Mataupu 71

Sa Lē Fia Talitonu Faresaio

NA FEFEFE mātua o le tagata ʻaisi sa tauaso ina ua amia i laua i luma o le au Faresaio. Sa la iloa ua iʻu le filifiliga e faapea, so o se tasi e faaalia le faatuatua i a Iesu o le a tuliesea mai le sunako. O le faamutaina o sea mafutaga faaleuso ma isi i totonu o le nuu, e mafai ona aumaia ai ni tulaga e sili ona faigata, ae maise lava i se aiga matitiva. O lea na matuā faaeteete ai lava mātua.

Sa fesili atu le au Faresaio: “O la oulua tama ea lenei lua te fai mai ai, sa tauaso talu ona fanau mai? Pe ua faapefea ona vaai nei?”

Na faamautinoa ane e ona mātua: “Ua ma iloa o la ma tama lenei, na tauaso foi ina o fanau mai. Ae ma te leʻi iloa pe na faapefea ona vaai nei; ma te leʻi iloa foi po o ai na faapupulaina ona mata.” Ma le mautinoa lava, sa taʻu i ai e le la tama le mea na tupu, peitai sa faapea ane ma le faautauta ona mātua: “Ua matua o ia, ia outou fesili atu i a te ia, e tautala mai lava ia.”

O le mea lea, na toe valaauina ai le tama e le au Faresaio. Sa latou taumafai loa e faamatau i a te ia i lea taimi, i lo latou faailoa atu e faapea ua uma ona latou aoaoina ni faamaoniga o solitulafono a Iesu. Na latou faatonu atu foi: “Avatu ia le viiga i le Atua. Ua matou iloa o se tagata agasala lena tagata.”

Sa leʻi faafitia e le tagata na tauaso la latou tuuaiga i lona faapea ane: “Ou te lē iloa pe se tagata agasala o ia.” Peitai na ia faaopoopo ane: “Na pau le mea ou te iloa, sa oʻu tauaso, a o lea ua ou vaai.”

I lo latou taumafai e saili se sese i lana molimau, na toe fesili atu ai le au Faresaio: “Pe se ā se mea na ia faia i a te oe? Na faapefea ea ona ia faapupulaina ou mata?”

Na faitio ane le tamaloa: “Ua uma ona ou taʻu atu i a te outou, ae tou te leʻi faalogo mai lava. Pe se ā le mea tou te toe fia faalogo mai ai?” Ona ia fesili faaonoono ane lea, “Tou te lē mananao ea foi e fai outou mona soʻo?”

O le tali lena sa matuā feita ai le au Faresaio. Ua latou faapea atu: “O oe o lona soʻo, a o i matou nei o soʻo o Mose. Ua matou iloa na fetalai mai le Atua i a Mose; a o lena tagata matou te lē iloa pe mai fea o ia.”

Ona o lona maofa tele, na tali atu lenei tagata ʻaisi faatauvaa: “O le mea e ofo ai lenei, ina ua lē iloa e outou pe mai fea o ia, a ua ia faapupula mai i oʻu mata.” O le ā se faaiuga e tatau ona maua mai i lenei mea? Na faasino atu e le tagata ʻaisi i se faamaoniga aloaia e faapea: “Ua tatou iloa e lē faafofoga le Atua i ē agasala; ae peitai a mataʻu se tasi i le Atua ma faia lona finagalo, ona faafofoga mai lea o ia i a te ia. E leʻi faalogo lava talu mai le vavau, o faapupulaina mata o se tasi o lē na fanau mai o tauaso.” O lea, sa manino ai lava le faaiuga: “Ana lē mai le Atua lena tagata, na te lē mafai ona faia o se mea e tasi.”

Sa leʻi tali atu le au Faresaio i lena upu moni manino toe faigofie. Sa leʻi mafai ona latou talia le upu moni, ma o lea na latou upu vale ai i le tagata e faapea: “Na fanau mai oe ua tumu i le agasala, e te aʻoaʻo mai ea i a te i matou?” Ona latou tulia ai lea o le tagata i fafo, e foliga mai sa faateaina o ia mai le sunako.

Ina ua faafofoga Iesu i le mea na latou faia, ona ia sailia ai lea o le tamaloa ma fetalai atu i ai: “Po ua e faatuatua ea i le Atalii o le tagata?”

Na tali ane le tagata ʻaisi sa tauaso: “Le Alii e, o ai ea o ia, ina ia ou faatuatua i a te ia?”

Sa tali atu Iesu: “O lē o loo tautala atu i a te oe, o ia lena.”

Na ifo atu loa le tamaloa i luma o Iesu ma faapea atu: “Le Alii e, ou te faatuatua i a te ia.”

Ona faamatala atu lea e Iesu: “O le faamasinoga lenei na ou sau ai i le lalolagi nei: ina ia vāai i latou o ē lē vaavaai, ia faatauasoina foi i latou o ē vaai.”

O lea, na fesili atu ai le au Faresaio o ē sa faalogologo ane: “O i matou foi ua tauaso ea i matou?” Ana fai latou te iloa sa tauaso faalemafaufau i latou, semanu e maua ai se faamolemolega mo lo latou tetee i a Iesu. E pei ona taʻu atu e Iesu i a te i latou: “Ana tauaso outou, po ua leai sa outou agasala.” Peitai sa latou tausisi pea ma le loto maaa e lē o i latou o ni tauaso, ma latou te lē manaomia se faamalamalamaga faaleagaga. O lea na fetalai atu ai Iesu: “O lenei o loo faapea outou, matou te vaai; o lea e tumau ai pea la outou agasala.” Ioane 9:19-41.

▪ Aisea na fefefe ai mātua o le tagata ʻaisi sa tauaso ina ua amia i laua i luma o le au Faresaio, ma sa faapefea ona la tali ane ma le faaeteete?

▪ Sa taumafai faapefea le au Faresaio e faamatau le tagata sa tauaso?

▪ O le ā le faamatalaga moni a le tagata na matuā feita ai le au Faresaio?

▪ Aisea sa leai ai se faamolemolega mo le tetee a le au Faresaio i a Iesu?