Mataupu 125

Sa Tiga i Luga o le Satauro

NA TAʻITAʻIINA atu tagata faomea e toalua faatasi ma Iesu ina ia faaooina i ai le sala. Sa gata mai le solo i le mea e taʻua o Kolokota, po o le Mea sa iai le Ulupoo, e lē mamao atu mai le aai.

Na saei ese ofu o pagota. Ona aumai ai lea o le uaina sa faafefiloi ma le muro. Atonu na saunia e fafine o Ierusalema lea uaina, ma sa lē taofia e ʻau a Roma le tuuina atu o se inumaga o lenei vaiinu oona e faateʻa ai tiga i a i latou sa faasatauroina. Ae peitai, ina ua tofo i ai Iesu, sa musu o ia e taumafa ai. Aisea? E mautinoa lava sa manao o ia e pulea atoatoa ona mafaufauga uma a o faia lenei tofotofoga aupito sili o lona faatuatua.

Na taoto faasasaʻo Iesu i luga o le satauro ma ona aao na tuu i luga aʻe o lona ao. Ona tutuʻi loa lea e fitafita fao uumi i ona lima ma ona vae. Na femigoiai o ia i le tiga a o ati atu fao i aano ma uaua o sooga o lona tino. Ina ua faatu saʻo le satauro, sa atili ai ona matuā tetele le tiga, ona o le mamafa o le tino na masaesae ai aano na manunuʻa i fao. Peitai, na i lo le faamataʻuina ai, sa tatalo Iesu mo fitafita Roma: “Loʻu Tamā e, ia e faamagaloina atu i a te i latou; auā ua latou lē iloa le mea ua latou faia.”

Na tusia e Pilato se faailoga i luga o le satauro sa faitauina faapea: “O Iesu le Nasareta, o le Tupu o Tagata Iutaia.” Atonu sa ia tusia lena mea ona e lē gata sa faaaloalo o ia i a Iesu, ae ona o lona inoino foi i le au ositaulaga Iutaia ona o lo latou faamalosia o ia e tuuina atu le faasalaga oti i a Iesu. Ina ia mafai e tagata uma ona faitau i le faailoga, sa tusia ai e Pilato i gagana e tolu—i le faa-Eperu, i le gagana Latina a le malo, ma i le gagana lautele a Eleni.

Na faateʻia le au faitaulaga sili, e aofia ai Kaiafa ma Ana. O lena faalauiloaga mautinoa sa faaleagaina ai lo latou manumalo. O le mea lea na latou tetee atu ai: “Aua e te tusi, ‘O le Tupu o Tagata Iutaia’; a ia faapea, Ua fai mai o ia, ‘O aʻu o le Tupu o Tagata Iutaia.’” I le tiga ona o le faaaogaina o ia e le au ositaulaga, na tali maumauai atu ai Pilato ma le inoino: “O le mea ua ou tusia, ua ou tusia lava.”

Sa faapotopoto atu loa le au ositaulaga, faatasi ma le motu o tagata e toatele, i le mea na faia ai le faasalaga oti, ma sa taumafai le au ositaulaga e faafitia le faamaoniga o le faailoga. Na latou toe fai atu le molimau pepelo lea na tuuina atu muamua i faamasinoga na faia e le au Saniterini. O lea, sa lē o se mea e ofo ai, ina ua amata ona upuleaga ē na ui ane, sa lialiaʻi o latou ulu i le faatauemu ma faapea atu: “O oe na, o lē lepeti i le malumalu, ma toe faia i aso e tolu, inā faaola ia oe i a te oe. Afai o oe o le Alo o le Atua, inā alu ifo ia i lalo mai le satauro.”

Na aufaatasi le au ositaulaga ma o latou soʻo faalotu ma faapea atu: “Na ia faaolaina isi tagata, ae e lē mafaia e ia ona faaola i a te ia. O le Tupu o Isaraelu o ia, inā alu ifo ia nei lava o ia ai le satauro, ona tatou talitonu ai lea i a te ia. Na faatuatua ia i le Atua, inā laveai mai nei ia o Ia i a te ia, pe afai e finagalo o Ia i a te ia; auā na ia fai mai, ‘O aʻu o le Atalii o le Atua.’”

I le taaʻina i lea lava agaga, na faatauemu atu ai foi fitafita i a Iesu. Sa latou ofo atu ma le aamu le uaina oona i a te ia, na foliga na tuuina atu i ona laugutu ua mamago. Sa latou taufaifai atu: “Afai o oe o le tupu o tagata Iutaia, inā faaola ia oe i a te oe.” E oo foi i faomea—o le tasi na faasatauro i le itu taumatau o Iesu, ma le isi i lona itu agavale—sa faatauemu i a te ia. Seʻi manatu i lenei mea! O le tagata aupito silisili o ē uma na soifua mai, ioe, o lē na aufaatasi ma Ieova le Atua i le foafoaina o mea uma lava, ae sa matuā tigaina lava ma le onosai i na faiga leaga uma!

Na aveina e fitafita le ofutele o Iesu ma latou vaevaeina i vaega e fa. Sa latou faia ni vili ia iloa ai po o ai e fai mana na mea. Ae peitai, sa leai se sooga o lona ofutino, na faia i le ie sa sili ona lelei. O lea na fetautalatalai ai fitafita: “Aua tatou te saeia, ae seʻi tatou fai ai le vili, po o ai lē fai mona.” I lea, sa latou faataunuu ai ma le lē iloa le mau na faapea mai: “Ua latou tufatufaina oʻu ofu i a te i latou, ua latou faia foi le vili i loʻu ofu tino.”

Mulimuli ane, na oo ina talisapaia e le tasi o tagata faomea faapea o Iesu moni lava o se tupu. O lea la, na ia faasaʻoina ai lana aumea, i lona faapea atu: “E te lē mataʻu ea i le Atua, ina ua tatou sala faatasi ma ia? Ua tonu lava la ta sala; auā ua tauia mai i taʻua e tusa ma mea na ta faia; a o ia nei, e leai se mea e lē tusa na faia e ia.” O lea, na ia fai atu ai i a Iesu, i lana olega: “Ia e manatua mai aʻu, pe a e afio mai i lou malo.”

Na tali atu Iesu: “E moni, ou fai atu i a te oe i le asō, o le a ta faatasi ma oe i le Parataiso.” O le a faataunuuina lenei folafolaga pe a pule Iesu e avea o se Tupu i le lagi ma toe faatuina lenei pagota ua salamō i le ola i luga o le lalolagi i le Parataiso lea o le a maua ai e i latou o le a faasaoina atu i a Amaketo faatasi ma a latou aumea le faaeaga o le atiina aʻe o lea Parataiso. Mataio 27:33-44; Mareko 15:22-32; Luka 23:27, 32-43; Ioane 19:17-24.

▪ Aisea na musu ai Iesu e inu le uaina na palu faatasi ma le muro?

▪ Aisea atonu na tuuina ai le faailoga i luga o le satauro o Iesu, ma o le ā le felafolafoaiga na muamua ona faia i le va o Pilato ma le au ositaulaga sili?

▪ O ā upu leaga sa fai atu atili i a Iesu i luga o le satauro, ma o le ā e foliga sa uunaiaina ia mea?

▪ Na faapefea ona faataunuuina le valoaga i le mea na faia i ofu o Iesu?

▪ O le ā se suiga na faia e se tasi o tagata faomea, ma o le a faapefea ona faataunuuina e Iesu lana olega?