) E taumafai i latou e ola aʻe o latou olaga e tusa  ai ma le Tusi Paia i aso taitasi. O lea, latou te faatinoina ai mea lava ia o loo latou talaʻia.​—Tito 1:15, 16.

5. E tatau foi i le lotu moni ona faatāuaina le suafa o le Atua. (Mataio 6:9) Na faailoa atu e Iesu le suafa o le Atua, o Ieova, i isi. E tatau foi ona faia faapea e Kerisiano moni. (Ioane 17:6, 26; Roma 10:13, 14) O ai tagata o i lou nuu o faapea ona latou taʻu atu i isi le suafa o le Atua?

6. E tatau i Kerisiano moni ona talaʻia le Malo o le Atua. Sa faia faapea e Iesu. E talanoa atu o ia e lē aunoa e faatatau i le Malo. (Luka 8:1) Na ia faatonuina ona soo e talaʻi atu lenei lava feau e tasi i le lalolagi uma. (Mataio 24:14; 28:19, 20) E talitonu Kerisiano moni e na o le Malo o le Atua o le a na aumaia le filemu moni ma le saogalemu i luga o lenei lalolagi.​—Salamo 146:3-5.

7. E tatau i soo o Iesu ona lē avea ma vaega o lenei lalolagi amioleaga. (Ioane 17:16) E lē aafia i latou i mataupufai faapolotiki ma fefinauaiga i mataupu faalauaitele a le lalolagi. Latou te ʻaloese mai i amioga, o faiga, ma uiga e faaleagaina ai ua matuā taatele i le lalolagi. (Iakopo 1:27; 4:4) Pe e mafai ona e mātauina ma iloa se vaega faalelotu o i lou nuu o loo iai nei faailoga e iloa ai Kerisiano moni?

[Ata i le itulau 26, 27]

O Kerisiano moni e fealofani, e faatāuaina le Tusi Paia, ma talaʻia le Malo o le Atua