AFAI tatou te feoti, pe e finagalo le Atua e toe faatūina i tatou, o lona uiga, e toe faaolaina i tatou?— Na talitonu le tamā amiotonu o Iopu, e finagalo le Atua e toe faatutūina tagata. Ina ua iloa la e Iopu ua lata lona oti, na ia fai atu i le Atua: “Ia e valaau mai, ona ou tali atu ai lea iā te oe.” Na fai mai Iopu o loo naunau Ieova le Atua, pe e finagalo moni lava, e toe faatūina o ia.​—Iopu 14:14, 15.

E tai pei lava Iesu o lona Tamā, o Ieova le Atua. E finagalo Iesu e fesoasoani iā i tatou. Ina ua fai atu se tamāloa lepela iā te ia, ʻAfai e te manaʻo i ai, e mafai ona e faamamā iā te aʻu.’ Na tali atu Iesu: ʻOu te manaʻo i ai.’ Ona faamālōlōina lea e Iesu si tamāloa lepela mai lona maʻi.​—Mareko 1:40-42.

Na iloa e Iesu mai lona tamā, le auala e faaalia ai le alofa i tamaiti. I aso a la ua leva, na faaaogā ai e Ieova ana auauna e toe faatutūina ni tamaiti. Na alaga atu Elia iā Ieova e toe faatūina le tama a le fafine  na agalelei iā te ia. Na toe faatūina e Ieova le tama. Na faaaogā foʻi e Ieova lana auauna o Elisaia e toe faatūina se tamaitiiti.​—1 Tupu 17:17-24; 2 Tupu 4:32-37.

E ese ma le manaia o le iloa, o loo matuā alofa mai Ieova iā i tatou, a ea?— E lē faapea e na o taimi o tatou feola e manatu mai ai Ieova iā i tatou. E manatua foʻi i tatou e Ieova, e tusa lava pe tatou te feoti. Na faapea mai Iesu, e manatu foʻi le Tamā iā i latou e alofa i ai ua feoti, e pei lava o feola! (Luka 20:38) Ua fai mai le Tusi Paia, ʻe lē mafaia e le oti, po o le ola, po o mea i nei ona pō, po o mea atalī, ona faateʻaeseina mai i tatou i le alofa o le Atua.’​—Roma 8:38, 39.

A o iai Iesu i le lalolagi, na ia faaalia ai e naunau mai Ieova i tamaiti. E te manatua foʻi, na faaalu e Iesu lona taimi e talanoa ai i tamaiti e uiga i le Atua. Ae pe na e iloa, na tuu mai e le Atua le mana iā Iesu e toe faatūina ai tamaiti mai le oti?— Seʻi o tatou talanoa la i le taimi na faatūina ai e Iesu le afafine e 12 tausaga, o le tamāloa e igoa iā Iairo.

Na nonofo Iairo ma lona toʻalua, ma la laʻua tama teine e toʻatasi, e lata ane i le Sami o Kalilaia. I se tasi aso, na maʻi tigāina ai le teineitiiti, ma ua vaai atu Iairo ua lata ina oti. Ua amata nei ona mafaufau Iairo iā Iesu, le tamāloa mataʻina lea na ia faalogo faapea e mafai ona faamālōlōina tagata. O lea na alu ai loa Iairo e suʻe Iesu. Na maua e Iairo Iesu o aʻoaʻo atu i le anoanoaʻi o tagata i luga o le matafaga o le Sami o Kalilaia.

Na faaofiofi atu Iairo i le motu o tagata ma faapaʻū i vae o Iesu. Ua fai atu iā Iesu: ʻO loo maʻi tigāina si oʻu afafine. Faamolemole lava, e ā pe a ta ō seʻi e faamālōlōina o ia? Ou te ʻaiʻoi atu, ta ō.’ Na la ō loa ma Iesu i le taimi lava lenā. Ua mulimuli atu foʻi le motu o tagata lea na ō mai e faalogologo iā Iesu. Peitaʻi, a o savavali atu, na ō mai ni tamāloloa mai le aiga o Iairo ma taʻu atu iā Iairo: “Ua oti lou afafine; se ā le mea e te faalavelave ai pea i le aʻoaʻo?”

 Na lagona atu e Iesu tala a tamāloloa. Ua iloa e Iesu le faanoanoa tele o Iairo ona ua oti lona afafine e toʻatasi. Ona faapea atu lea o Iesu: ʻAua e te fefe. Ia faatuatua i le Atua, ma o le a ola ai lou afafine.’ Na faaauau pea la latou savaliga seʻia tau atu i le fale o Iairo. O loo fetagisi uō a le aiga. Ua faanoanoa, ona ua oti si a latou uō laʻitiiti. Peitaʻi, na fetalai atu Iesu: ʻAua le fetagisi. E lē o oti le teine, ae o loo moe.’

