Le Au Lagolago Faamaoni o le Malo
Mataupu 15
Le Au Lagolago Faamaoni o le Malo
1. O ā mea tutupu e sili ona tāua na uluai taʻuina mai e Tanielu?
AO LEʻI taitai ona oo mai, ua uma ona faasino patino atu le valoaga a Tanielu i le 29 T.A. o le tausaga lea o le faaalia mai o le Mesia o se tagata, ma e faapea foi i le 1914 T.A., o le tausaga lena o lona afio o le tupu i le nofoalii i le mamalu faalelagi. I le ma lea, na valoia auiliili mai foi e Tanielu le faapefea ona faaleleia le finauga sili e uiga i le pule o le lalolagi.
2. O le ā le finauga e tatau nei ona faamasinoina, ma i lē fea faamasinoga?
2 Ua tatau nei la ona faamasinoina maeʻaeʻa le finauga sili e uiga i le pulega tonu i le lalolagi. Ae i lē fea faamasinoga? I le faamasinoga sili ona maualuga o le vateatea aoao uma! Ua faamatalaina mai e Tanielu i upu nei:
“Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale aʻi. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.”—Tanielu 7:9, 10.
3. (a) O ai le faamasino? (e) O ā mea ua faaalia e “tusi”? (i) O le ā le faamasinoga ua faia?
3 Ona afio atu lea o le “Tupu o le vavau,” o Ieova le Atua, ina ia faia le faamasinoga. (Faaaliga 15:3, NW) Ae o ā “tusi” ia ua fofolaina nei i ona luma? O tala lē manuia ia o pulega na faia e malo i talafaasolopito uma. Ina ua faaiʻuina Taimi o Nuuese i le 1914 T.A., o se mea tatau ona aveesea e “le faamasinoga” le malosi o la “latou pule,” e ui lava ina o loo “faafualoaina lo latou ola, ua oo i le tausaga ma le tau”—seia oo lava ina faaooina atu moni le faamasinoga i o latou luga ia Amaketo.—Tanielu 7:12; Faaaliga 16:14, 16.
4, 5. (a) Ia te ai ua tuuina i ai le pule? (e) O le ā le auala e tasi e mafai ai ona tatou iloa le faatasi mai o le Tupu?
4 Ia te ai la, e tatau ona tuuina atu i ai le pule? Ua faaauau mai faapea Tanielu:
“Na ou iloa i faaaliga i le po, faauta foi, ua afio mai i ao o le lagi Lē e pei o le Atalii o le tagata, ua oo foi ia i Lē ua mai anamua ona aso, ua latou momoli ia te ia i ona luma. Ua foaiina atu ia te ia le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese; o lana pule o le pule e faavavau lea, e le mavae atu ia, o lona malo foi e le faaumatia.”—Tanielu 7:13, 14.
5 O ai ea “Lē e pei o le Atalii o le tagata”? E leai se tasi vagana le Alii faamamaluina o Iesu Keriso. Talu ai ona o “ao o le lagi” ua faaataina mai ai le lē vaaia, ma le malamalama ona o le faatuatua, tatou te iloa ai le “faailoga” faalelagi o lona faatasi mai, atoa foi ma le “faailoga” lea na aliali manino mai i mea na tutupu i luga o le lalolagi i le “amataga ia o puapuaga” i le 1914 T.A.—Mataio 24:3, 7, 8, 30; Faaaliga 1:7.
6. (a) O ai isi e faatatau i ai le faamasinoga ua faia? (e) O le ā le mea ua mauaina e i latou nei, ma e faapefea?
6 Ua tatou mātauina mai le valoaga a Tanielu faapea ona sosoo ai lea ma le tuuina atu o le faamasinoga manuia “i le au paia a lē Silisili ese,” ma e maua foi e i latou na “le malo, ma le pule, atoa ma le mamalu o le malo i lalo ifo o le lagi uma.” (Tanielu 7:22, 27) O ai lenei “au paia”? E manino lava, e eseese i latou ma pule manatu faapito lē faamaoni o malo faaletagata, o ē ua leva tele ona mapuitiga ai tagata. E leai se isi ua na o i latou o le 144,000, o le “au paia” faauuina, o tagata o ē “le ponā” i lo latou faamaoni, ma o ē ua “faatauina nai tagata” e avea ma tupu lagolago faatasi ma “le Atalii o le tagata” i lona malo faalelagi. E toe faatutūina i latou ina ia faatasi ma ia “i le aso gataaga.” (Faaaliga 14:3-5; Mataio 24:30; Ioane 6:40) I le afio mai o Iesu i lona malo, ua mauaina ai se vaega totoe o nei tagata o le “au paia” o loo malaulau i o latou soifuaga i le lalolagi. Ma e iai sa latou galuega e fai!
