Le Tupu o le Vavau
Mataupu 2
Le Tupu o le Vavau
1. Aiseā e tatau ai ona ia i tatou le mautinoa i le Atua o se Tamā moni?
NA AMATA e Iesu “le Tatalo a le Alii” i lona faapea atu i le Atua “Lo matou Tamā e.” E leai, e lē na o Iesu Keriso e ona le Tamā, ae mulimuli ane o le a avea foi o ia ma Tamā o tagata uma, o ē tapuai ma le usiusitai i lenei “Faafofoga tatalo” alofa. (Salamo 65:2) I le avea ma “Tupu o le vavau” ua ia faaalia ai lona alofa moni ma le tumau mo ana foafoaga ola, e pei lava ona fai e se tamā lelei faaletagata mo lana fanau. (1 Timoteo 1:17) E tatau ona tatou mautinoa o ‘lo tatou Tamā’ o ia o se Peresona moni, o lē e silasila alofa mai ia i tatou. Po o le ā lava la tatou gagana, lanu po o tulaga i le olaga, e tatau ona tatou lagona le saoloto e faalatalata atu ia te ia, auā “e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.”—Galuega 10:34, 35.
2, 3. Ua faapefea ona faailoaina mai e lo tatou Tamā faapea o ia lava o Lē Foai Ola ma Lē Sili e Saunia Mea? (Kenese 1:1, 2, 31)
2 O ‘lo tatou Tamā, o i le lagi,’ o ia o Lē na Foafoaina Mea, o Lē na aaoina mai le ola i tagata. (Mataio 6:9; Salamo 36:9) Peitai ua sili mamao atu o ia na i lo le na ona avea ma o tatou Foai Ola; o ia foi o Lē Sili e Saunia Mea mo i tatou. Tatou te faatalitalia e ao i se tamā faaletagata maufaatuatuaina ona ia saunia se fale ma le tausiga mo lana fanau, e ui lava ina tele taimi ma taumafaiga e faaalu ai. Ua faia faapea e lo tatou Tamā faalelagi, ma ua sili atu, i se auala aupito sili ona agaalofa.
3 Manatu mai, maeu le alofa o lenei “Tupu o le vavau” na saunia ai le lalolagi e fai ma o tatou aiga. Na ia faataatia tonu lenei nofoaga i lalo o le lagi, ma e ala i lona mana silisiliese uma lava na ia aaoina mai ai i luga o le lalolagi mea uma e ono ma tatau mo le apitaga fiafia o le tagata. Ona ia foafoaina ai lea o le tane ma le fafine, sa tuuina atu i laua i lenei aiga matagofie—e moni lava, o se meaalofa sili lea, mo “le fanau a tagata”!—Salamo 115:16; 19:1, 2.
4. (a) O le ā se silafaga mamao ma le agalelei mo le lumanai na faaalia e lo tatou Tamā i le sauniuniga o lo tatou aiga? (e) O le ā ua faamautinoaina mai ia i tatou faapea e finagalo o ia ia tatou fiafia?
4 Maeu se aiga manaia na saunia e lo tatou Tamā faalelagi mo lana fanau i inei i luga o le lalolagi! Na ia saunia ina ia sosoo mai po mālū, e malōlō lelei ai ma le malama aʻe o le aso maninoa e galue ai. Sa ia faatonuina le faagasologa mai o tau e aogā mo i tatou ma fiafia ai. (Kenese 8:22) Na ia saunia le mea tāua ma aogā o le vai e anoanoai, ma faasafua atu i luga o le lalolagi ina ia mafai ona mauaina i so o se mea lava e manaomia ai. Ua ia folasia le mutia matagofie lanulauava e pei se fala fola fale—e faitau miliona ona maila faatafafā—e ufitia atoa uma ai lo tatou aiga i le lalolagi atoa. Ua ia teuteuina i fugalaau felanulanuai ma le matagofie. Ua ia folasia ma le matagofie le laufanua o totonu e iai ni vaomatua faafiafia loto, o mauga ma vaituloto. I “ana i lalo” o le laueleele ua ia teu ai le anoano o koale po o malala, suāuu ma isi mea o puna o le malosi. Ua ia tausia pea “oloa” a le lalolagi ina ia lava ma totoe, o saito, fualaau, laau aina ma isi mea taumafa susua ma le matagofie. Maeu se atamai ma le agaalofa o Lē Saunia Mea o lo tatou Tamā faalelagi! Ua taʻua o ia e le Tusi Paia o ‘le Atua fiafia.’ Ma le manino lava, ua finagalo foi o ia ia tatou fiafia.—1 Timoteo 1:11; Isaia 25:6-8.
