Mataupu 131

O Faailoaina mai Faaiu, ma le Penetekoso 33 T.A.

I SE taimi faapitoa, na faia ai e Iesu ni fuafuaga mo ona aposetolo uma e toʻa 11, ina ia latou feiloai ma ia i se mauga i Kalilaia. Atonu na taʻu atu foi i isi soʻo e uiga i le feiloaiga, ma e sili atu i le 500 tagata na faapotopoto ai. Sa faamaonia le fiafia o lena tauaofiaga ina ua faaali atu Iesu ma amata ona ia aʻoaʻo i a i latou!

Faatasi ai ma isi mea, na faamatala atu e Iesu i le motu o tagata e toatele faapea, na tuuina atu e le Atua i a te ia le pule uma lava i le lagi ma le lalolagi. Ona ia apoapoai atu lea: “O lea, ia outou ō atu, ma fai tagata o nuu uma lava ma soʻo, ia papatisoina i latou i le suafa o le Tamā ma le Alo ma le agaga paia, ia aʻoaʻo i latou ia tausi i mea uma lava ua ou poloai atu ai i a te outou.”

Seʻi manatunatu i ai! Sa maua uma e tane, fafine, ma tamaiti lena lava tofiga ina ia faia se sao i le galuega o le faia o soʻo. O le a taumafai tagata tetee e taofia la latou talaʻiga ma le aʻoaʻo atu, ae sa faamafanafana atu Iesu i a i latou: “Faauta! Ou te i a te outou i aso uma lava seʻi oo i le vaitaimi faaiuiu o le faiga o mea.” E faatasi pea Iesu ma ona soʻo e ala i le agaga paia, ina ia fesoasoani i a i latou e faataunuu la latou faiva.

Na faailoa atu e Iesu ia lava o loo soifua i ona soʻo mo se vaitaimi e 40 aso mulimuli ane talu lona toetu mai. I na taimi o lona faaali mai, sa ia faatonu atu ai i latou e uiga i le Malo o le Atua, ma na ia faamamafa atu i a i latou o latou tiute tauave i le avea ma ona soʻo. I se tasi o taimi na oo lava foi ina faaali atu o ia i lona ʻafa uso o Iakopo ma faamautinoa atu ai i a te ia lenei o lē sa lē talitonu muamua faapea o Ia moni lava o le Keriso.

A o iai pea le au aposetolo i Kalilaia, e foliga sa faatonu e Iesu i latou ina ia toe foi atu i Ierusalema. Ina ua feiloai ma i latou i inā, ona ia fetalai atu lea i a i latou: “Aua tou te ō ese ma Ierusalema, ae ia faatalitali pea mo le mea ua folafola mai e le Tamā, lea na outou faalogo ai mai i a te aʻu; auā o le mea moni, na papatiso Ioane i le vai, ae o le a papatisoina outou i le agaga paia, e lē o toe umi ni aso pe a mavae lenei mea.”

Mulimuli ane na toe feiloai foi Iesu ma ona aposetolo ma taʻitaʻi atu ai i latou i fafo o le aai e oo atu i Petania, lea sa tu i le malifa i sasae o le Mauga o Olive. O se mea na ofo ai, ona e ui lava i mea uma na ia fetalai atu ai e lē o toe umi se taimi ona ia tuua lea o le lalolagi mo le lagi, ae na latou talitonu pea faapea o le a faavaeina lona Malo i le lalolagi. O lea na latou fesili atu ai: “Le Alii e, o ona po nei ea e te toe fuataʻi ai le malo i a Isaraelu?”

Na i lo le toe taumafai e faasaʻo o latou mafaufauga sese, sa na ona tali atu o Iesu: “E lē o sa tou aiā le iloa o taimi ma tau ua tuu e le Tamā i lona lava finagalo.” I lea, na ia toe faamamafa atu ai le galuega sa tatau ona latou faia, i lona fetalai atu: “E maua e outou le mana pe a afio ifo i o outou luga le agaga paia, e fai foi outou ma molimau i a te aʻu i Ierusalema atoa ma Iutaia uma lava ma Samaria e oo lava i tuluʻiga o le lalolagi.”

A o latou vaavaai atu pea, ae amata loa ona siitia Iesu agaʻi i le lagi, ona punitia loa lea o ia e se ao mai la latou vaai. Ina ua uma ona faaliliueseina lona tino faaletino, ona afio aʻe loa lea o ia i le lagi o se peresona agaga. A o pulatoʻa atu pea le toʻa sefulutasi i le lagi, ae faaali ane loa ni tagata se toalua sa oofu i ofu sisina i o latou tafatafa. Ona fesili atu lea o nei agelu na liutino: “Tagata o Kalilaia e, aisea ua outou tutū ai ma vaavaai atu i le lagi? O Iesu lena ua aveina aʻe nai i a te outou i le lagi, o le a faapena lona toe afio mai, e pei ona outou vaavaai atu i ai i lona afio aʻe i le lagi.”

O le auala na tuua ai e Iesu le lalolagi sa faia e aunoa ma le faalauiloaina faalauaitele ma sa na o ona soʻo faamaoni sa latou vaavaai i ai. O lea, o le auala foi lena o le a toe afio mai ai—e aunoa ma le ilia o ni pu leo tetele ma e na o ona soʻo faamaoni foi latou te iloa lona toe afio mai ma le amata o lona faatasi mai i le mana o le Malo.

Ona ō ifo loa lea o le au aposetolo mai le Mauga o Olive, ua sopoia atu le Vanu o Ketarono, ma toe ulu atu i Ierusalema. Sa latou nonofo ai pea i inā ona o le usiusitai i le poloaiga a Iesu. I le sefulu aso mulimuli ane, i le Tausamiga faa-Iutaia o le Penetekoso 33 T.A., a o faapotopoto pe tusa ma le 120 soʻo i se potu i luga i Ierusalema, ae faafuaseʻi ona faatumuina le fale atoa i se taalili e pei o se matagi ua agi malosi mai. Sa oo ina vaaia ni laulaufaiva e pei o ni afi, ma na taitasi ma nofo i luga o i latou uma sa iai i inā, ma amata ai ona tautatala le au soʻo uma i gagana eseese. O le liligiina ifo lena o le agaga paia lea na folafola mai e Iesu! Mataio 28:16-20; Luka 24:49-52; 1 Korinito 15:5-7; Galuega 1:3-15; 2:1-4.

▪ O ai sa faia atu i ai e Iesu faatonuga faamavae i se mauga i Kalilaia, ma o ā na faatonuga?

▪ O le ā le faamafanafanaga na saunia e Iesu mo ona soʻo, ma na faapefea ona ia faatasi pea ma i latou?

▪ Mo le ā le umi na faaali ai Iesu i ona soʻo ina ua mavae lona toetu, ma o le ā sa ia aʻoaʻo i a te i latou?

▪ O ai le tagata e manino lava sa lē avea o se soʻo a o leʻi maliu Iesu, lea na faaali i ai Iesu?

▪ O ā feiloaiga faaiʻu e lua na faia e Iesu ma ona aposetolo, ma o le ā sa tupu i na feiloaiga?

▪ E faapefea ona toe afio mai Iesu i le auala lava lea e pei ona sa ia afio ese atu ai?

▪ O le ā sa tupu i le Penetekoso 33 T.A.?