Mataupu 106

Sa Faaalialia e Ala i Tala Faatusa i le Tovine

SA IAI Iesu i le malumalu. Na seʻi faatoʻā uma lava ona ia faamasiasia le au taʻitaʻi lotu o ē na tāpā i le fia iloa, po o le pule a ai na ia faia ai na mea. A o fenuminumiaʻi pea, sa fesili atu Iesu: “Pe ni ā fa outou?” Ma e ala i se tala faatusa, na ia faaalia ai i a i latou le ituaiga o tagata sa iai moni i latou.

Na fetalai atu Iesu: “Sa iai i se tasi tagata le fanau e toalua. Na alu atu o ia i le ulumatua, ma ia fai atu, ‘Loʻu atalii e, seʻi e alu atu i le asō e galue i le tovine.’ I le tali atu na faapea atu ia lenei, ‘O le a ou alu,’ ae leʻi alu o ia. Ua faalatalata atu i lona lua, ua fai atu foi e ia le upu na muai fai atu ai. I le tali mai na faapea mai ai ia lenei, ‘Ou te lē alu.’ Ae mulimuli ane sa salamō o ia ma alu.” Na fesili atu Iesu: “O lē fea o le toalua lenei na faia le finagalo o lona tamā?”

Na tali mai i latou o ē sa tetee i a te ia: “O lona lua.”

O lea na faamatala atu ai e Iesu: “E moni, ou te fai atu i a te outou, E muamua atu telona ma fafine talitane i a te outou i le malo o le Atua.” O le uiga, na muai mumusu le au ao lafoga ma fafine talitane, e auauna i le Atua. Ae i le pei o le atalii lona lua, na salamō i latou ma auauna i a te ia. I le isi itu, o taʻitaʻi lotu, sa pei o le atalii muamua, na faapea mai e auauna i le Atua, peitai, e pei ona faailoa atu e Iesu: “Na sau Ioane [le Papatiso] i a te outou i le ala o le amiotonu, ae tou te leʻi talitonu i a te ia; a ua talitonu i a te ia telona ma fafine talitane; a o outou ua outou iloa foi lenei mea, ae leʻi salamō outou, ina ia talitonu ai i a te ia.”

Na sosoo ai ma le faaalia e Iesu faapea o le faatamala o nei taʻitaʻi lotu sa lē na o le tuulafoaia o le auaunaga i le Atua. E leai, ae ona o i latou moni lava o ni tagata amio leaga. Na faamatala atu e Iesu: “O le tasi matai, na fai le tovine, ua ia siosioina i le pa, ua eli ai le soligāvine, ua faia foi le ʻolo, ua tuuina atu e ia i ē galulue i vine, ona alu malaga ai lea o ia i le nuu ese. Ua latalata ona po e matua ai le fuata, ona aauina atu ai lea e ia o ana auauna i ē galulue i vine, ia maua ona fua. Ona pupue ai lea o ē galulue i vine i ana auauna, ua latou sasa i le tasi, ma fasioti le isi, ma fetogi le tasi i maa. Ona toe aauina atu ai lea e ia o isi auauna e sili ona toatele i ē na muamua; a ua faapea lava a latou amio i a te i latou.”

O “auauna,” o perofeta ia na aauina atu e le “matai,” o Ieova le Atua, i “ē galulue i vine” i lana “tovine.” O nei tagata galulue vine o sui taʻitaʻi o le nuu o Isaraelu, o le nuu lea sa faaalia e le Tusi Paia faapea o le “tovine” a le Atua.

Talu ai sa agaleagaina ma fasiotia e “ē galulue i vine” ia “auauna,” na faamatala atu ai e Iesu: “Mulimuli ane ua auina atu ai e ia [lē e ona le tovine] o lona atalii i a te i latou, ua faapea ane, ‘Latou te āva mai i loʻu atalii.’ A o ia tagata galulue i vine, ua iloa atu lona atalii, ona latou fetautalatalaai ai lea, ‘O le suli lenei; ō mai ia, tatou te fasiotia o ia, ae fai mo i tatou lona fanua.’ Ona latou pue ai lea i a te ia, ua lafo i a te ia i tua o le tovine, ona latou fasiotia ai lea.”

Na fetalai atu Iesu i taʻitaʻi lotu, ua fesili atu: “Pe a sau le alii e ona le tovine, se ā se mea na te faia i na tagata galulue i vine?”

Fai mai la latou tali: “E matuā faaumatia e ia na tagata amio leaga, ona tuuina atu ai lea e ia o le tovine i nisi tagata galulue i vine, latou te avatu i a te ia ona fua i ona tausaga.”

I lea, na faia ai ma le lē iloa e taʻitaʻi lotu le iuga o le faamasinoga mo i latou, talu ai ona sa aofia i latou i “ē galulue i vine” o le “tovine” faalemalo a Ieova o Isaraelu. O fua sa faatalitalia e Ieova mai na tagata galulue i vine, o le faatuatua lea i lona Alo, le Mesia moni. Ona sa latou lē taulau ona fuaina mai o na fua, na lapatai atu ai Iesu: “Tou te leʻi faitaulia lava ea i Tusi [Salamo 118:22, 23], ‘O le maa na lafoaiina e tufuga fai fale, ua fai lea ma maa tulimanu aupitoaluga; o le mea lea na faia e le Alii, tatou te ofo ai pe a vaavaai atu i ai.’ O le mea lea ou te fai atu ai i a te outou, E aveesea le malo o le Atua i a te outou, ae tuuina atu i se nuu e aumai ai ona fua. O sē paʻū foi i luga o lea maa, e gaugau ai o ia; a o se tasi e paʻū ifo i ai le maa, e nutipalaina ai o ia.”

Ona iloa ai lea e tusiupu ma faitaulaga sili, sa fetalai atu Iesu e faatatau i a i latou, ma sa latou mananao ai e fasioti i a te ia, le “suli,” moni. O lea, na aveesea ai le faaeaga o le avea ma pule o le Malo o le Atua mai i a i latou o se nuu, ae ua foafoaina se nuu fou ‘o ē galulue i le tovine,’ se nuu o le a fua mai ai ni fua tatau.

Ona o le fefefe o taʻitaʻi lotu i le motu o tagata, o ē sa manatu i a Iesu o le perofeta, na latou lē taumafai ai e fasiotia o ia i lena lava taimi. Mataio 21:28-46; Mareko 12:1-12; Luka 20:9-19; Isaia 5:1-7.

▪ O ai sa fai ma sui o le fanau e toalua i le uluai tala faatusa a Iesu?

▪ O ai sa fai ma sui o le “matai,” le “tovine,” o “ē galulue i vine,” o “auauna,” ma “le suli” i le tala faatusa lona lua?

▪ O le ā na tupu i ē ‘galulue i le tovine,’ ma o ai ua suia i latou?