‘Ia Muamua i Mea Uma Ona Outou Alofa Naunau’

“Ua lata mai le gataaga o mea uma lava. . . . Ia muamua i mea uma ona maua e outou o le alofa naunau o le tasi i le tasi.”—1 PETERU 4:7, 8.

NA SILAFIA e Iesu le tāua o itula mulimuli na faatasi ai ma ona aposetolo. Na ia silafia mea o le a latou fesagaʻia. E telē se galuega e ao ona latou faia, ae o le a inosia ma sauāina i latou e pei ona sa oo iā te ia. (Ioane 15:18-20) A o latou faatasi i lenā pō mulimuli, e silia i le faatasi le taimi na ia faamanatu atu ai iā i latou e tatau ona latou “fealofani.”—Ioane 13:34, 35; 15:12, 13, 17.

² Na iloa e le aposetolo o Peteru o lē na iai i le pō lenā, le tāua o lenā fautuaga. A o tusi atu i tausaga mulimuli ane ina ua lata i le faaumatiaga o Ierusalema, na faamatilatila ai e Peteru le tāua o le alofa. Na ia fautua atu i Kerisiano e faapea: “A ua lata mai le gataaga o mea uma lava. . . . Ia muamua i mea uma ona maua e outou o le alofa naunau o le tasi i le tasi.” (1 Peteru 4:7, 8) E tāua tele upu na a Peteru mo ē o loo soifua i “aso e gata ai” o lenei faiga o mea. (2 Timoteo 3:1) O le ā le “alofa naunau”? Aiseā e tāua ai ona tatou alolofa atu faapena i isi? E faapefea ona faaalia tatou te alolofa naunau i isi?

O le ā le “Alofa Naunau”?

³ E manatu le toʻatele o tagata faapea o le alofa o se uiga masani. Ae e leʻi talanoa Peteru i le alofa lea e taatele i tagata; na i lo lea, na talanoa i se alofa e sili ona loloto. O le upu “alofa” i le 1 Peteru 4:8 o se faaliliuga o le upu Eleni a·gaʹpe. E faauiga atu lenā upu i le alofa lē manatu faapito lea e taʻitaʻia pe puleaina e mataupu silisili. Ua faapea mai se tasi tusi: “O le alofa agape, e mafai ona faatonutonuina talu ai e lē na o ni faalogona ootia, ae o se naunautaʻiga e uunaʻia ai se tasi e gaoioi.” Talu ai ua tuufaasolo mai iā i tatou faalogona manatu faapito, tatou te manaʻomia faamanatuga ina ia fealofani ma faaalia i auala ua faatonuina mai e mataupu silisili a le Atua.—Kenese 8:21; Roma 5:12.

⁴ Ae e lē uiga faapea e tatau ona tatou fealofani ona o la tatou tiute tauave lenā. O le a·gaʹpe o se uiga e māfana tele. Na faapea mai Peteru e tatau ona “alofa naunau [o lona uiga “ia aapa atu”] o le tasi i le tasi.” * (Kingdom Interlinear) E manaʻomia ni taumafaiga ina ia faaalia ai le alofa naunau. E tusa ai o le upu Eleni ua faaliliuina “naunau,” na faapea mai se tagata atamai: “O loo faaatagia ai se tagata tamoʻe o faaaogā atoatoa ona maso i lana taumafaiga faaiʻu i le faaiʻuga o le taufetuliga.”

⁵ O lea la, o lo tatou alofa e lē tatau ona gata tau lava o tulaga faigofie pe faatapulaa foʻi i ni tagata faapitoa. O le alofa faa-Kerisiano e moomia ona faaalia tusa lava pe faigatā. (2 Korinito 6:11-13) E manino mai la, o lenei ituaiga alofa o se uiga e tatau ona tatou ati aʻe ma galulue i ai, e pei ona galue le tagata tamoʻe e faaleleia lana tamoʻe. E tāua tele ona faapena lo tatou alofa mo le tasi i le isi. Aiseā? A itiiti ifo e tolu ni māfuaaga o loo iai.

 Aiseā e Ao ai Ona Tatou Fealofani?

