E TE iloa le uiga o le faailoga tagata?— O le uiga o le faailoga tagata, o le lē fiafia lea i se tagata ona e ese ona foliga pe ese foʻi le gagana e tautala ai. O le faailoga tagata la, o le iai lea o ni o tatou lagona lē lelei po o ni o tatou manatu i se tagata, ae tatou te leʻi iloa lelei lenā tagata.

O le ā sou manatu, e saʻo pe a tatou lē fiafia i se tasi ae tatou te leʻi iloa lelei lenā tagata, pe ona e ese foʻi lenā tagata mai iā i tatou?— E leai, e sesē le faailoga tagata, ma e lē o se uiga agalelei. E lē tatau ona tatou agaleaga i se tagata ona e ese mai iā i tatou.

Pe e te iloa se tasi e ese lona lanu mai iā te oe pe e ese foʻi lana gagana?— Atonu e te iloa ni tagata e ese o latou foliga ona sa lavevea, ia pe ona o se maʻi foʻi. Pe e te faaalia le agalelei ma le alofa iā i latou e ese o latou foliga mai iā te oe?—

E tatou te faaalia le agalelei i tagata uma pe afai tatou te faalogo i le Faiaʻoga Sili, o Iesu Keriso. E lē tatau ona tatou faaesea se tagata ona e ese le atunuu e sau ai pe e ese foʻi lona lanu. E tatau ona tatou agalelei i ai. E ui lava e iai tagata e lē talitonu i lenā mea, ae o le lesona lenā na aʻoaʻo mai e Iesu. Seʻi o tatou talanoa la i ai.

Na fesili se tamāloa Iutaia faailoga tagata iā Iesu: ʻO le ā se mea ou te faia ina ia ou maua ai le ola e faavavau?’ Na silafia e Iesu, o loo manaʻo le tamāloa ia tali atu e tatau ona tatou agalelei atu i na o tagata e tutusa o tatou atunuu po o lanu. Na i lo le tali atu i le fesili a le tamāloa, na fesili i ai Iesu: ʻO le ā ua fai mai ai le Tulafono a le Atua i le mea e tatau ona tatou fai?’

 Na tali le tamāloa: ʻE te alofa atu iā Ieova lou Atua ma lou loto atoa, ma ia e alofa atu i lē lua te tuaoi, e pei o oe lava iā te oe.’ Na faapea atu Iesu: ʻE saʻo lau tali. Ia faapea ona e faia, ona e maua lea o le ola e faavavau.’

Peitaʻi, e leʻi manaʻo le tamāloa e agalelei pe alofa atu i tagata e ese mai iā te ia. O lea na faatogafiti ai ona fai lana fesili iā Iesu: “O ai foʻi le tagata ma te tuaoi?” Atonu na manaʻo le tamāloa e tali atu Iesu faapea: “O ou tuaoi, o au uō” po o “tagata e tutusa o outou foliga.” Ina ia tali le fesili a le tamāloa, na faamatala e Iesu se tala i se tamāloa Iutaia ma se tamāloa Samaria. Na faamatala e Iesu e faapea.

Na alu ifo se tamāloa i le auala mai Ierusalema e agaʻi atu i Ieriko. O lenei tamāloa, o se Iutaia. A o faimalaga si tamāloa, na puʻea ai o ia e le ʻaufaomea. Na latou faapō iā te ia ma fao ana tupe ma ona lavalava. Na matuā fasi tigāina o ia e le ʻaufaomea ma faataatia i autafa o le auala, ua toeitiiti lava oti.

E leʻi umi, ae ui mai ai se ositaulaga i le auala lenā. Na ia iloa atu le tigāina tele o le tamāloa. O le ā sau mea e fai pe ana o oe lenā?—  Na faaauau lava le malaga a le ositaulaga i le isi itu o le auala. E leʻi tū i ai le ositaulaga. Na te leʻi faia foʻi se mea e fesoasoani ai i le tamāloa.

E leʻi umi ae ui mai ai foʻi se tasi tamāloa toaga i lotu i le auala lava lea. O ia o se sa Levī, e auauna i le malumalu i Ierusalema. Pe na tū lenei sa Levī e fesoasoani?— E leai. Sa faaauau pea lana malaga e pei foʻi o le ositaulaga.

