Mataupu 50

O Sauniuniga e Faafetaiaia ai Sauaga

INA ua uma ona faatonu e Iesu ona aposetolo i auala e faia ai le galuega talaʻi, ona ia lapatai atu lea i a te i latou e uiga i tagata tetee. Ua ia fetalai atu e faapea: “Faauta! ua ou aauina atu outou e pei o mamoe i le va o luko . . . Ia leoleo outou ona o tagata; auā o le a latou tuuina atu outou i fono a nuu, o le a latou sasa foi i a te outou i o latou sunako. E taitaiina atu foi outou i luma o kovana ma tupu ona o aʻu.”

E ui lava i sauaga ogoogo o le a fetaiai ma ona soʻo, ae na folafola atu ma le mautinoa e Iesu: “Pe a latou tuuina atu outou, aua tou te popole po o le a faapefea po o le ā foi se upu o le a outou tautala atu ai; auā o le a tuuina atu i lea lava itula se upu tou te tautala atu ai; auā e lē na o outou o le a tautala atu, ae o le agaga o lo outou Tamā o le a tautala atu mo outou.”

Sa faaauau ona fetalai atu Iesu e faapea: “E lē gata i lea, o le a tuuina atu le uso e le uso ia oti, e tuuina atu foi e le tamā lona atalii, e tutū atu foi fanau i o latou mātua ina ia fasioti i a i latou.” Na ia faaopoopo atu: “E matuā inosia foi outou e tagata uma ona o loʻu igoa; a o lē tumau seia oo i le iuga o le a faaolaina o ia.”

Sa sili lava ona tāua le talaʻiga. O le mafuaaga lena na faamamafa atu ai e Iesu le manaomia ona faautauta ina ia saoloto ai pea mo le faia o le galuega. Fai mai a ia: “Pe a latou faasaua i a te outou i se tasi aai, ia outou ō atu i se isi aai, auā e moni, ou te fai atu i a te outou, e lē soo aai o Isaraelu i a te outou seia sau le Atalii o le tagata.”

E moni sa tuuina atu e Iesu na faatonuga, o lapataiga, ma faalaeiauga i ona aposetolo e toʻa 12, ae sa faatatau foi mo i latou o ē o le a tofu sao i le talaʻiga i le lalolagi aoao pe a mavae lona maliu ma lona toetu mai. Ua faaalia lena mea i lana fetalaiga e faapea, o le a ‘inosia foi e tagata uma’ ona soʻo, ae lē na o tagata Isaraelu o ē na aauina atu le au aposetolo e talaʻi i ai. E lē gata i lea, sa manino lava e leʻi taitaiina atu le au aposetolo i luma o kovana ma tupu ina ua aauina atu i latou e Iesu i la latou talaʻiga puupuu. I le ma lea, sa leʻi tuuina atu ē talitonu i lena taimi ina ia fasiotia e o latou aiga.

O lea, ina ua ia faapea atu o le a lē soo aai i le talaʻiga faataamilo a ona soʻo “seia sau le Atalii o le tagata,” sa valoia ai e Iesu mo i tatou e faapea, o le a lē soo aai uma o le lalolagi i le talaʻiga a ona soʻo e uiga i le Malo o le Atua ua faavaeina, a o leʻi afio mai le Tupu faamamaluina o Iesu Keriso e fai ma faaoosala a Ieova i a Amaketo.

I le faaauauina o ana faatonuga mo le talaʻiga, na fetalai atu ai Iesu: “E lē sili le soʻo i lona aʻoaʻo, po o le auauna i lona alii.” O lea, e tatau ai i soʻo o Iesu ona faatalitalia le oo i a i latou o na faiga tigā ma sauaga e pei ona sa faia i a te ia ona o le talaʻiga o le Malo o le Atua. Peitai na ia apoapoai atu e faapea: “Aua foi tou te matatau i ē fasioti le tino, ae latou te lē mafaia ona fasioti le agaga; ae lelei ona outou matatau i lē e mafai ona fano i a te ia le agaga atoa ma le tino i Kena.”

Na faataatia e Iesu se faaaoaoga i lenei mataupu. Sa sili i a te ia ona onosai ma lototele e oo i le oti na i lo o lona lē faamaoni i Lē e ona le malosi uma lava, o Ieova le Atua. Ioe, e mafai e Ieova ona faaumatia le “agaga” (po o le “solu”) o se tasi (o lona uiga, o faamoemoega ia o se tasi mo le lumanai ina ia avea ai ma tagata ola) pe toe faatuina mai o ia o se tagata ina ia olioli ai i le ola e faavavau. Maeu se Tamā faalelagi e alofa mutimutivale, e pei o Ieova!

Ona sosoo ai lea ma le faamalosiau atu o Iesu i ona soʻo i se tala faatusa e faamatilatila ai le tausiga alofa a Ieova mo i latou. Ua ia fesili atu: “E lē faatauina ea ni manu iti se lua i se tupe e itiiti sona aogā? Peitai e leai so laua e paʻū i le eleele e aunoa ma le silafia e lo outou Tamā o i le lagi. Ao o outou lauulu foi ua faitaulia uma lava. O lea, aua tou te matatau: e sili ona tāua outou na i lo le tele o manu iti.”

O le feau o le Malo lea na tofia e Iesu ona soʻo ina ia folafola atu, o le a fevaevaeai ai aiga, auā e talia e nisi o le aiga ae teena e nisi. Na ia faamatala atu: “Aua neʻi outou manatu ua ou sau e avatu le filemu i le lalolagi. Na ou sau e avatu, e lē o le filemu, a o le pelu.” O le mea lea e manaomia ai ona lototele se tagata o le aiga na te talia le upu moni o le Tusi Paia. Sa faailoa atu e Iesu: “O lē ua tele lona alofa i lona tamā po o lona tinā, ae itiiti i a te aʻu, e lē aogā lea i a te aʻu, ma o lē ua tele lona alofa i lona afafine po o lona atalii ae itiiti i a te aʻu, e lē aogā lea i a te aʻu.”

Na faaiu e Iesu ana faatonuga e ala i le faapea atu, o ē latou te taliaina ona soʻo, ua latou talia foi o ia. “Ma o sē na te avane tau lava o se ipu vai malulu i se tasi o ē aupito itiiti o i latou nei e inu ai ona o ia o se soʻo, e moni, ou te fai atu i a te outou, e lē māumau lona taui.” Mataio 10:16-42.

▪ O ā lapataiga na avatu e Iesu i ona soʻo?

▪ O le ā le faalaeiauga ma le faamafanafanaga na ia tuuina atu i a i latou?

▪ Aisea ua faatatauina ai foi i Kerisiano i aso nei faatonuga a Iesu?

▪ I le ā le auala e lē sili ai se soʻo o Iesu i lo lona aʻoaʻo?