Mataupu 1

Autasia i le Tapuaiga—O le ā e Ao ona Uiga aʻi mo Oe?

1, 2. (a) I le ā le faavae ua maua ai le autasi moni faaletapuaiga i o tatou aso? (e) Ua faapefea ona faamatala e le Tusi Paia le mea o loo tupu?

I LE lalolagi atoa ua iai se gaoioiga faamaniti tino i le autasi faaletapuaiga. Ua tosina faatasi ai tagata o atunuu uma, ituaiga ma gagana. O lo latou autasi e lē mafua mai i le lē faamaoni tau talitonuga. E leʻi ausiaina foi ona ua latou taumamao mai le faitioina o auala o le olaga lea e feteenai ma le Afioga a le Atua. Ae o le ā la ua mafua ai? O le mea moni, ona ua iloa e tagata o so o se talaaga o le soifuaga e faapea, o Ieova o le Atua moni e toatasi, ma ua malilie ai ina ia ogatasi o latou olaga ma ona ala amiotonu.—Faatusatusa i le Faaaliga 15:3, 4.

² O le faataunuuga lenei o se valoaga sa faamaumauina i ni tausaga e 2,700 ua mavae e le perofeta o Mika. Na ia tusia e faasino i “aso e gata ai,” e faapea: “E o mai lava nuu ese e tele, ma latou faapea ane, O mai ia, tatou o ae ia i le mauga o Ieova, o le fale foi o le Atua o Iakopo; e aʻoaʻo mai ai o ia ia te i tatou i ona ala, ona tatou savavali ai lea i ona ala.” (Mika 4:1, 2) * Ua e vaaia ea o faatinoina lena mea?

3, 4. (a) E moni faapefea ua liliu atu “nuu ese” ia Ieova? (e) O ā fesili e ao ona tatou fesiligia ai i tatou lava?

 ³ E leai ni “nuu ese” ua tuuina atu uma i latou lava i le maota faaleagaga o Ieova mo le tapuaiga. Ae ua faia faapea e tagata taitoatasi mai na atunuu. A o latou aʻoaʻoina le fuafuaga alofa a Ieova le Atua atoa ma lona peresona tausaafia, ua faapea ona uunaia loloto ai o latou loto. I le aga maulalo ua latou saili ai ia iloa po o ā ua manaomia e le Atua mai ia te i latou. Ua pei la latou tatalo o le tatalo a Tavita, o se tane faatuatua o lē na faapea mai: “Ia e aʻoaʻo mai ia te au e fai lou finagalo; auā o oe lava loʻu Atua.”—Sala. 143:10.

⁴ O e vaaia ea oe i le lotolotoi o lena motu o tagata e toatele o ē tapuai a Ieova? Po o faamaonia ea i lau tali atu i faatonuga ua mauaina e te talisapaia moni faapea o na faatonuga e mai ia Ieova? O le ā le tele o loo e ‘savali ai i ona ala’?

LE AUALA E FAATAULAUINA AI

5. (a) O le ā le tele o le a oo ina taulau ai le autasi i le tapuaiga? (e) Aisea e ao ai ona faanatinati le avea o sē tapuai nei ia Ieova, ma e mafai faapefea ona tatou fesoasoani i isi ia faia lenei mea?

⁵ O le fuafuaga a Ieova o le autasia lea o foafoaga atamamai uma i le tapuaiga—e aunoa ma se tasi e taitaiseseina e le pepelo, leai se tasi e tautevateva solo ona ua lē taulau ona iloa le uiga moni o le olaga. Ua loa ona tatou momoo mo le aso o le a faamanuina ai e i latou uma o ē ola le Atua moni e toatasi! (Sala. 103:19-22) Peitai a o leʻi mafai ona taunuu lena mea, e tatau ia Ieova ona faamamāina ana foafoaga mai ē o loo faaletaualoaina lana pule faatupu alofa ma ē finafinau pea e faaleagaina le olaga mo isi. I le alofa mutimutivale ua ia muai faailoa atu ai le mea o le a ia faia. Ua iai le avanoa i tagata i so o se mea e suia ai o latou ala. I o tatou lava aso ua talo atu ai i le lalolagi aoao lenei valaau faanatinati e faapea: “Ia outou matatau i le Atua, ma avatu ia te ia le viiga,  auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” (Faaa. 14:6, 7) Ua e talia ea lena valaau? Afai o lea, ua ia te oe nei la le faaeaga e galulue faatasi ai ma le faalapotopotoga a Ieova e fesoasoani atu i isi ia faia faapea.