Mulimuli ane, na ui mai ai se tamāloa Samaria i le auala. Po o e iloa atu le tamāloa lenā ua oo mai i le piʻoga?— Na iloa atu e le Samaria le tamāloa Iutaia o taatia i autafa o le auala ua tigāina lava. E ao ona tatou malamalama, e lē lelei le va o tagata Samaria ma tagata Iutaia. (Ioane 4:9) Po o le a tuu pea la e le Samaria le tamāloa  e aunoa ma le fesoasoani i ai? Pe na faapea ifo iā te ia: ʻAiseā ou te popole ai fua i lenei Iutaia? E lē taitai fesoasoani mai le tamāloa lenei pe a ou tigāina.’

Na tilotilo ane le Samaria i le tamāloa o taatia i autafa o le auala, ma ua alofa i ai. E lē mafai ona ia tuua lenei tamāloa e taatia i inā ma oti ai. O lea, na oso ai i lalo mai lana manu, na alu atu i le tamāloa ma taumafai e fai ona manuʻa. Na ia liligiina le suāuu ma le uaina i manuʻa o si tamāloa. O le faia faapea e fesoasoani ai ina ia toe pepē ona manuʻa. Ona ia fusifusia lea o manuʻa o si tamāloa.

Ona tago atu lea o le Samaria ma sii faaeteete si tamāloa i luga o lana manu. Na la malaga lemū i le auala seʻia taunuu i se faletalimālō. Na totogi e le Samaria se potu e mālōlō ai le tamāloa, ma na tausi faalelei iā te ia.

Na fesili atu Iesu i le tamāloa lea na la talanoa: ʻO ai o so latou nei e toʻatolu ua fai ma tuaoi lelei?’ O le ā sau tali? Po o le ositaulaga, le sa Levī, po o le Samaria?—

Na tali atu le tamāloa: ʻO le tuaoi lelei, o le tamāloa na tū ma fesoasoani i le tamāloa tigāina.’ Ua faapea atu Iesu: ʻE saʻo lau tali. Inā alu ia, ma ia faapea ona e fai.’​—Luka 10:25-37.

 Maʻeu se tala matagofie, a ea? Ua faaalia manino mai ai, po o ai o tatou tuaoi. E lē faapea e na o a tatou uō lelei e avea ma o tatou tuaoi. E lē o faasino atu foʻi na o tagata e tutusa o tatou lanu ma a tatou gagana. Na aʻoaʻoina i tatou e Iesu e agalelei atu i tagata, tusa lava pe ese se mea e ō mai ai, pe ese foʻi o latou foliga ma a latou gagana.

E faapena foʻi ona lē faailoga tagata Ieova le Atua. Na faapea mai Iesu: ʻE faaoso e lo outou Tamā o i le lagi, lona lā i ē amio leaga atoa ma ē ua amio lelei. Ua faatotō ifo foʻi e le Atua le timu i tagata amio lelei atoa ma ē amio leaga.’ O lea la, e tatau ona tatou agalelei atu i tagata uma lava, e pei ona faia e le Atua.​—Mataio 5:44-48.

A faapea la e te vaaia se tagata o lavea, o le ā se mea e te faia?— Ae ā pe a ese le atunuu e sau ai lenā tagata pe e ese foʻi lona lanu? E tatau ona e fesoasoani i ai ona o lou tuaoi foʻi le tagata lenā. A faapea e te laʻitiiti tele e lē mafai ona e fesoasoani atu, e tatau la ona e fai atu i se tagata matua mo se fesoasoani. Pe e te fai atu foʻi i se leoleo po o se faiaʻoga. A faapea e te faia le mea lenā, o loo e agalelei la e pei o le tamāloa Samaria.

E manaʻo le Faiaʻoga Sili tatou te faaalia le agalelei. E manaʻo foʻi tatou te fesoasoani i isi, e tusa lava po o ai na tagata. O le māfuaaga lenā na faamatala ai e Iesu le tala i le tamāloa Samaria agalelei.