Mataupu 22

Le Valaauina o Soʻo e Toafā

INA ua mavae se taumafaiga e fasiotia Iesu i lona lava nuu o Nasareta, ona maliu ane lea o ia i le aai o Kapanaumi e latalata i le Sami o Kalilaia. Na faataunuuina ai i lena mea se isi valoaga a Isaia. Le valoaga lea sa valoia ai e faapea, o le a vaaia e tagata Kalilaia o ē nonofo latalata i le sami se malamalama tele.

A o faaauau pea e Iesu lana galuega o le faamalamalamaina o le talaʻiga o le Malo i inā, sa ia toe maua ai ona soʻo e toafā. O i latou ia sa latou feoai muamua ae sa toe foi atu i a latou galuega o le faifaiva, ina ua latou toe taliu ane ma Iesu nai Iutaia. O lea la ua toe sailia i latou e Iesu, ona ua oo i le taimi e tatau ai ona i ai ni fesoasoani lotomau ma ia auai pea, o ē e mafai ona ia aʻoaʻoina, ina ia faaauau ona faia le faiva pe a mavae atu o ia.

Ina o savali atu Iesu i le matafaga, ma iloa atu ai Simona Peteru ma ana uo o ta o latou upega, sa ia faalatalata atu loa i ai. Ua maliu aʻe o ia i le vaa o Peteru ma fai atu i ai ina ia āloālo ese le vaa mai le matafaga. Ina ua tau mamao teisi i tai, ona nofo lea o Iesu i le vaa, ma aʻoaʻo atu i le motu o tagata o loo i le matafaga.

Mulimuli ane, ona fetalai atu lea o Iesu i a Peteru: “Inā tuutuu atu ia i le loloto, ma tuu ifo ai a outou upega ina ia maua ai ni iʻa.”

Ua tali atu Peteru: “Le Aʻoaʻo e, ua atoa le po o tigaina i matou, e leai ni mea ua maua; ae ona o lau fetalaiga ou te tuu ifo ai le upega.”

Ina ua tuutuu ifo le upega, ona latou maua ai lea o se au iʻa tele lava, ua tau masaesae ai lo latou upega. Sa vave lava ona latou genogeno atu i isi a latou uo sa i le vaa o loo latalata ane ina ia ō mai e fesoasoani. E leʻi umi ae tutumu uma nei vaa i le tele naua o iʻa ma ua tau gogoto ifo ai. Ina ua vaaia e Peteru lenei mea, ona tootuli ai lea o ia i luma o Iesu ma faapea atu: “Le Alii e, inā maliu ese ia oe i a te aʻu, auā o aʻu o le tagata agasala.”

Ua tali atu Iesu: “Aua e te fefe, e amata i nei ona po ona e maua tagata.”

Sa valaaulia foi e Iesu, Aneterea le uso o Peteru. Ua ia fetalai atu i a te i laua e faapea: “Inā mulimuli mai ia i a te aʻu, ou te faia oulua ma faifaiva i tagata.” Na faasalafa atu foi lena valaaulia i a la uo faifaiva o Iakopo ma Ioane, o atalii ia o Sepetaio, ma sa la talia foi e aunoa ma se faatuai. O lea, na tuua ai loa e i latou nei e toafā a latou galuega o le faifaiva, ae avea ma uluai soʻo e toafā o Iesu o ē e lotomau ma auai pea. Luka 5:1-11; Mataio 4:13-22; Mareko 1:16-20; Isaia 9:1, 2.

▪ Aisea na valaaulia ai e Iesu ona soʻo e mulimuli atu i a te ia, ma o ai i latou nei?

▪ O le ā le vavega na faamataʻuina ai Peteru?

▪ O le ā le ituaiga o faiva sa valaaulia e Iesu ona soʻo ina ia faia?