LE “SUAFA” O LO TATOU TAMĀ
5. O le ā e tatau ona avea ma faanaunauga i o tatou loto i le tatalo i upu amata o le tatalo faaaʻoaʻo a Iesu?
5 E iai ‘se suafa lelei’ o lo tatou Tamā faalelagi alofa, se taʻuleleia tele o Lē Sili e Saunia Mea. E iai foi sona suafa totino, e pei lava ona iai i so o se tamā faaletagata. Afai e iai so tatou tamā faaletino taʻuaogāina, e ao ona tatou inoino e vaai atu i lona igoa ma lona taʻuleleia ua faalumaina. E tatau ona tatou mananao e vaai atu i lona igoa o faaaloalogia. E sili atu foi la ona faapena, e tatau ona avea ma o tatou faanaunauga le vaai atu o faamamaluina le suafa o lo tatou Tamā faalelagi. O lea la, e tatau ona tatou mafai ona tatalo atu ma o tatou loto atoatoa i upu ia na faamuamua e Iesu i le Tatalo Faaaʻoaʻo: “Lo matou Tamā e, o i le lagi, ia paia lou suafa.”—Mataio 6:9; Faataoto 22:1, NW; faamatalaga i le pito i lalo o le itulau.
6. E faatatau i le suafa o le Atua, o le ā e te manao e tagai i ai?
6 E moni lava, e tatau ona faifai pea ma a tatou tatalo naunautai le faaeaina o le suafa o Lē Sili na Foafoaina Mea o le lagi ma le lalolagi, ia siitia i luga aʻe o isi igoa uma, ma faaalia ai e silisili ona tāua, e uigā, ma e alofagia i le vateatea aoao. E sili mamao le tāua o le faapaiaina o le suafa paia o le Atua, na i lo o lo tatou lava faaolataga. O lona suafa ma lona taʻuleleia e tatau lava ona faapaiaina—ia puipuia mai faifaiga uma a tagata lē migao ina ia faataʻuvaleaina.
7. O le ā ua faaalia mai e le Tusi Paia faapea o le suafa totino o le Atua?
7 O ai le suafa totino o lo tatou Tamā faalelagi? Ua faaalia mai i isi faamatalaga i le mataupu ua faailoa mai ai faapea o Lē Ona lena suafa sili e iai ni ona fili. I le faamatalaina o i latou nei, ua faitauina faapea le Salamo 83 fuaiupu e 17 ma le 18, i le faaliliuga o le Tusi Paia o le King James Version: “Ia faamāina i latou ma ia faaatuatuvaleina i latou e faavavau faavavau lava; ioe, ia masiasi i latou, ma ia fano i latou: Ina ia iloa e tagata, o oe e ou le suafa o IEOVA, o oe lava o le Silisili ese i le lalolagi uma.”—Tagai foi i le Salamo 100:3.
8. O le ā ua taumafai fili o le Atua e fai i lona suafa, ma o le ā le iʻuga?
8 O lea la, o le suafa o le Atua, o IEOVA. Peitai ua matuā lē faaaloalogia lava lenei suafa e le toatele o tagata o ē fai mai e tapuai i latou i le Atua. Ua oo lava ina soloiesea ai e nisi lona suafa mai a latou faaliliuga o le Tusi Paia, a ua suitulaga ai taʻu e pei o le “ALII” ma le “ATUA” i mataitusi tetele uma. O lenei faiga ua lē gata ina natia ai le suafa taʻutaʻua o le Atua, a ua fenumiai ai foi le tulaga o le Alii o Ieova ma le Alii o Iesu Keriso faatasi ma isi “alii” ma “atua” o loo faasino i ai i le Tusi Paia. (Salamo 110:1; Teuteronome 10:17; Roma 1:4; 1 Korinito 8:5, 6) E mafai faapefea ona tatalo faamaoni tagata ina ia faamamaluina pe faapaiaina le suafa o le Tamā, pe afai o loo latou saili ina ia aveesea aʻiaʻi lena suafa?
9. (a) O faapefea ona tusia le suafa o le Atua i le faa-Eperu, ma i isi gagana? (e) Ua faaalia i le Tusi Paia le Atua o ni peresona e toafia?
9 Ua tusia le suafa lē mafaatusatusalia o le Atua i le gagana Eperu, le uluai gagana lea na faaaogāina i tusitusiga o le Tusi Paia, i mataitusi ia יהוה, lea ua faaleoina e nisi o Iāuē (Yah΄weh). O le taʻuga ua talia ai i le tulaga masani i le gagana Peretania o “Jehovah,” ma ua faapena foi ona tusiaina le suafa i isi lava gagana. I le faaaogāina o le suafa “Ieova” ua tatou mafai ai ona faaalia manino atu po o ai e faasino i ai. O ia “o Ieova e toatasi.” E lē o ia o Iesu Keriso, auā o Iesu o le Alo faamaoni o le Atua, “o le faatusa o le Atua e lē vaaia, o le ulumatua o foafoaga uma.”—Kolose 1:15, NW; Mareko 12:29; Teuteronome 6:4.
