Ua Tietie mai le Tagata o le Malo i le Solofanua
Mataupu 13
Ua Tietie mai le Tagata o le Malo i le Solofanua
1, 2. (a) Ia te ai e tatau ona taulaʻi nei i ai la tatou vaai, ma o le ā o loo taofia e lona aao taumatau? (e) Aiseā na logoina atu ai ia Ioane e soia le tagi? (i) O ai le “Leona” o sa Iutā, ma aiseā ua alagatatau ai ia te ia ona tatalaina faamaufaailoga?
SEʻI o tatou suʻe i le mataupu lona lima o le Faaaliga 5. Tatou te faitau ai i inā i se faaaliga faagaeeina, na tuuina atu i le aposetolo o Ioane, ma e fetaui lelei lea mea ma le “oo mai” o le malo o le Atua. E taulaʻi tonu atu i le Alii Pule Aoao o Ieova, “o lē tietie i le nofoālii.” O loo iai se tusi taai o tusitusiga i lona aao taumatau, “ua faamauina i faamaufaailoga e fitu.” Peitai na tagi tele le aposetolo o Ioane. Aiseā? Auā, sa leai se tasi na maua i le vateatea aoao ua alagātatau ia te ia ona tatalaina le tusi taai ma faailoa atu lana feau. Peitai, faauta! O loo iai se tasi ua alagātatau i ai! ‘O le Leona lava ia o le itu aiga o Iuta,’ o le suli lea o le malo o Tavita.—Faaaliga 5:1-5.
2 Ua onomea ma tatau ia te ia auā “ua manumalo” o ia. Sa ia faaalia lona faamaoni lē maluelue i lona Tamā, i le avea o se tagata lelei atoatoa i lenei lalolagi, e oo lava i se maliu tiga i luga o le laau faaoosala. O “le alii o lenei lalolagi,” o Satani, na te lē mafai ona lepetia lona faamaoni. Sa mafai la e Iesu ona faapea mai: “Ua ou manumalo i le lalolagi.”—Ioane 14:30; 16:33.
3. Aiseā e tatau ai ona tatou olioli i le faataunuuga o le Faaaliga 5:9, 10?
3 E iai foi isi tagata, o ē ua manumalo i le lalolagi, ma o lenei “Leona” loto tele, o Keriso Iesu, ua ia manatu atu ia i latou o ona “uso” faaleagaga. (Mataio 25:40) E ala i se toetu faalelagi, o le a aufaatasi ai i latou ma ia i lana pulega o le Malo i le 1,000 tausaga, ma o le a saosaolaumea faatasi i latou ma ia i le puleaina o aogā o lana taulaga togiola i le faitau piliona o tagata i luga o le lalolagi. O lea o loo pepese ai leo mai le lagi i se pese fou. O loo latou faapea atu ia te Ia, o lē na taʻitaʻiina ia fasia e pei o se tamai mamoe e leai sana agasala:
“Ua tatau lava oe ina ia e tago i le tusi, ma tatala i ona faamaufaailoga; auā na fasia oe, ua e faatauina foi i matou i lou lava toto mo le Atua, mai itu aiga uma, ma gagana eseese, ma nuu, atoa ma atu nuu; ua faia foi e oe i matou ma tupu ma faitaulaga i lo matou Atua; e fai foi i matou ma tupu i le lalolagi.” (Faaaliga 5:9, 10)
Maʻeu se faamanuiaga, auā ua toeitiiti nei ona gaoioi lea o le Tupu ma ana tupu lagolago o ē na tofotofoina ma faamaonia mo tagata puapuagatia! Ae ona o lea mea, e ao ona muai iai se faigataua.
LE TAGATA TIETIE I LE SOLOFANUA SINASINA
4. (a) O ā mea ua faaatagia mai e le “solofanua sinasina,” le “aufana” a lē tietie i le solofanua, ma lona mauaina o se “palealii”? (e) O ai lenei tagata tietie solofanua, ma o anafea na ia mauaina ai le pule faatupu?