Ina ua fai atu le tala lenā a Iesu, ua amata ona taliē tagata, auā ua latou iloa ua oti le teineitiiti. O le ā sou manatu, aiseā na faapea atu ai Iesu o loo moe le teineitiiti?— O le ā le lesona e te manatu, o loo manaʻo Iesu e malamalama i ai tagata?— E manaʻo Iesu ia iloa e tagata, o le oti e tai pei o loo moe gase se tagata. E manaʻo e aʻoaʻo atu i tagata e faapea e ala i le mana o le Atua, e faigofie lava ona ia toe faatūina se tagata mai le oti, e tai pei o le fafaguina o se tagata o loo moe.

Ona faapea atu lea o Iesu e ō uma i fafo tagata mai le fale, seʻi vaganā ai ona aposetolo o Peteru, Iakopo ma Ioane faapea ai ma mātua o le teineitiiti. Ona alu atu lea i le mea o iai le teineitiiti. Ua tago atu i lona lima ma faapea atu: ʻFuna e, tulaʻi ia!’ Na faafuaseʻi ona tū i  luga le teine ma amata ona savali! Ua matuā fiafia mātua o si teineitiiti.​—Mareko 5:21-24, 35-43; Luka 8:40-42, 49-56.

Seʻi manatu foʻi i le mea lenei. Talu ai na mafai e Iesu ona toe faaola le teineitiiti sa oti, faamata e mafai foʻi e Iesu ona toe faatutūina isi tagata mai le oti?— O le ā sou manatu, faamata e faia moni lava e Iesu lenā mea?— Ioe. Na faapea mai Iesu: “E oo mai le aso e faalogo ai i [loʻu] leo o i latou uma ua i tuugamau, ma latou ō mai ai.”​—Ioane 5:28, 29.

O le ā sou manatu, faamata e finagalo Iesu e toe faatutū mai tagata?— O le a fesoasoani se isi faataʻitaʻiga i le Tusi Paia, ina ia tali ai le fesili lenā. O se mea na tupu i se isi aso e lata ane i le aai o Naina, na faaalia ai faalogona o Iesu mo tagata e faanoanoa i taimi o maliu.

O loo iai se tinā i le solo a tagata i le oti o lana tama, a o latou tuua le aai o Naina. I se taimi muamua atu, na oti ai si ona toʻalua, a o lenei ua oti atu foʻi si ana tama e toʻatasi. Pagā le faanoanoa o si tinā! E toʻatele tagata o le aai o loo mulimuli i le solo, a o avatu le tino oti o lana tama i fafo o le aai. Ua tagi masūsū si tinā, ma e leʻi mafai ona faamāfanafanaina e tagata.

Peitaʻi i le aso lava lenā, na ō atu ai Iesu ma ona soo i le aai o Naina. A o lata i le faitotoʻa o le aai, na latou feiloaʻi ai ma tagata a o ō atu e tanu le tama a le fafine. Ina ua vaai Iesu i le tagi masūsū o si tinā, na mutimuti vale ai lona alofa. Ua ootia lona loto i le tulaga faanoanoa o si tinā. Na manaʻo Iesu e fesoasoani i si tinā.

O lea la, i se leo māfana ae maumauaʻi lea na uaʻi mai ai le tinā, na ia faapea atu: “Aua e te tagi.” Ua vaavaai atu nei tagata iā Iesu ona o lana mea na fai. A o alu atu Iesu i le tino oti, e lē taumate na taumānatu uma tagata po o le ā lana mea o le a fai. Ua faapea atu Iesu: “Le tauleʻaleʻa e, ou te fai atu iā te oe, Inā tulaʻi ia.” Na faafuaseʻi ona nofo i luga le tama! Ua amata ona tautala.​—Luka 7:11-17.

 Seʻi mafaufau i faalogona o si tinā! O ā ni ou faalogona pe a toe faatūina se tasi e te alofa i ai, mai le oti?— Pe ua lē faaalia ai i lenei mea le moni o le alofa o Iesu i tagata, ma e finagalo e fesoasoani iā i latou?— Seʻi manatu i le matagofie o le lalolagi fou a le Atua, pe a tatou toe feiloaʻi atu i tagata na feoti!​—2 Peteru 3:13; Faaaliga 21:3, 4.

I le taimi lenā, o le a toe faatutūina ai isi tagata na tatou masani muamua ai, e aofia ai ma tamaiti. O le a tatou iloa i latou, e pei ona iloa e Iairo lona afafine i le taimi na faatūina ai e Iesu. O le a toetutū foʻi tagata ua faitau selau pe faitau afe tausaga, talu ona feoti. E ui lava ua tele tausaga talu ona feoti, ae e lē galo i latou i le Atua.

Pe e lē o se mea matagofie le iloa e faapea, o loo matuā alolofa mai Ieova le Atua ma lona Alo o Iesu, iā i tatou?— O loo finagalo i laʻua ina ia tatou ola, e lē mo ni nai tausaga, ae ia ola e faavavau!