10. O le ā le uiga o le suafa o le Atua, ma ua faapefea ona faaalia mai e ia lenei mea?
10 E iai le uiga mamana o le suafa “Ieova.” Ua faailoa mai faapea: “O Ia ua Pogai ai Ona Iai (pe, Faamaonia Ona Iai).” E faatatau le uiga o lenei mea ia te Ia lava; ae e lē faatatauina i Lona foafoaina o mea. O lea, na ia folafolaina ai o “Ieova” o lona lava lea suafa e fai ma “faamanatuga” ina o le a avea o ia ma Lē Laveaia faavavega lona nuu o Isaraelu mai ia Farao o Aikupito. (Esoto 3:13-15) Mulimuli ane, ina ua faailoa atu e le perofeta o Ieremia o le Alii Pule Silisili o Ieova, o Lē na Faia le lagi ma le lalolagi ‘i lona mana tele ma lona aao faaloaloa’ ma ‘e sili i le faautauta ma le lasi o mea na ia fai,’ sa faamautinoa atu ai e Ieova i lana perofeta e faapea, i Lana lava taimi atofa, o le a Ia aaoina ai se gaoioiga peiseai e faigata ona fai i le avea lea o Ia ma Lē na Toe Faafoisia mai Lona nuu mai le tafeaga i le Emepaea o Papelonia. Ma na ia faia lava faapea!—Ieremia 32:17-19, 27, 44; 2 Nofoaiga a Tupu 36:15-23.
11. E mafai faapefea ona ōgatasi le suafa o le Atua i aso nei ma lona malo?
11 I nei foi aso, o le Atua sili lava o Ieova, o Lē ‘ua pogai ai ona iai.’ Ua mafai totino e ia lava ona avea ma so o se mea e manaomia, e faataunuuina so o se matafaioi e manaomia, ina ia ona aaoina mea ofoofogia e ala i lona malo, i le faapaiaina o lona suafa ma mo le manuia o ona tagata. So o se mea na te fuafua e tauaaoina e faapea lava ona aaoina ma le manuia.—Isaia 48:17; 55:11.
FAAPAIAINA LE SUAFA O LE ATUA?
12. O faapefea ona manatu le tagata i le Atua?
12 Pe ua faaalia ea e tagata le talisapaia, le faaaloalo ma le alofa mo lenei Atua taʻutaʻua, o lē e matuā sao ona ala ma o lē ua saunia ma le ofoofogia mea mo ana foafoaga ola i luga o le lalolagi? Tagai i so o se mea i lenei lalolagi, ma o le a e iloa ai le tali. Pagā le faanoanoa ona o le suiseseina o le Atua e lotu ua taʻua faapea o atunuu Kerisiano! Ua manatu le tele o nei atunuu faapea o ia o se Atua faaituʻau ma ua tatalo ia te ia ina ia fesoasoani ia i latou i fetauaiga ma o latou uso. Ua manatu isi o ia o se Atua sauā, o lē e tuuina atu “agaga o tagata ua feoti” ia ōi i le afi mumū e faapuapuagatia ai e faavavau. O loo iai pea foi isi ua latou taʻufaatauvaa o ia i le faatusaina lea o ia i faatusa e leai ni ola, ua na ona faia i laau po o maa. Ua solia ma le loto i ai e le toatele ana tulafono amiotonu, i lo latou faapea ane, e lē o toe silasila mai pe o alofa mai le Atua.—Faaeseese le Galuega 10:34, 35; le Ieremia 7:31; le Isaia 42:8 ma le 1 Peteru 5:7.
13. O le ā le iʻuga mulimuli pe afai e faatagaina tagata ua taʻitaʻiseseina e tutumau i o latou ala faalēalofa?
13 Ae ui i lea, afai e lē alolofa i le Atua tagata ua taʻitaʻiseseina ma e lē faapaiaina foi e i latou lona suafa, e mafai la faapefea ona latou alolofa i o latou uso? (1 Ioane 4:20, 21; 5:3) Ma vagana ua toe faafoisia le alofa i le aiga o tagata uma, o le mea e tupu e tatau ona avea le lalolagi mulimuli ane o se nofoaga e lē autasi, e faasauā ma le lē pulea. Ua uma ona faia faapea i isi nuu. Faatasi ai ma le faasalalauina o auupega niukelea i atunuu, e iai se aso e mafai ai e tagata o ē fia faapapaina fana ona faatamaʻia ituaiga uma o tagata. Peitai, o le mea lea o le a lē taitai ona faatagaina e lo tatou Tamā alofa!—Salamo 104:5; 119:90; Isaia 45:18.