6. A maeʻa ona aʻoaʻoina aʻoaʻoga faavae o le Tusi Paia, o le ā le agaʻi atili i luma e ao ona tatou taumafai vilivilitai e faia?

⁶ E lē o le fuafuaga a le Atua ina ia aumaia i totonu o lana faalapotopotoga tagata o ē na ona fai mai latou te talitonu ia Ieova ma faapea latou te mananao e ola i le Parataiso ae i le taimi lava e tasi ua faaauau pea ona sailia o latou lava lelei manatu faapito. O lona manaoga mo tagata ia oo ina “iloa lelei o lona finagalo,” ma e ao ona faaatagia lenei mea i o latou olaga. (Kolo. 1:9, 10) A maeʻa ona aʻoaʻoina e tagata loto talisapaia aʻoaʻoga faavae o le Tusi Paia, latou te manaomia ona tausinio ia taumatuaina faa-Kerisiano. O lo latou faanaunauga ia matuā iloa lelei Ieova, ia faalautele ma faalolotoina lo latou malamalamaga i lana Afioga, ma ia faatatauina atoatoa i o latou olaga. Latou te saili ia pei o lo latou Tamā faalelagi, i le faaatagiaina o ona uiga ma le vaai totoʻa i mataupu e pei ona ia faia. Ua uunaia ai i latou e lenei mea ina ia sailia auala e saosaolaumea ai i le atoatoa e mafai ai i le galuega ua ia finagalo e faia i le lalolagi i o tatou aso. Po o le mea ea lena o loo e faia?—Efe. 5:1; Epe. 5:12–6:3; 1 Timo. 4:15.

7. O ā auala ua mafai ai nei ona maua le autasi moni, ma e faapefea ona faataulauina?

⁷ Ua folasia e le Tusi Paia faapea o i latou o ē auauna ia Ieova e tatau ona avea ma tagata autasi. (Efe. 4:1-3) O lenei autasi e ao ona iai nei, e ui ina o loo tatou ola i se lalolagi fevaevaeai ma o loo tauivi pea ma o tatou lava lē lelei atoatoa. Sa tatalo faatauanau Iesu ina ia tasi ona soʻo uma lava, e olioli i le autasi moni. O le ā le uiga o lenei mea? Muamua  e ao ona latou maua se faiā lelei ma Ieova ma lona Alo. I le ma lea foi ia autasi i latou uma taitoatasi. (Ioa. 17:20, 21) Ua faatinoina nei lea mea a o latou faatatauina le faatonuga ua maua mai i le “fale” o Ieova.

O Ā ITU E SAOSAOLAUMEA I LE AUTASI?

8. (a) O le ā tatou te atiina aʻe pe a tatou faaaogā totino le Tusi Paia e fefulisai ai tali o fesili e aafia ai i tatou? (e) I le taliina o fesili ua lisiina i luga, auiliili itu o loo saosaolaumea i le autasi faa-Kerisiano.

⁸ O nisi o itu faitaulia o loo saosaolaumea i lenei autasi ua faanumeraina i lalo. A o e taliina fesili o loo mulimuli mai, manatu ane pe faapefea i fesili taitasi ona aafia ai lau lava faiā ma Ieova atoa ma aumea Kerisiano. O le fefulisaia o ia manatu i le malamalama o nei mau o le a saosaolaumea lea i lou atiina aʻe o le poto faalemafaufau ma le utaga e faaautu i le Atua, o ni uiga tatou te manaomia uma. (Faata. 5:1, 2; Fili. 1:9-11) O lea ia faasolosolo ona iloiloina taitasi nei itu:

(1) Tatou te tapuai uma lava ia Ieova ma amanaiaina lana aiā e faataatia ai tapulaa i mea e lelei ma leaga.

