Mataupu 72

Sa Aauina atu e Iesu le Toʻa 70

UA OO i le tau e afu ai mea i le 32 T.A., o le tolu ai lea o tausaga atoatoa talu mai le papatisoga o Iesu. Faatoʻā mavae atu lava ona latou auai ma ona soʻo i le Tausamiga o Faleapitaga i Ierusalema, ma atonu sa latou iai pea i se nofoaga e lē mamao ese. O le mea moni, sa faaaluina e Iesu se taimi tele o le ono masina na totoe o lana faiva, a lē i Iutaia, o le isi itu e latalata ane o le Vaitafe o Ioritana i le itumalo o Perea. Sa manaomia foi ona talaʻia lena oganuu.

E moni, ina ua mavae le Paseka i le 30 T.A., na faaaluina ai e Iesu le tusa o le valu masina ina ia talaʻi ai i Iutaia. Peitai ina ua taumafai tagata Iutaia e fasiotia o ia i inā i le Paseka o le 31 T.A., sa ia faaaluina ai le isi tausaga ma le ʻafa e aʻoaʻo atu ai e toetoe lava i na o Kalilaia. I lena taimi, na ia atiina aʻe ai se faalapotopotoga tele o tagata talaʻi agavaa, o se mea na te leʻi ausia muamua. O lea na ia fuafuaina ai se tauiviga tele faaiu ina ia molimau atu i Iutaia.

Sa amataina e Iesu lenei tauiviga e ala i le filifilia o soʻo e toʻa 70, ma aauina atu ai i latou e taʻi toalua. O lea na maua ai le aofaiga o paga e 35, o tagata talaʻi o le Malo, e galueaiina le oganuu. Na muamua atu i latou nei ma ō i aai uma ma nofoaga uma e mautinoa sa fuafuaina e maliu atu i ai Iesu faatasi ma ona aposetolo.

Na i lo o le faasino o le toʻa 70 e ō atu i sunako, sa fetalai atu Iesu i a te i latou ina ia ō atu i aiga, i lona faamatalaina atu e faapea: “O le fale tou te ulu atu i ai, tou te muai fai atu, ‘Ia manuia le aiga nei.’ Ma afai o iai se tagata o le manuia, ia oo atu i ai la outou faamanuia.” Ae o le ā la latou feau? Sa fetalai atu Iesu: “Ia fai atu i a te i latou, ua latalata i a te outou le malo o le Atua.” E tusa ai ma le galuega a le toʻa 70, na lipotia mai e le tusi o le Matthew Henry’s Commentary e faapea: “I le pei o lo latou Matai, so o se mea lava na latou asiasi atu i ai, sa latou talaʻi atu ai i lea fale ma lea fale.”

Sa tutusa lava faatonuga a Iesu na avatu i le toʻa 70, ma faatonuga na tuuina atu i le toʻa 12 ina ua ia aauina atu i latou ia i se tauiviga o le talaʻiga i Kalilaia, e tusa o se tausaga ua tuanai atu. E lē gata ina sa ia lapataia le toʻa 70 e faatatau i teteega o le a latou fesagai, ma sauniunia i latou i le taulimaina o le feau i aiga, ae na ia tuuina atu foi i a te i latou le mana e faamaloloina ai maʻi. O lea, pe a taunuu atu Iesu i se taimi mulimuli ane, o le a toatele ai nisi e naunau e faafeiloaia le Matai, e ona soʻo, o ē sa mafai ona latou faia na mea ofoofogia.

E puupuu se taimi sa faia ai le talaʻiga a le toʻa 70 ma le galuega o le toe asia e Iesu. Sa leʻi pine ae toe foi ane i a Iesu, paga e 35 o tagata talaʻi o le Malo. Ua latou faapea atu ma le olioli: “Le Alii e, e oo lava i temoni ua usiusitai mai i a te i matou, ona o lou suafa.” E mautinoa sa faafiafiaina Iesu i lena lipoti lelei o le auaunaga, auā na ia tali atu: “Na ou iloa Satani ua paʻū ifo mai le lagi e pei o le uila. Faauta! ou te foai atu i a te outou le pule e soli ai gata ma akarava.”

Sa silafia e Iesu, pe a mavae le fanau mai o le Malo o le Atua i le taimi o le iuga, o le a tuliesea loa Satani ma ana temoni mai le lagi. Peitai i lea taimi, sa avea le tuliesea o temoni lē vaaia e nei tagata faatauvaa, e fai ma faamautinoaga faaopoopo o lena mea o loo fotuai mai. O lea la, na fetalai atu ai Iesu i le lafoina ifo o Satani mai le lagi i le lumanai, o se mea e matuā mautinoa. Ma i se uiga faafaatusa e faapea, na tuuina atu i le toʻa 70 le pule e soli ai gata ma akarava. Peitai, na fetalai atu Iesu: “Aua tou te olioli i lenei mea, ina ua usiusitai mai agaga i a te outou; a ia outou olioli ina ua tusia o outou igoa i le lagi.”

Sa matuā olioli Iesu ma viia lona Tamā i luma o le lautele ona o le faaaogāina o ana auauna faatauvaa i se auala malosi. Na faliu atu o ia i ona soʻo, ma fetalai atu i ai: “Amuia mata ua iloa mea tou te lē o iloa. Auā ou te fai atu i a te outou, e toatele perofeta ma tupu na fia matamata i nei mea ua outou iloa, a ua latou lē iloa lava; na latou fia faalogo foi i nei mea ua outou faalogo i ai, ae leʻi faalogo ai lava.” Luka 10:1-24; Mataio 10:1-42; Faaaliga 12:7-12.

▪ O fea na talaʻi atu ai Iesu i le uluai tolu tausaga o lana faiva, ma o le ā le oganuu sa ia talaʻia i le ono masina faaiu?

▪ O fea sa faasino e Iesu le toʻa 70 e maua ai tagata?

▪ Aisea na fetalai atu ai Iesu ua ia iloa Satani ua lafo ifo mai le lagi?

▪ I le ā le uiga sa mafai ai e le toʻa 70 ona solia gata ma akarava?