E LAGOLAGOINA MALOSI LE AFIOGA A LE ATUA
7, 8. (a) O le ā le vaega na amataina se galuega sauniuni, ma o anafea? (e) O le ā le mea na latou lafoaia? (i) O le ā na latou lagolagoina ma le maumauai? (o) O le ā le tausaga sa latou faasino atu i ai? (u) O le ā le mea faigaluega ua latou faaaogāina e faasilasilaina atu ai le malo o le Atua?
7 A o tau lata mai le taimi na mauaina ai e “le Atalii o le tagata” lona malo, sa manino mai lava le finagalo o le Atua mo le faia o se galuega o sauniuniga i inei i le lalolagi. I tausaga e leʻi leva talu ona mavae le 1870, na faamaopoopoina ai e Charles T. Russell se vaega itiiti o Kerisiano tuuina atu i Pittsburgh, Pennsylvania, U.S.A. Sa leʻi pine ae iloa e i latou nei faapea, o lotu a Kerisinetoma sa faavae mai i luga o talitonuga ma sauniga faapaupau a Papelonia, faatasi ai ma le aʻoaʻoga a Plato o le ola pea o le solu, ae e lē o i le Afioga a le Atua. I lo latou lafoaia o nei lotu sese, na avea ai lenei vaega itiiti ma ē lagolagoina maumaututū aʻoaʻoga a le Tusi Paia e uiga i le togiola a Iesu, le toetu ma le malo o le Atua o le faamoemoe lea mo tagata puapuagatia.
8 E auala i le mekasini o Le Olomatamata, lea ua lomia pea lava pea i le gagana Peretania talu mai Iulai 1879, na lagolagoina malosi ai e Russell ma ana uō le aʻoaʻoga a le Tusi Paia e uiga i le foafoaga e tetee atu ai i manatu o le evolusione a Darwin. Na latou ‘tapeina le afi i seoli’ i lo latou faaalia mai i le Tusi Paia e faapea sa lē taitai lava ona iai se nofoaga aasa o se afi e faapuapuagatia ai ‘solu ua feoti,’ ae peitai o le “hele” po o “seoli” i le Tusi Paia, o le tuugamau. (Salamo 16:10; Galuega 2:29-32) Sa latou faasino atu i luma i le 1914 T.A. faapea o se aso faailogaina e uiga i le “oo” mai o le malo o le Atua. E oo mai i le asō, o loo lomia ai Le Olomatamata e Faasilasilaina ai le Malo o Ieova, i le sili atu i le 100 gagana eseese, ma i le faitau miliona o kopi o lomiga taitasi, ma o loo lagolagoina ai ma le faamaoni le malo o le Atua e ala ia Keriso ua na o lea le faamoemoe o atunuu uma o tagata.—Mataio 12:21; Salamo 145:10-12.
9. Na faapefea ona faataunuuina le Faaaliga 11:7-12 e faatatau i nei “molimau”?
9 Ina ua mavae ona auauna ma le faamaoni i le sili atu i le 30 o tausaga e avea ma peresitene o le Sosaiete o le Olo Matamata, ona maliu ai lea o C. T. Russell ia Oketopa 31, 1916, ma na sui ane ia te ia J. F. Rutherford. Sa faaaogāina e faifeau o lotu tulaga o le taua e faatuputeleina ai teteega i le feau o le Malo. Sa faalavelavea ai sauniga faa-Kerisiano. I nisi atunuu, sa faafalepuipui ai auauna faamaoni a le Atua. O Rutherford ma le toafitu o isi faifeau na taulamua i le ofisa ulu o le Olo Matamata i Brooklyn, New York, U.S.A., na faasalaina i le falepuipui i le tele o tausaga. Peitai ane, o nei auauna a le Atua sa lē lotovaivai, auā na muai taʻuina mai lava e valoaga o le Tusi Paia na sauāga. Mo se faaaʻoaʻoga, o loo faamatalaina mai e le Faaaliga 11:7-12 atunuu faalelalolagi, i le faailoga o se “manu feai,” faapea o loo tau faasaga i “molimau” a le Atua, ina ia “manumalo foi o ia ia te i [latou], ma fasioti ia te i [latou].” E ao ona taofia lo latou vavalo atu, ma i sona uiga faafaatusa sa pei i latou o tino oti ua umi o taatitia ua fai ma mea e manogi leaga i le “ala o le aai tele” o Kerisinetoma. Sa tutupu nei mea uma, a o fai auauna a le Atua ma ē tauemua i luma o tagata lautele i le lalolagi uma. E ui lava i lea, a o fāi ifo vesiga o le taua, ma a o tatalaina mai ē na faafalepuipuiina—ma sa taʻumamāina atoatoa mai moliaga sa faia ia i latou—“ona uluitinoina ai lea o i [latou] e le Agaga ola mai le Atua.” Na faaeaina i latou i se tulaga na mauaina ai le finagalo malie o le Atua, ma mai le 1919 na latou ulu atu ai i se vaitaimi o gaoioiga maelega o le Malo.—Isaia 52:7, 8; Roma 10:15.