⁶ Muamua lava, “auā [e] mai le Atua le alofa.” (1 Ioane 4:7) O Ieova o lē na alofa muamua mai iā i tatou, o le Puna o lenei uiga matagofie. Na fai mai le aposetolo o Ioane: “O le mea lava lenei ua faaalia mai ai le alofa o le Atua iā te i tatou, ina ua auina mai e le Atua lona Alo e toʻatasi i le lalolagi, ina ia tatou ola iā te ia.” (1 Ioane 4:9) Na “auina mai” le Alo o le Atua e ala i le avea o se tagata ma faia lana faiva, ma maliu i le satauro—ina ia “tatou ola” ai. E faapefea ona tatou tali atu i lenei faaaliga mataʻina o le alofa o le Atua? Na fai mai Ioane: “Afai ua faapea ona alofa mai o le Atua iā te i tatou, e tatau ai ona tatou fealofani.” (1 Ioane 4:11) Ia mātau, na tusi Ioane e faapea, “Afai ua faapea ona alofa mai o le Atua iā i tatou”—e lē na o oe ae o i tatou. E manino lava le manatu: Afai e alofa le Atua i o tatou uso talitonu, e tatau foʻi ona tatou alolofa iā i latou.

⁷ Lona lua, o le taimi sili lenei ona tāua e tatou te fealofani ai ma tuuina atu le fesoasoani i o tatou uso e iai le manaʻoga, talu ai “ua lata mai le gataaga o mea uma lava.” (1 Peteru 4:7) O loo tatou ola i “aso e gata ai e oo mai ai aso faigatā.” (2 Timoteo 3:1) Ua tatou feagai ma puapuaga ona o le tulaga o le lalolagi, o mala faalenatura ma teteega. E moomia ona faalatalata atili le tasi i le isi ona o tulaga faigatā. O le alofa naunau e autasia ai i tatou ma uunaʻia ai foʻi i tatou e “fetausiaʻi.”—1 Korinito 12:25, 26.

⁸ Lona tolu, e tatau ona tatou fealofani auā tatou te lē mananaʻo e ‘tuuina atu se mea e mautū ai le tiapolo,’ ma manumalo ai iā i tatou. (Efeso 4:27) O loo mataalia Satani e faaaogā tulaga lē lelei atoatoa o o tatou uso—o o latou vaivaiga, masei ma mea sesē—e fai ma toʻatugā iā i tatou. Po o le a tatou ō ese mai le faapotopotoga ona ua tatou tigā i se tala po o se gaoioiga a se isi? (Faataoto 12:18) Tatou te lē ō ese pe afai e alofa naunau le tasi i le isi! E fesoasoani lenā alofa e tausia ai le filemu ma le autasi i le auaunaga i le Atua i le “loto gatasi.”—Sefanaia 3:9.

Le Auala e Faaalia ai Lou Alofa mo Isi

⁹ O le alofa e amata mai i totonu o le aiga. Na faapea mai Iesu, e iloa ona soo moni i lo latou fealofani. (Ioane 13:34, 35) E tatau ona iloa le alofa e lē gata i le faapotopotoga, ae i totonu foʻi o aiga—i le va o le ulugalii faaipoipo ma i le va o mātua ma fanau. E lē lava le tau ina manatu i le alofa mo le aiga; e moomia ona tatou faaalia le alofa i ni auala aogā.

¹⁰ E faapefea i le ulugalii faaipoipo ona faaalia le alofa o le tasi i le isi? O le tane e alofa moni i lana avā, e na te faailoa atu i lana avā lona alofa faapelepele iā te ia e ala i ana upu ma gaoioiga—pe e tumutumu tagata pe na o i laʻua foʻi. E faaaloalo i le tulaga mamalu o lana avā ma e manatu mamafa i ona manatu ma faalogona. (1 Peteru 3:7) E na te faamuamuaina mea e fiafia ai lana avā, ma e matuā tinoū e tausi i manaʻoga faaletino, faaleagaga ma faalogona o lana avā. (Efeso 5:25, 28) O le avā e alofa moni i lana tane, e matuā “āva” iā te ia tusa pe e iai taimi e lē ausia ai e lana tane mea o loo ia faatalitalia. (Efeso 5:22, 33) E lagolagosua ma e gauaʻi o ia i lana tane, e lē tagisā i mea e lē mafai ona maua peitaʻi, e felagolagomaʻi ma lana tane ina ia taulaʻi atu pea i mea faaleagaga.—Kenese 2:18; Mataio 6:33.