4 A o aaoina e le “Tamai mamoe” le tusitaai ma tatala le uluai faamaufaailoga, na taalili mai le leo mai le lagi ua faapea mai: “Sau ia!” Ma o le ā le mea ua tatou vaaia? “Faauta foi, o le solofanua sinasina,”—o le faailoga lea o faigataua amiotonu. Ua iai i lē o loo tietie se “aufana.” Na te mafai ai ona faaumatia ona fili mai mea mamao—e mafai ona oo atu i se mea mamao e sili atu na i lo o meatau ua faia e tagata ma e mafai ona faatonutonu lana alu mamao i va o konetineta. Ua tuuina atu ia te ia se “palealii,” ma ua faasino atu lenei mea i le tausaga faaonaponei o le 1914, ina ua aaoina atu ia te ia e Ieova le pule faatupu i luga o atunuu. Ua sili atu ai ona tele lona malosi na i lo lea o tupu po o alii faatauvaa faaletagata, o lenei “Alii ia o alii ma le Tupu o tupu” e manumalo i fili uma o le amiotonu, faatasi ma ē “ua valaauina i latou, ma filifilia, ma faamaoni,” o Kerisiano faauuina o ē ua autasi ma ia i lona malo faalelagi.—Faaaliga 6:1, 2; 17:14.
5. (a) O le ā le manumalo na muaʻi faia e lē tietie i lenei solofanua? (e) O le ā lona iʻuga mo tagata, ae aiseā e tatau ai ona tatou utagia le lapataiga i le Mareko 13:32-37?
5 O lenei tagata tietie i le “solofanua sinasina” o se toa malosi. O le ā la, atonu e sili ona talafeagai lelei, a o ia amata lana tietiega, na i lo lona lafo ifo o “le gata tuai” o Satani ma ana temoni o agelu mai le lagi? Na lafo ifo i latou i lalo nei i le lalolagi! E letioa la ona ita tele le Tiapolo. E pei ona tatou matauina, ua faaoo atu lona ita i tagata, ma ua feoi ai “le fanua ma le sami.” Ua iloa e le Tiapolo faapea “ua saasaa ona po,” ae e atamai tele o ia. E manao o ia ia taaʻina atu i tatou i le manatu faapea “o aso e gata ai” o loo mamao lava i le lumanai e leʻi taitai ona oo mai. Aua lava neʻi iai se tasi o i tatou e lolo atu e faamoeina i sea manatu!—Faaaliga 12:9-12; Mareko 13:32-37.
LE SOLOFANUA MŪMŪ
6. (a) E tusa ai ma le Faaaliga 6:3, 4, o le ā le mea ua pa mai nei? (e) Na faapefea ona ese mai le Taua Muamua a le Lalolagi mai taua uma na muamua?
6 Sa tatalaina e le “Tamai mamoe” le faamaufaailoga lona lua. Ua tamoe faavave mai se “solofanua mūmū”! “Ua avatu foi le pule i loo tietie ai na te aveeseina le filemu i le lalolagi, a e latou te fefasiai ai; ua avatu foi ia te ia le pelu tele.” (Faaaliga 6:4) O lea, na pā aʻe ai le taua muamua a le lalolagi i talafaasolopito o tagata. Ua aveesea le filemu, e lē mai na o ni nai atunuu, ae peitai e mai “le lalolagi,” a o fitafita tetele i le laueleele ma fitafita i le sami ua tauivi o le tasi ma le isi, i le faaaogāina o auupega mataʻutia ma e faaumatia atoatoaina ai. A o leʻi oo atu i lea taimi, na o fitafita sa galulue faasauatoa, e masani ona tauina, ma sa aofia ai na o ni nai atunuu. A o le Taua Muamua a le Lalolagi o se faigataua atoatoa lea. O le uluai taimi i talafaasolopito, sa faaalu uma ai le tamaoaiga atoa a le tele o atunuu, e aofia ai le malosi o tagata na faamalosia e tulafono.
7-9. E faatatau i le “fefasiai,” o ā fuainumera ma faamatalaga ua faaalia ai faapea o le 1914 na faailogaina ai le amataga o le vaitaimi sili o le fasioti tagata i talafaasolopito uma?
7 Ua taʻua e le valoaga le “fefasiai,” ma sa iai lava le “fefasiai”! I le taua o le Somme, na olopalaina ai i lalo le faitau selau afe o fitafita a Peretania ma Falani, e fana taavili, o se mea fou faatoʻā fausia e vave ona fasiotia ai tagata. O lona faitauga, o sina faatatau, e 80 pasene o tagata uma lava na manunuʻa ai. I le iva masina i Verdun, na sili atu le aofai o tagata na maliliu na i lo o ē na savavali faatasi ma le vaegaau a Napoleone i Rusia. Na valiina i le toto i luga o se puipui o le fanuatanu se faailoga i Verdun e faitauina faapea “E LIMA KILOMITA I LE FALEFASIMANU.” E 9,000,000 fitafita uma na fasiotia i le vaitaimi o le fa tausaga o lena Taua Tele.