UA PAʻŪ “PAPELONIA LE AAI TELE”!
10. O le ā le nofosala na aumaia e lotu Kerisinetoma ia i latou lava, ma e faapefea?
10 I le vaitaimi o na tausaga o le taua, sa lē gata ina taʻimua faifeau o Kerisinetoma i le sauāina o Kerisiano moni, peitai sa latou teena foi faamaoniga o le latalata mai o le malo o le Atua. Sa iai lo latou lava “malo” faalotu, o “Papelonia le Aai Tele” lea. (Faaaliga 17:5, 6, 18) I itu e lua o le taua, sa latou faamalosia talavou ina ia ō atu i utu e lalafi ai ma sauni mo taua ma ia latou lagolago atu ma le loto atoa i lena fasiotiga tagata mataʻutia. Ona o na gaoioiga, e tatau ai i faifeau o Kerisinetoma ona tauamoina pea se nofosala mamafa i le toto, e pei lava o taʻitaʻi lotu o Ierusalema i aso anamua, o ē na fai mai ai le perofeta a Ieova: “Ua iloa i ou lava pito ofu le toto o le ola o e matitiva e le sala.”—Ieremia 2:34; 19:3, 4; tagai foi i le Mataio 23:34, 35.
11. E faapefea ona faatatau le Esekielu 22:3, 4, 16 i Kerisinetoma?
11 O lenei nofosala i le toto ua faaopoopoina atu nei i le ifo i tupua a Kerisinetoma ma lona aʻoaʻoina o talitonuga sese a Papelonia. O lea la, ua faapea ai foi ona faatatauina upu a le perofeta o Esekielu i le au aposetolo a Kerisinetoma e faapea:
“O loo faapea ona fetalai mai o le Alii o Ieova, Ua faamaligi le toto e le aai i totonu ia te ia, ia oo mai ai ona aso, ma ua faia foi tupua mo ia, ia leaga ai o ia. Ua e nofo sala i le toto ua e faamaligiina; ua leaga foi oe ia te oe i tupua ua e faia; ua faalatalataina e oe ou aso, ua e oo lava i ou tausaga; o le mea lea ou te tuu atu ai oe e fai ma luma i nuu ese, ma tauemuga i nuu uma. E faaleagaina lava oe e oe i luma o nuu ese, e te iloa ai o aʻu lava o Ieova.”—Esekielu 22:3, 4, 16.
12. (a) O le ā le mea sili na tupu i le tausaga e 1919? (e) Na faapefea ona faamanuiaina ai tagata o le Atua i luga o le lalolagi ona o lenei mea?
12 O lotu a Kerisinetoma o ē nofosala i le toto na lafoaiesea e le Atua o Ieova, o lē sa latou fai mai faapea ua latou tapuai i ai, peitai na latou lē toe mananao e faaaogāina lona suafa. I le tausaga e 1919 T.A., faatasi ai ma lotu uma a Papelonia i le lalolagi atoa, na latou oo atu ai i se paʻū tele. Ua lē toe iai i latou i so o se tulaga lava i luma o Lē Silisili ese. Ua lē toe mafaia foi ona oo atu a latou pule i luga o tagata tapuai moni o Ieova. E lē toe mafai foi ona faia faapea e so o se isi lava vaega o Papelonia le Aai Tele, le emepaea o lotu sese o le lalolagi. Auā ua alagaina atu nei e “le Alii o Ieova” lenei valaau i le “au paia” faamaoni i luga o le lalolagi e faapea:
“O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. Ia outou o ese i Papelonia, . . . ma le taalili o le alaga fiafia; ia outou faaali atu, ia faailoa atu lenei mea.” (Isaia 48:16, 17, 20)
O le ā lenei “alaga fiafia,” ma o fea ua lagonaina ai?
UA AMATA LE MOLIMAU I LE LALOLAGI ATOA
13. (a) O le ā le vala o le “alaga fiafia” ua tū matilatila nei? (e) O le ā le alaga leotele na alu atu?
13 Na faamatalaina e “le Atalii o le tagata” se vala tāua e uiga i lenei “alaga fiafia” i lana valoaga i le “gataaga o le lalolagi,” e faapea:
“E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3, 14, 37)
Ae e manaomia ona faamaopoopoina le “au paia” ina ia mafai ona latou faia lenei galuega. Latou te lē mafai ona faataunuuina foi lenei mea i le na o le malosi o tagata. Ma le fiafia lava, i tauaofiaga faavaomalo na fuafuaina i Cedar Point, Ohio, U.S.A., i le 1919, ma le 1922, na liligiina ifo ai le agaga o Ieova i luga ia i latou i se auala ofoofogia. Na faamaopoopoina ma faamalosia ai i latou ina ia ‘faalauiloa, faalauiloa, faalauiloa atu le Tupu ma lona malo.’ (Mataio 24:31) O loo taatia mai se galuega tele i luma o i latou nei o “e ua filifilia” o loo taofi mau i le faamoemoe i le lagi.