 ¹¹ Mātua e, e faapefea ona outou faaalia le alofa mo a outou fanau? O lou naunau e galue mamafa e saunia mea faaletino mo i latou, o se faamaoniga lenā o lou alofa. (1 Timoteo 5:8) Peitaʻi, e sili atu mea e moomia e le fanau na i lo meaʻai, lavalava ma se fale e nonofo ai. Ina ia matutua aʻe le fanau e alolofa ma auauna i le Atua moni, latou te moomia le toleniga faaleagaga. (Faataoto 22:6) O lona uiga, ia faatulaga se taimi mo le aiga e suʻesuʻe ai le Tusi Paia, auai i le faiva ma sauniga faa-Kerisiano. (Teuteronome 6:4-7) E moomia le tuuesea o isi mea ina ia tumau pea ona faia na gaoioiga, aemaise i nei aso faigatā. O lou manatu mamafa ma au taumafaiga e tausia manaʻoga faaleagaga o lau fanau, o se faaaliga lenā o le alofa auā e faaalia ai lou alofa naunau mo lo latou manuia e faavavau.—Ioane 17:3.

¹² E tāua foʻi ona faaalia e mātua le alofa e ala i le tausia o manaʻoga tau faalogona o a latou fanau. E aafiagofie faalogona o tamaiti; e moomia ona e faamautinoa atu i ai e te alofa iā i latou. Ia fai i ai e te alofa iā i latou, ma fai ma au masani le opo ma fusi iā i latou, auā o gaoioiga faapena e latou te mautinoa ai e alofagia ma tāua i latou. Ia faamālō moni i ai i se auala māfana ina ia latou iloa ai, o loo e iloa ma faatāuaina a latou taumafaiga. Ia aʻoaʻia i latou i le alofa ona o faasaʻoga faapena e faailoa ai lou manatu mamafa mo i latou. (Efeso 6:4) O na faaaliga uma o le alofa, e fesoasoani e ati aʻe ai se aiga māfana fiafia, lea ua lelei ona sauniunia e teena omiga o nei aso e gata ai.

¹³ O le alofa e uunaʻia ai i tatou e lē amanaʻiaina masei o isi. Manatua foʻi, ina ua timaʻi atu i lana ʻaufaitau ina ia “alofa naunau o le tasi i le tasi,” na taʻua e Peteru le māfuaaga e tāua ai le faia faapea: “Auā o le alofa e ufiufi ai agasala e tele.” (1 Peteru 4:8) O le “ufiufi” i agasala e lē faapea e “ufiufi” i agasala matuiā. E tatau ona faailoa atu agasala matuiā ma taulimaina e uso taʻimua o le faapotopotoga. (Levitiko 5:1; Faataoto 29:24) O se gaoioiga matuā lē alofa ma e lē faale-Tusi Paia foʻi, le faatagaina o ē faia agasala matuiā e faaauau ona faileagaina ē e lē sala.—1 Korinito 5:9-13.

¹⁴ O le tele o taimi, e lē matuiā masei ma mea sesē e faia e uso talitonu. E iai taimi tatou te sesē uma ai i upu ma gaoioiga, ma lē fiafia pe faatigā ai le tasi i le isi. (Iakopo 3:2) Pe e ao ea ona tatou vavevave e faailoa atu masei o isi? E pau le mea e maua ai o le fevaevaeaʻi o le faapotopotoga. (Efeso 4:1-3) Pe afai e puleaina i tatou e le alofa, tatou te lē faia “fua ni tala” e faatatau i masei o se uso tapuaʻi. (Salamo 50:20) E pei ona ufiufi e le palasa ma le vali mea ua faalētonu i puipui o se fale, e faapena foʻi ona ufiufi e le alofa ia vaivaiga o isi.—Faataoto 17:9.

¹⁵ E uunaʻia i tatou e le alofa e fesoasoani atu i ē o iai le manaʻoga moni. A o faasolo pea ina leaga tulaga o aso e gata ai, e ono iai taimi e manaʻomia ai e o tatou uso talitonu le fesoasoani faaletino. (1 Ioane 3:17, 18) O se faaaʻoaʻoga, po o feagai se tasi i la tatou faapotopotoga ma ni tulaga faigatā tautupe pe ua vāea mai le galuega? Atonu e mafai ona tatou ofoina atu i ai se fesoasoani i meafaitino, pe a tusa ma o tatou tulaga. (Faataoto 3:27, 28; Iakopo 2:14-17) Po o manaʻomia ona faaleleia le fale o se tuafafine matua ua oti lana tane? Atonu e mafai ona tatou taulamua e avatu se fesoasoani talafeagai e faaleleia ai.—Iakopo 1:27.