O le ā le silasila a Ieova pe a tatou faaleamanaiaina ma le loto i ai lana fautuaga i se mea e foliga e faatauvaa ia i tatou? (Luka 16:10; faatusatusa i le Malaki 1:6-8.)

Pe aafia ai nisi pe afai tatou te lē usiusitai i poloaiga a Ieova i taimi uma? (Faatusatusa i le Roma 5:12; Iosua 7:20-26; 1 Tupu 14:16.)

(2) So o se mea tatou te iai i le lalolagi, ua ia i tatou le Afioga a le Atua e taitaia i tatou.

Pe a tatou faia faaiuga, o le ā le matautia o loo iai i le tau ā ina faia o le mea ua tatou “lagona” e saʻo? (Iere. 17:9; Faata. 14:12)

Afai tatou te lē iloa po o le ā le fautuaga a le Tusi Paia i se mea e tulai mai, o le ā e ao ona tatou faia? (Faata. 2:3-5)

(3) Tatou te maua uma aogā mai le polokalama e tasi o le fafagaina faaleagaga.

 O ā tulaga o loo iai ia i latou o ē lē sapaitalia faatulagaga a Ieova mo le fafagaina faaleagaga? (Faatusatusa i le Isaia 1:3; 9:16; 65:14.)

(4) O lo tatou Taʻitaʻi o Iesu Keriso, ae lē o se tagata, ma o ia lē ua tatou faalatalata uma atu ai ia Ieova i le tapuaiga.

Pe iai se mafuaaga tatau i so o se tasi o i tatou e talitonu ai faapea e sili i tatou i lo isi? (Roma 3:23, 24; 12:3; Mata. 23:8-10)

(5) E tusa lava po o fea tatou te nonofo ai, tatou te vaavaai atu i le Malo o le Atua e na o lea le faamoemoe mo tagata.

Ua faapefea i lenei mea ona leoleo maluina i tatou mai aafiaga e fevaevaeai ai? (Mata. 6:9, 10; Mika 4:3)

(6) O loo fuaina mai e le agaga paia i tagata tapuai o Ieova uiga e matuā tāua i le autasi faa-Kerisiano.

E faapefea ona tatou tatalaina le avanoa mo le agaga o le Atua e fuaina ai ona fua i totonu o i tatou? (Sala. 1:2; Faata. 22:4; Faaa. 3:6; Galu. 5:32)

E faapefea i lo tatou mauaina o fua o le agaga ona aafia ai la tatou faiā ma Ieova? Ma o tatou uso? (Kala. 5:22, 23)

(7) Ua ia i tatou uma lava le avega tauave e talaʻi ai le tala lelei o le Malo o le Atua.

E faapefea i lo tatou toaaga e auai i lenei galuega talaʻi faatasi ma aumea Kerisiano ona taaʻina ai o tatou lagona ia i latou? (Faatusatusa i le Kolose 4:7, 11.)

9. O le ā le iuga pe a tatou matuā faatatauina ia upu moni i o tatou lava olaga?

⁹ O le amanaiaina o nei mea moni ua na o se mea e tasi. Ae o le ola e tusa ai ma na mea e manaomia ai ni mea e sili atu. Peitai a tatou faatinoina, e tosina vavalalata ai i tatou ia Ieova. E avea foi lo tatou miomio faatasi ma aumea talitonu o se puna o le faafouina. E pei ona taʻua i le Salamo 133:1: “Faauta, o le mea e matuā lelei ma le matagofie lava, pe a nonofo faatasi lava o uso.” Pe e te leʻi tofo totino ea i le faafouina e mafai ona maua i le taumamao mai le lalolagi, ma ona manatu faapito uma, ae auai i sauniga faatasi ma isi o ē alolofa moni ia Ieova?