14. Na faapefea ona iai se faataunuuga tele o le valoaga a Ioelu?
14 E pei lava ona sa faataunuuina le valoaga a Ioelu i le Penetekoso 33 T.A. i le vaitaimi o “aso e gata ai” o le faiga o mea faa-Iutaia, o lea la ua amata ai ona iai se faataunuuga tele o lena valoaga i le vaitaimi o “aso e gata ai” o le faiga o mea o le lalolagi a Satani. I le mauaina o le poto ma le faagaeega mai le agaga o le Atua, na ‘perofeta ane ai atalii ma afafine’ faauuina o Ieova i ona po nei, a o tele a latou galuega i le lapataiina o tagata i le lalolagi e uiga i le latalata mai o “le aso tele ma le silisili o Ieova,” atoa ma le manaoga faanatinati ‘ia valaau i le suafa o Ieova,’ ina ia faasaoina ai.—Galuega 2:16-21; Ioelu 2:28-32.
SE “AUAUNA” FAAMAONI
15. (a) O ai le “auauna faamaoni ma le mafaufau”? (e) E faapefea ona toe iloaina o ia i ona po nei?
15 I lana valoaga sili e uiga i le “faailoga,” na fai ai e Iesu se fesili e faapea:
“O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso?”
Sa tautua se vasega o le “auauna” faamaoni i totonu o Kerisiano anamua seia oo lava ina amata ai le aposetasi sili. Pe ua tatou toe maua ea la se faalapotopotoga pei se “auauna” na te tufatufaina atu meaʻai faaleagaga ina ua afio mai le Alii o Iesu i lona malo? Ioe, tatou te maua! O na “Tagata Aʻoga o le Tusi Paia,” e pei ona sa faaigoaina ai i latou i lena taimi, ua uma ona latou faia se galuega sauniuni i le lalolagi atoa. Ma na fetalai Iesu:
“Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma.”—Mataio 24:45-47.
16. (a) Ua tausia faapefea e le “auauna,” “mea” a le Matai? (e) O le ā le igoa faale-Tusi Paia na talia ma le fiafia e le “auauna”?
16 I le talisapaia o lenei tofiga mai le Matai, ua tausia lelei ai e le vaega tuufaatasi pei se “auauna” faauuina mea a le Malo i luga o le lalolagi, i le faamautinoaina o le talaʻiina atu o le “tala lelei.” I tausaga mai le 1920-1929, na folafolaina atu ai feau faafaamasinoga malolosi faasaga ia Satani ma lana faalapotopotoga, ae maise lava e faasaga i lotu faa-Papelonia. I le 1931, na talia ai ma le fiafia e le “auauna” le igoa ua faatulaga ese ma le manino ai o ia mai lotu sese uma—o le igoa “Molimau a Ieova”—faatasi ai ma le tiute tauave ma le faaeaga na faaalia e le perofeta o Isaia i nei upu e faapea:
“Ua fetalai mai Ieova, O outou o aʻu molimau, ma laʻu auauna o le na aʻu filifilia. . . . O aʻu o aʻu lava o Ieova; a e leai se faaola ua na o aʻu lava. . . . O outou foi o aʻu molimau o aʻu lava o le Atua, ua fetalai mai ai Ieova.”—Isaia 43:10-12.
17. O le ā le fesili ua tatau ona taliina nei?
17 E mafai faapefea e le “auauna,” e na o ni nai sefulu o afe le aofai, o le vaega faauuina o totoe, ona ‘talaʻia nei lenei tala lelei o le malo i le atu laulau uma e fai ma molimau’? Sa lē pine ae saunia mai e Ieova le tali.
[Fesili mo le Suʻesuʻega]
[Ata i le itulau 148, 149]
LE MATUA o le TUSI PAIA O LE MALO
FOLAFOLAGA I ETENA MO LE “FANAU” O LE MALO
SA MUAI TAʻU MAI LE “FANAU” TAUTUPU E AUALA IA APERAAMO, TAVITA
LE TALAʻIGA O LE MALO—LE TAULAGA TOGIOLA A LE TUPU
LE MALO O LE 1,000 TAUSAGA E TOE FAAFOISIA MAIA LE PARATAISO
E “OO MAI” LE MALO E FAAUMATIA AI PULEGA A TAGATA
SA FAAVAE LE MALO—“ASO E GATA AI” MAI LE 1914