8 Po o le tausaga ea e 1914 na aveesea ai e le tagata tietie o le “solofanua mūmū” le filemu mai le lalolagi? E lagolagoina le manatu lena e le toatele o tagata tusitala. Mo se faaaʻoaʻoga, toeitiiti lava atoa le 50 o tausaga mulimuli ane ai, na tusi ai e le faatonu o le mekasini o talafaasolopito e taʻua o le American Heritage e faapea: “I le taumafanafana o le 1914 sa filemu atunuu ma sa aliali mai e toʻamalie mea i le lumanai. Sosoo loa ma le pāpā o fana, ma o mea uma o le a lē toe taitai tutusa. . . . O le tausaga e 1914 o se tasi lea o tausaga sa sili ona mataʻutia i talafaasolopito o tagata . . . I le tausaga lava lena na oo mai ai se tasi o tulaga iloga na avea o se taililiu i mea na tutupu i le faatasi pe faalua i se meleniuma. E lē taumate o le a avea o se taimi umi a o tatou leʻi malamalama atoatoa i le mea ua tatou oo atu i ai e le 1914, peitai ane ua tatou mafaia teisi ona vaai atu i le mea ua na aveesea mai ai i tatou.” E moni lava, o le tagata tietie i le “solofanua mūmū” ua na aveesea le filemu mai le lalolagi, ma o le 1914 o le tausaga lena.
9 Ua faaauau pea ona tamoe atu le solofanua a le tagata ina ia fasiotia tagata i le taua lona lua a le lalolagi, lea na maliliu ai i le taua fitafita e 16,000,000. A o tatou ola i tausaga mulimuli ane i le 1980, na fuafuaina ai e se polofesa Hagakeri faapea i le tolusefulu tausaga mulimuli ane ai talu mai le iʻuga o le Taua Lona Lua a le Lalolagi, o se isi 25,000,000 o fitafita sa maliliu i taua. Ua ia faamatala mai faapea, i le vaitaimi o le 33 tausaga na mulimuli ane ai i le iʻuga o le Taua Lona Lua a le Lalolagi, sa na o le 26 aso faapea na leai ai se taua i se mea o le lalolagi.
10. O faapefea ona faaaogā e lenei tagata tietie solofanua se “pelu tele”?
10 Ua taʻu mai e le valoaga ia i tatou faapea o “le pelu tele” na tuuina atu i lenei tagata tietie solofanua. Ma, o le mea moni, o auupega mataʻutia na faia sa latou vaega tele i le fefasiotiaiga i taua o lenei 20 o senituri. I le Taua Muamua a le Lalolagi, sa uluai aliaʻi mai ai i le lautele kasa oona, auupega otometi, tanetau a vaegaau, vaalele ma vaamaulu. I le Taua Lona Lua a le Lalolagi, na tafiesea ai aai tetele e faigataua i le ea, o le vaega tele o tagata na manunua ai o fafine, tamaiti ma ē matutua sa leʻi auai i le taua. I le po lava e tasi na faatafunaina ai le aai o Coventry, i Egelani, ma na mulimuli ane ai na faaumatia e se osofaʻiga i le ea a le Allies (Peretania, Farani ma Amerika) le 135,000 o tagata i le aai o Dresden i Siamani. Na mulimuli mai i lena le tafiesea tele nauā e pomu atomika e sili atu i le 92,000 tagata i Hiroshima ma le 40,000 i Nagasaki i Iapani, o le toatele lava foi o i latou e lē o ni fitafita. O le mea e ono faatinoina e le “pelu tele” i aso nei pe afai ae manu aʻe faiga taua faaniukelea, e lē mafai lava ona tatou iloa!
“FAAUTA FOI, O LE SOLOFANUA ULIULI”
11, 12. (a) E faapefea ona faaalia e lē tietie i le “solofanua uliuli” ia lava faapea o se aumea i lē o tietie i le solofanua lona lua? (e) O le ā ua faaalia ai faapea o lana tietiega o loo faaauau e oo mai i o tatou aso?