¹⁶ O lo tatou alofa mo isi, e lē faatapulaa na o i latou e alaala i lo tatou vaipanoa. E iai taimi tatou te faalogo ai i lipoti i auauna a le Atua i isi atunuu o ē ua afāina ona o matagi mataʻutia,  mafuiʻe po o fetauaʻiga i totonu lava o atunuu. Latou te ono matuā moomia ni meataumafa, lavalava ma isi mea. E lē tāua pe e ese lo latou atunuu po o le ituaiga. Tatou te “alolofa atu i le ʻau uso” uma. (1 Peteru 2:17) E pei o uluaʻi faapotopotoga, tatou te naunau e lagolagoina taumafaiga laveaʻi ua faamaopoopoina e saunia le fesoasoani. (Galuega 11:27-30; Roma 15:26) Pe a tatou faaalia le alofa i auala uma na, e faamalosia ai le fusi lea ua autasia ai i tatou i nei aso e gata ai.—Kolose 3:14.

¹⁷ O le alofa ua uunaʻia ai i tatou e tufa atu i isi, le tala lelei o le Malo o le Atua. Seʻi tōmanatu foʻi i le faaaʻoaʻoga a Iesu. Aiseā na ia talaʻi ai ma aʻoaʻo atu? Na ‘mutimuti vale lona alofa’ mo le motu o tagata ona o lo latou tulaga malapagā faaleagaga. (Mareko 6:34) Na tuulafoaʻia ma taʻitaʻi sesē i latou e o latou leoleo mamoe i lotu sesē, o ē na tatau ona aʻoaʻoina i latou i upu moni faaleagaga ma avatu i ai se faamoemoe. Ona o le mutimutivale o lona alofa faamaoni mo i latou, na faamāfanafana ai e Iesu tagata i le “tala lelei o le malo o le Atua.”—Luka 4:16-21, 43.

¹⁸ I aso nei foʻi, e toʻatele tagata ua tuulafoaʻia ma taʻitaʻiina sesē faaleagaga e aunoa ma se faamoemoe. Afai e pei i tatou o Iesu ma tatou matuā magafagafa i manaʻoga faaleagaga o isi o ē e lē iloa le Atua moni, o le a uunaʻia i tatou ona o lo tatou alofa mutimutivale, e tufa atu iā i latou le tala lelei o le Malo o le Atua. (Mataio 6:9, 10; 24:14) Pe a fua i le utiuti o le taimi o totoe, ua sili nei ona faanatinati le talaʻia o le feʻau faasaoola.—1 Timoteo 4:16.

“Ua Lata Mai le Gataaga o Mea Uma Lava”

¹⁹ Manatua foʻi, na faatomua e Peteru lana fautuaga ina ia alofa le tasi i le isi i upu nei: “Ua lata mai le gataaga o mea uma lava.” (1 Peteru 4:7) Ua toe o se aga ona suia lea o lenei lalolagi amioleaga e le lalolagi fou amiotonu a le Atua. (2 Peteru 3:13) O lea la, e lē o se taimi lenei tatou te manatu māmā ai. Na lapataʻia i tatou e Iesu: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuaseʻi mai lea aso iā te outou e pei o se mailei.”—Luka 21:34, 35.

²⁰ O lea la, ia faaauau ona tatou “mataala” ma nofouta i taimi o loo tatou ola ai. (Mataio 24:42) Ia tatou faaeteete i so o se faaosoosoga a Satani e ono maileia ai i tatou. Aua lava neʻi o tatou tuua le faaalia o le alofa i isi ona o uiga lē alofa o lenei lalolagi. O le sili i na mea uma, seʻi o tatou faalatalata atili iā Ieova le Atua o lē ana le Malo faa-Mesia, lea ua toeitiiti ona faataunuuina lana fuafuaga matagofie mo lenei lalolagi.—Faaaliga 21:4, 5.

[Faaopoopoga i lalos]

FESILI O LE SUʻESUʻEGA

• O le ā le fautuaga faamavae a Iesu i ona soo, ma o le ā e faaalia ai na iloa e Peteru le tāua o lenā fautuaga? (Pala. 1-2)

• O le ā le “alofa naunau”? (Pala. 3-5)

• Aiseā e ao ai ona tatou fealofani? (Pala. 6-8)

• E mafai faapefea ona e faaalia lou alofa mo isi? (Pala. 9-18)

• Aiseā e lē o se taimi lenei e manatu māmā ai, ma o le ā tatou te naunau e fai? (Pala. 19-20)

[Ata i le itulau 29]

O se aiga māfana ua sauniunia lelei e feagai ma omiga i nei aso e gata ai

[Ata i le itulau 30]

O le alofa e uunaʻia ai i tatou e fesoasoani i ē o iai le manaʻoga moni

[Ata i le itulau 31]

O se gaoioiga alofa le tufa atu i isi o le tala lelei o le Malo o le Atua