LE AUALA E FAAPAIAINA AI E LE ATUA LONA SUAFA
14, 15. O ai e taʻimua i le faapaiaina o le suafa o le Atua, ma e faapefea?
14 O ai ea e taʻimua i le faapaiaina o le suafa o le Atua? Ia, o Ieova lava ia! O le mea lenei na te aaoina i lona gaoioi ina ia taʻuleleia ai ona tulaga amiotonu. O le a ia faaoo atu le faamasinoga ia i latou uma o ē tetee i lona finagalo paia, e aofia ai ma i latou o ē faasauā i o latou uso atoa ma i latou o ē aʻoaʻoina mea pepelo e uiga i le Atua. (Salamo 140:12, 13; Ieremia 25:29-31) E lē mafai ona faafitia e Ieova ia lava. O ia o le Atua moni, o lē e ono ma tatau i ai le tapuaiga atoatoa a ana foafoaga uma. O ia o le Pule Aoao o le Vateatea, o lē e tatau ona usiusitai i ai foafoaga ola uma.—Roma 3:4; Esoto 34:14; Salamo 86:9.
15 I le faapaiaina o lona suafa, o le a soloiesea ai e le Alii Pule Aoao o Ieova mai lenei lalolagi tagata uma o ē faaleagaina mea ma tetee i lona finagalo. Auā e inosia e ia le amioleaga ae e alofa foi o ia i le amiotonu. (Salamo 11:5-7) E pei ona tulei ia lava: “Ou te faasilisiliina o aʻu e aʻu, ma ou faapaiaina o aʻu; e iloa foi aʻu i luma o nuu e tele, e iloa ai lava e i latou o aʻu lava o Ieova.” (Esekielu 38:23) Ma le manino lava la, afai tatou te mananao ia olioli i le faamaoniga a Ieova, e tatau foi la ia i tatou ona faapaiaina lona suafa, ia tausia o se mea e paia ma ia ono ma tatau i ai le faaaloalo atoatoa, ma ia ola e talafeagai ma lona finagalo.
16. O le ā le vaega e fai e la tatou amio i le faapaiaina o le suafa o le Atua?
16 O amioga a tagata uma o ē tapuai ia Ieova, e faamamaluina ai le suafa o le Atua pe e lē faamamaluina ai foi. Seʻi amioaʻi i tatou uma lava i se auala e faapogai ai i isi ona tautala lelei e uiga i le Atua sili o loo tatou tautuaina ma faapea ona aumaia ai le olioli i le finagalo o Ieova. (1 Peteru 2:12; Faataoto 27:11) E pei o ni fanau usiusitai, e ao ona tatou mananao e faaalia le loto faafetai i lo tatou Tamā mo ana meaalofa uma, e aofia ai ma lo tatou aiga matagofie—o lenei lalolagi—lea o le a toe faafoisia i ai le mamalu sili i lalo o le pule a le Malo o lona Alo.—Isaia 6:3; 29:22, 23.
17. O le ā le manatu e ao ona tatou faaalia i le faalatalata atu i le “Tupu o le vavau” i le tatalo?
17 Maeu le manaomia ona tatou oo atu i se faiā faamaonia ma lenei “Tupu o le vavau”! Ae ui i lea, tatou te lē mafai ona fai lenei mea i so tatou lava lelei, auā foi na afuafua mai i tatou uma e matuā agasala ma na fananau mai i le lē lelei atoatoa. Ae e mafai ona tatou tatalo i le Atua e pei ona sa faia e le Tupu o Tavita: “Ia ʻalo ou fofoga i aʻu agasala, ma ia e sōloi ese aʻu amio leaga uma. Le Atua e, ia e faia se loto mamā mo aʻu; ma ia e faafouina se loto mau i totonu ia te au.” (Salamo 51:5-10) A o tatou aʻoaʻoina le mea e finagalo ai ‘lo tatou Tamā i le lagi’ mai ia i tatou, tatou te mafai ona tatalo mo se vaega o faamanuiaga e faavavau o le a aumai e lona malo. Ioe, ma le mautinoa lava tatou te mafai ona tatalo mo le oo mai o le malo o le Atua. Ma o le ā le uiga o lena malo mo le fanau a tagata i lenei lalolagi? Seʻi o tatou mataʻituina.
[Fesili mo le Suʻesuʻega]