11 A o tatalaina e le “Tamai mamoe” le faamaufaailoga lona tolu, sa osofai aʻe loa “le solofanua uliuli.” “Ua i le lima o loo tietie ai le fua faatautau.” (Faaaliga 6:5) O lea, o loo iai le uō a le tagata tietie solofanua o faigataua atoatoa! O le tagata tietie solofanua lenei ua na aumaia oge. I vaitaimi uma lava o taua e lua a le lalolagi, na pagatia ai le tele o atunuu i oge. O le vaevaeina o mea taumafa, e pei ona faaataina mai e le “fua faatautau,” sa avea ma mea e masani ai i atunuu o taua. Ma mulimuli ane ai i le Taua Muamua a le Lalolagi na oo mai ai le oge sili i talafaasolopito uma. Na lipotia mai e le Nation o Iuni 7, 1919 e faapea e 32,000,000 tagata i Initia na “latalata atu i le matelaina.” Na faamatalaina mai foi e le World’s Work o Mati 1921 faapea i le itu lava ia i matū o Saina e 15,000 tagata na maliliu i aso taitasi ona o le fia taumafa. I le lomiga a le Times a Niu Ioka o le Current History Magazine o Oketopa 1921 na siitia mai ai se lipoti a tagata Peretania faapea i Rusia “e lē itiiti ifo i le 35,000,000 tagata o loo faamataʻuina e le ata pāū o le oge ma le faamaʻi.” Sa faapena le tulaga o oge mulimuli ane i le Taua Lona Lua a le Lalolagi, ina ua lipotia mai e le mekasini o le Look o Iuni 11, 1946, e faapea: “O se vaega e tasi vaefa o le lalolagi o loo matelaina i aso nei.”
12 E tusa lava pe leai se taua aoao, e masani lava ona faaulutalaina i nusipepa tala e uiga i le lē lava o fuata o laau aina e e pei o se tasi lenei, i le 1974 e faapea: “O Initia o loo i lalo o le faamalumaluga a le tagata tietie solofanua lona tolu.” I le 1976: “Ua Feagai nei se Lalolagi sa lē Faapea ona Fia Taumamafa ma se Tulaga Sili ona Faigata i Mea Taumafa.” Ma i le 1979: “E 450 miliona tagata o loo matelaina.” A o faaopoopoina le faitau aofai o tagata o le lalolagi, o le tulaga o iai atunuu e lē lava lo latou tamaoaiga ma atunuu ua pagatia i taua, ua sili ona fememeaʻi. Sa faamatalaina e le Atlas World Press Review, i le New Scientist o Me 1975, e faapea: “Ua faafeagai le lalolagi ma se ata pāū e lua ona vaega. O le oge e na o se tasi lea o ona vala: o le isi o le maʻi paee ona o le lē lava o meaʻai. Ua faatatauina e le FAO [Food and Agriculture Organization] faapea e 61 mai le 97 atunuu tauatiaʻe na latou seleseleina mai pe na mauaina mai mea taumafa e sili ona itiiti i le 1970 na i lo mea na manaomia e fafagaina ai o latou lava faitau aofai. I se fuafuaga sa fai ma le faaeteete, na manatu ai le FAO faapea e 460 miliona tagata o loo puapuagatia i le maʻi paee ona o le lē lava o meaʻai; i se faamatalaga sili ona tatau ai e mafai ona faapea o le piliona e tasi.” O lenei, i le vaitaimi talu mai le tausaga e 1980, ua sili atu ona leaga le tulaga ua iai.
13. O ā tulaga faaonaponei ma atugaluga o loo muaʻi faaataina mai i le Faaaliga 6:6?
13 A o faaauau pea ona tietie mai le tagata lona tolu i le solofanua, na alaga mai se leo mai le lagi e faapea: “O le tau o le koini o le saito o le tenari lea, o le tau o koini e tolu o le karite o le tenari foi lea; a e aua e te faaleaga i le suāuu ma le uaina.” (Faaaliga 6:6) O le tenari ua faaataina ai le totogi o le aso, e matuā ita moni ai lava se tagata faigaluega ona o lenei tau maualuga tele. Ae pe e lē o faaauauina pea ea e le maualuga o le tau o mea ona avea pea ma faalavelave i tupe maua a tagata lautele i aso nei? O isi meaai masani, e iai le “suauu” ma le “uaina,” o le a oo foi ina lē lava. Ae o le a faapefea tagata matapeapea i tupe faasili o ē mananao e puipuia a latou ālaoa o loo ola ai? Po o le a manuia ea a latou taumafaiga? O le a tatou vaai lava i ai, a o osofai atu e le “solofanua uliuli” i lana alu atu i ʻī ma ʻō o le lalolagi.
