Mataupu 20

Le Vavega Lona Lua a o Iai i Kana

I NA ua toe foi atu Iesu i lona nuu ina ua mavae se talaʻiga tele i Iutaia, sa leʻi malōlō o ia. Na i lo lea, na ia toe amataina se isi faiva e sili atu ona tele i Kalilaia, le nuu na ia soifua aʻe ai. Ae o ona soʻo sa toe foi atu i o latou aiga ma a latou galuega sa iai muamua, na i lo o le nonofo ai pea ma ia.

O le ā le feau sa amata loa ona talaʻi e Iesu? O lenei: “Ua latalata mai le Malo o le Atua. Inā salamō ia outou ma talitonu i le tala lelei.” Ma sa faapeī le tali ane a tagata? Na talia e tagata Kalilaia Iesu. Sa faaaloalogia o ia e tagata uma. Peitai, sa leʻi faapogaia lenei mea ona o lana feau, ae talu ai ona o le toatele o i latou sa auai i le Paseka i Ierusalema i ni masina muamua atu ma na latou vaaia ai faailoga ofoofogia sa ia faia.

E foliga mai sa amataina e Iesu lana faiva sili i Kalilaia i le nuu o Kana. Muamua lava, atonu o e manatua, i lona toe foi ane mai Iutaia, na ia faaliliuina ai suāvai e avea ma uaina, i le tausamaaga o se faaipoipoga sa faia i inā. Ae i le taimi lona lua lea, sa maʻi tele ai le atalii o se alii sili a le tupu o Herota Anetipa. Ina ua ia faalogo ua toe foi ane Iesu mai Iutaia i Kana, ona malaga mamao atu ai lea o lenei alii sili mai lona aiga i Kapanaumi e saili i a Iesu. Sa faatoga atu o ia, ma nanati atu e faapea: ‘Faamolemole seʻi maliu vave mai, manū o leʻi oti si oʻu atalii.’

Na tali atu Iesu: ‘Inā foi ia i lou fale. Ua malōlō lou atalii!’ Sa talitonu i ai le alii sili a Herota ma toe foi atu loa i se malaga umi i lona aiga. Na faafetaui mai o ia i luga o le ala e ana auauna, o ē na faataalise ane e taʻu i a te ia ua lelei mea uma—ua malōlō lona atalii! Ona ia fesili atu lea: ‘O anafea na malōlō ai o ia?’

Ua la tali ane: ‘O ananafi i le itula e 1:00 i le afiafi.’

Ona iloa ai lea e le alii sili, o le itula tonu lava lea na fetalai ane ai Iesu, ‘Ua malōlō lou atalii!’ Ina ua mavae lena mea, ona avea ai lea o le tamaloa ma lona aiga atoa ma soʻo o Keriso.

Sa avea Kana ma nofoaga faapitoa na faailogaina ai lona toe foi ane mai Iutaia, ona o inā sa faalua ona faia ai e Iesu vavega. O le mea moni, e lē ona pau na o vavega sa ia faia seia oo ane i lena taimi, ae ua mataulia ona sa faailogaina ai lona toe foi atu i Kalilaia.

Ua agaʻi atu nei Iesu i lona aiga i Nasareta. O le ā o le a tupu i a te ia i inā? Ioane 4:43-54; Mareko 1:14, 15; Luka 4:14, 15.

▪ Ina ua toe foi atu Iesu i Kalilaia, o le ā sa tupu i ona soʻo, ma sa faapefea ona talia o ia e tagata?

▪ O le ā le vavega na faia e Iesu, ma o ā ona āuga i tagata sa aafia ai?

▪ Aisea na fiafia ai Iesu i Kana?