Mataupu 123

“Faauta i le Tagata!”

I LE maofa i uiga faaaloalo o Iesu ma le iloaina o le leai o sana agasala, sa saili ai e Pilato se isi auala e tatala ai i a te ia. Na ia taʻu atu i le motu o tagata: “O la outou tu lea, ia ou tatalaina atu i a te outou se tasi tagata i le paseka.”

O Parapa, o se fasioti tagata logologoā, sa taofia foi faapagota, o lea na fesili atu ai Pilato: “Po o ai tou te loto i ai ou te tatalaina atu i a te outou? O Parapa ea? Po o Iesu lē ua igoa i a Keriso?”

I le faatauanauina e ositaulaga sili o ē na faatupuina le vevesi, na talosaga atu ai tagata ina ia tatalaina mai Parapa ae ia fasiotia Iesu. I le lē fiu, na tali atu ai Pilato, i lona toe fesili atu: “O ai so laua tou te loto i ai ou te tatalaina atu i a te outou?”

Na latou tauvalaau atu: “O Parapa.”

Sa fesili atu ma le ofo Pilato: “Se ā foi le mea ou te faia i a Iesu o lē ua igoa i a Keriso?”

E pei o se leo e tasi lo latou tali mai ma le leo tetele: “Ia faasatauroina ia. Inā faasatauro ia, inā faasatauro ia i a te ia.”

I le iloa faapea sa latou mananao e fasioti i le tagata na lē sala, sa ole atu ai Pilato: “Se ā foi lona leaga ua na faia? Ou te leʻi iloa se mea e faasalaina ai o ia ia oti; o lea foi ou te aʻoaʻi atu ai i a te ia, i le ou tatalaina atu ai.”

E ui lava i ana taumafaiga, ae i uunaiga a taʻitaʻi lotu, sa alalaga mai ai pea lava le motu o tagata ua tumu i le ita: “Ia faasatauroina ia.” I le uunaiga tele i le ita a ositaulaga sili, na mananao ai le motu o tagata ia fasioti i a te ia. Ma seʻi manatu i le na o le lima lava aso na muamua atu, o nisi o i latou sa iai faatasi ma ē na taliaina Iesu i lona afio atu i Ierusalema o se Tupu! I lena taimi atoa uma lava, sa matuā gūgū lava soʻo o Iesu, pe afai na iai, ma sa leʻi iloa lava i latou.

Ina ua vaai atu Pilato ua lē aogā ana taumafaiga uma, na i lo lea, sa alu aʻe pea le alaga, na ia tago ai lea i le apavai ma fafano ai ona lima i luma o le motu o tagata, ma faapea atu: “Ou te mamā aʻu i le toto o lenei tagata amiotonu; faitalia lava outou.” Ua tali mai i ai tagata: “Ia i luga i a i matou, ma a matou fanau lona toto.”

O lea, ina ia tusa ai ma o latou manaoga—ma le manao e faamalieina le motu o tagata e sili atu na i lo le faia o le mea na ia iloa e tonu—na tatala atu ai e Pilato Parapa i a i latou. Na ia tuu atu Iesu i a i latou e saeia ona ofu ma sasa i a te ia. Sa lē o se sasa masani lena. Sa faamatala e le Journal of the American Medical Association le faiga faa-Roma i le sasaina:

“O le mea faigaluega sa masani ai, o se sasa puupuu (flagrum po o le flagellum) na fili faatasi i ni maea tuaiti e eseese le uumi e fafau faatasi i ai ma ni tamai polo uamea po o ni ponaivi maamaai o mamoe e nonoa faavāvā i ai. . . . A o sasaina pea ma le matuā malosi e fitafita Roma le tua o se tagata na faasalaina, o nei tamai polo uamea e faapogaia ai ni totoulia i le tino o le tagata, ma o mea matuitui na fili faatasi ai, ma ponaivi mamoe e faapogaia ai ni manuʻa loloto ma tōtō aano i le tino o le tagata. O lea, a o faaauau ona sasaina, e matuā masaesae ai lava ma tōtō aano i le tino e oo foi i musele ma maligi mai ai ni ʻaluʻalu toto i le aano o le tino.”

Ina ua uma lenei sasaina ogoogo, ona avatu ai lea o Iesu i le maota o le kovana, ma na taloina le vaegaau atoa ina ia faapotopoto ane. I inā na faafaupuʻe atu ai e fitafita isi upu faifai i a te ia e ala i lo latou faia o se pale i laau tuitui ma oomi faamalosi ifo i lona ao. Na latou tuu se ū i lona aao taumatau, ma faaofu i a te ia i se ofu violē pāuli, o le ituaiga e laei e tagata mamalu. Ona latou tauemu atu lea i a te ia: “Talofa, le tupu o tagata Iutaia!” Sa latou tuufeanu atu foi i a te ia ma po atu i ona fofoga. Na latou toe avea le ū malosi sa i lona aao, ma faaaogā e taia ai o ia i lona ao, na matuā loloto atu na oo i le ipu o lona ao le maamaai o laau tuitui sa faia ai le “pale” o lona faalumaina.

O le mamalu uigaese ma le malosi o Iesu i le feagai ai ma lena faiga leaga sa matuā maofa ai lava Pilato, o lea na uunaia ai o ia e toe faia se isi taumafaiga ina ia laveaiina o ia. Na ia faapea atu i le motu o tagata: “Faauta, ou te taʻitaʻiina atu o ia i fafo i a te outou, ina ia outou iloa ou te leʻi iloa se mea e sala ai o ia.” Sa manatu o ia atonu o le vaaia o le tulaga faataugā o Iesu o le a gau ai o latou loto. A o tu Iesu i luma o le motu o tagata lē alolofa, o loo i lona ao le pale tuitui ma sa ofu i le ofu violē pāuli ma sa tafe ifo le toto i ona fofoga na matuitui i le tiga, sa faailoa atu e Pilato: “Faauta i le tagata!”

E ui lava sa manuʻanuʻa ma momomo, ae sa tu i inā le tagata aupito mataʻina o talafaasolopito atoa, e moni lava o le tagata aupito sili lena o ē uma na soifua mai! Ioe ona sa faaalia e Iesu se tulaga matuā sili ona mamalu ma toʻafilemu, sa tatau ai ona tuuina atu i ai le mamalu e oo lava i a Pilato sa tatau ona ia iloa, auā o ana upu sa foliga mai o ana upu sa fefiloi faatasi ai le faaaloalo ma le tiga alofa. Ioane 18:39–19:5; Mataio 27:15-17, 20-30; Mareko 15:6-19; Luka 23:18-25.

▪ I le ā le auala na taumafai ai Pilato e tatalaina Iesu?

▪ Na faapefea ona taumafai Pilato ina ia mamā mai o ia i le tauaveina o le tuuaʻiga?

▪ O le ā sa aofia ai i le sasaina?

▪ Sa faia faapefea faifaiga i a Iesu ina ua uma ona sasaina?

▪ O le ā le taumafaiga atili sa faia e Pilato ina ia tatalaina ai Iesu?