‘LE SOLOFANUA SAMASAMA, MA LE OTI’
14. E faapefea e lē o tietie i le solofanua lona fa ma lana aumea ona fesootai lelei ma mea na tutupu talu mai le 1914?
14 Ua tatalaina lona fa o faamaufaailoga, ma ua faatasia atu “le solofanua samasama” i le tamoega saoasaoa a solofanua. O lē o tietie ai o le Oti. E taotaotua mai ai Seoli po o Heitisi—pe o tietie i se isi solofanua pe leai, ua lē o taʻua mai e le tala. Peitai ane, e iai sa laua feau mamala: “Ua avatu foi ia te i laua le pule e fasioti i lona fa o vaega o le lalolagi i le pelu, ma le oge, ma le oti, atoa ma manu feai o le vao.” (Faaaliga 6:7, 8) Talu mai lena tausaga faamataʻuina o le 1914, na faapea ona salalau atu ai le faatasi mai o le Oti ma Seoli po o Heitisi i le lalolagi aoao.
15, 16. (a) O le ā le faataunuuga iloga na iai i lenei valoaga mai le 1918-1919? (e) O le ā ua faaalia ai faapea o loo tamoe saoasaoa mai pea lava lenei solofanua talu mai le 1914?
15 “Mala mataʻutia”! Sa latou taʻua faapea o le faamaʻi tele o le 1918-1919, po o le fulū Sepania. I le na o ni nai vaiaso lava, ae na faaluaina le aofai o ē na maliliu na i lo o le numera o ē na maliliu i le fanua tau o le Taua Muamua a le Lalolagi—o se aofaʻiga mataʻutia a itiiti mai 21,000,000. O le fuainumera aloaia i le Iunaite Setete mo ē na feoti i le fulū o le 548,452, e faasefulu taimi e sili atu ai i le numera o fitafita Amerika na fasiotia i le taua. E masani lava o le toatele o ona tagata maliliu o ē talavou ma ē malolosi. I Initia, e sili atu i le 12,000,000 na maliliu. Sa leai se konetineta po o se motu na tuusaunoaina—vagana ai lava le motu o St. Helena. O ni aai o Eskimo ma Aferika Tutotonu na soloiesea uma lava. I Tahiti, na faaaogāina ai ogaumu e pei o umunamu e susunuina ai tino o tagata na maliliu e 4,500 i lo latou falelauasiga ina ua maliliu i totonu i le na o le 15 aso, ma i Samoa i Sisifo e 7,500 mai le faitau aofai o tagata e 38,000 na faaumatiaina e le mala.
16 Ae ui i lea, o le fulū Sepania e le na pau lea o se faamaʻi mataʻutia na aumaia e lē o tietie i le “solofanua samasama.” Na lipotia mai e le Times a Niu Ioka faapea i le 1915, i le taua ina ia maua ai Gallipoli, na fasiotia ai e le maʻi manava tatā le tele o fitafita na i lo o pulufana. Mai le 1914 e oo i le 1923 na faaumatia ai e le kolera le sili atu i le 3,250,000 i Initia. I le 1915 e “mai le lua ma le ʻafa e oo i le tolu miliona na maliliu” i Rusia na pogai mai i le faamaʻi e feaveaʻi e le utufiti. Ma a o tietie mai pea talu ai nei le tagata i le solofanua, ua avea ai le gasegase o le fatu ma le kanesa ma fasioti tagata taulamua, a o le sifilisi “o le Fasioti Tagata Nu. 2 lea o Faamaʻi Pipisi” ma le maʻi o le ate fefete “o se Faamaʻi ua Pasae aʻe i le Lalolagi Aoao.”
UA LATA ONA MAPU!
17, 18. (a) O le ā le mea na fai mai ai le tasi tagata faiupufai faalemalo, e faaalia ai le sootaga i le va o le tagata tietie solofanua lona lua, lona tolu ma lona fa? (e) Ae peitai o ai ea ua lē amanaia e taʻitaʻi o le lalolagi? (i) Aiseā e mafai ai ona tatou olioli e uiga i le mea o le a faia e le Tupu mamalu?
17 O lenei mo le sili atu na i le 70 tausaga, ua taututuu ai le “solofanua mūmū,” le “solofanua uliuli” ma le “solofanua samasama,” ma o loo mulimulituʻi atu ai Seoli po o Heitisi. O le mea moni, ua seleseleina e Heitisi se fuata ua matuā tumu i tagata feoti, e oo ina faitau selau o miliona. O se manatu tāua, na faapea mai se alii peresitene ua mavae o le Iunaite Setete, o Herbert Hoover, i le 1941, i le tuu faatasia o nei tagata tietie solofanua e toatolu: “O taunuuga o taua tetele e masani lava o oge ma faamaʻi . . . O le Taua a le Lalolagi o le luasefululima tausaga ua alu na oo ai ina fiaaai tagata e 300,000,000. . . . Ma ina ua mavae se tausaga ma le afa o le taua lava lenei [Taua Lona Lua a le Lalolagi] e toeitiiti a oo atu i le 100,000,000 isi tagata faaopoopo e lē lava mea taumafa na i lo ina ua uma le tolu tausaga o le taua talu ai.” Pagā le mala o le a uiga i ai se taua lona tolu a le lalolagi mo tagata!
18 Ua iloa lelei e taʻitaʻi o le lalolagi e uiga i le faaleagaina aoao na faia e le tagata o loo tietie i le solofanua “mūmū,” le solofanua “uliuli” ma le solofanua “samasama.” Ae peitai, latou te lē amanaia Lē o tietie i le “solofanua sinasina.” Ua fotuaʻi mai le aso fiafia mo lenei Tupu mamalu na te fulisia ai lenei faiga o mea! Na i lo taua, o le a ia aaoina mai le filemu. E suitulaga i oge, o le a ia saunia mea e tele. Na i lo faamaʻi, o le a ia toe faafoʻisia tagata i le soifua malōlōina lelei atoatoa, ma e oo lava ia Seoli po o Heitisi o le a ia toe faatutūina aʻe ē maliliu. Ua faamatalaina mai e se faamatalaga e tali tutusa i le Salamo e uiga i lē tietie i le “solofanua sinasina” i nei upu:
“Ina fusi ia lau pelu i lou vae, o oe na le toa, o lou viiga ma lou mamalu. O lou mamalu foi ia e tietie ai i le manu ma le manuia, ona o le upu moni, ma le agamalu, ma le amiotonu; ia aʻoaʻoina foi oe e lou aao taumatau i mea e matautia ai.” (Salamo 45:3, 4)
Ua latalata mai le manumalo a le Tagata tietie solofanua o le Malo!
19. (a) E tusa ai ma le faataunuuga o le Faaaliga 6:2-8, pe e tatau ea ona atuatuvale ai i tatou? (e) O le ā le faaaʻoaʻoga ua siitia mai e faalaeiauina ai i tatou ina ia malosi i le faatuatua?
19 O le mea lea, seʻi soia ia tatou te soona atuatuvale, ona o tulaga sili ona faaleagaina i luga o le lalolagi i nei aso. Na i lo lena, tau ina ia tali tutusa la tatou vaaiga ma le vaaiga a se tasi fafine o Molimau a Ieova o lē talu ai ona o lona talitonuga, na faaalu ai lona 20 tausaga mai le 1956 e oo i le 1978 i le falepuipui i totonu o se atunuu pule sauā. O se tasi taimi na iai o ia i lalo o se faasalaga o le oti, ma e oo mai lava i le asō o loo ia tauavea pea faailoga o le faapuapuagāina o ia i ona ogalima. Na faapefea ona tumau malosi o ia i le faatuatua? I lona manatunatu loloto i le tele o faamatalaga o mau o le Tusi Paia na ia manatuaina mai i ana suesuega maelega sa faia i taimi ua mavae. Ua fai mai a ia o se tasi o nei mau o le Faaaliga 6:2. Sa talitonu maumauai o ia faapea o Lē tietie i le “solofanua sinasina,” le Tupu o Iesu Keriso, na faanofotupuina i le lagi i le 1914, ma sa ia maumauai ai e tumau seia oo ina ‘manumalo pea o ia.’ Tau ina ia mafai e isi uma o ē o tatalo mo le “oo mai” o le malo o le Atua ona tumau ma le faatuatua seia oo ina manumalo atoatoa le Tupu!
[Fesili mo le Suʻesuʻega]
[Pusa i le itulau 123]
UA FAAAUAU PEA ONA TAMOE MAI LE SOLOFANUA ULIULI
“Ua fuafuaina e le Fale Tupe o le Lalolagi faapea e 780 miliona tagata i le lalolagi o loo soifua i le mativa auliuli, o se tulaga o loo ‘i lalo ifo o so o se tulaga lelei mo le manuia o tagata.’”—Detroit “Free Press,” Setema 1, 1980