 ALOFIA AAFIAGA E FEVAEVAEAI AI

10. Aisea e manaomia ai ona tatou faaeteete ia alo ese mai le agaga fia tutoatasi?

¹⁰ Ina ia lē faaleagaina lena autasi tautele, e tatau ona tatou alo ese i aafiaga e fevaevaeai ai. O se tasi o aafiaga e taulamua ai o le agaga lea o le fia tutoatasi. Ua fesoasoani mai Ieova ia i tatou ina ia alofia e ala i le folasiaina o lona tupuga, o Satani le Tiapolo lea. O ia lena na olegiaina Eva e manatu faapea o le a lelei mo ia ona fulitua i le mea na fetalai ai le Atua ae faia ana lava faaiuga. Sa faatasi atu Atamu ia te ia i lena ala fouvale. O le taunuuga, o le malaia lea mo i laua ma i tatou. (Kene. 2:16, 17; 3:1-6, 17-19) O loo tatou ola i se lalolagi ua lofia i lena agaga fia tutoatasi, o lea tatou te lē maofa ai pe afai e manaomia ona tatou pulea lena agaga ia i tatou lava. Ua fesoasoani ma le alofa Ieova ia i tatou e faia faapea e ala i fautuaga mai lana faalapotopotoga.

11. O le ā o le a faaalia ai pe o tatou sauniuni moni mo le olaga i le Faiga Fou amiotonu a le Atua?

¹¹ O le faalapotopotoga lena ua tatou iloa mai ai le folafolaga matagofie a Ieova i le suia o le siomaga o loo iai nei, i se lagi fou ma se lalolagi fou e “mau ai le amiotonu.” (2 Pete. 3:13) Tatou te nenee ona o le faamoemoe faapea ua toe o se aga ona mavae lea o lenei lalolagi amioleaga ae o le a toe fuataʻiina le laueleele i se Parataiso. Peitai po o faaalia ea i le auala o o tatou lava olaga faapea o loo tatou sauniuni ma le naunautai mo le olaga i se lalolagi o le a avea ai le amiotonu o se gaoioiga masani? Ua taʻu manino mai e le Tusi Paia ia i tatou: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā.” (1 Ioa. 2:15) E moni e tele mea i le lalolagi e leai se tasi o i tatou e manao i ai. Ae pe iloga ea ona tatou inoino i vala o le lalolagi nā e fai ma pona i lo tatou  lava olioli i le olaga i le taimi nei? Po o tatou teteeina ea lona agaga—lona uiga fia tutoatasi, lona soona manatu mo ia lava? Faamata o fai moni ma a tatou masani le faalogo ia Ieova ma usiusitai ia te ia mai o tatou loto, e ui lava i ni faanaunauga tetee o le loto ona o le lē lelei atoatoa? O lo tatou ala atoa o le olaga—e tusa lava po o fea tatou te iai, e tusa lava po o ā mea o tatou fai—ae ao ona avatuina ai faamaoniga e faapea o o tatou manatu ma uunaiga o o tatou loto e faaautu i le Atua.—Faata. 3:5, 6.

12. (a) Aisea e tāua ai nei ona pue le avanoa e aʻoaʻoina ala o Ieova ma mulimuli i ai i o tatou olaga? (e) O le ā le uiga o nei mau o loo i le palakalafa ia i tatou taitoatasi?

¹² Pe a oo mai le taimi atofa a Ieova mo le faaumatiaina o lenei faiga amioleaga o mea ma i latou uma o ē alolofa i ona ala, o le a ia lē faatuai. O le a ia lē tolopoina lena taimi pe suia ana faatulagaga ina ia faamalieina ai i latou o loo taumafai pea e pipii i le lalolagi, i latou o ē faalotolotolua i le aʻoaʻoina o le finagalo o le Atua ma faatinoina. O nei la le taimi e gaoioi ai! (Luka 13:23, 24; 17:32; 21:34-36) O lea, maeu le faamafanafana loto i le maimoaina o le “motu o tagata e toatele” o ē ua mauaina lenei avanoa tautele, ma naunau e sailia faatonuga ua saunia e Ieova e ala i lana faalapotopotoga alofa ma savavali ai ma le autasi i ona ala!

[Faaopoopoga i lalo]

Talanoaga Autalu

● O le ā le fuafuaga a Ieova e faatatau i le tapuaiga?

● A maeʻa ona aʻoaʻoina aʻoaʻoga faavae o le Tusi Paia, o le ā le agaʻi i luma atili e ao ona tatou saili ma le vilivilitai e fai?

● O le ā e mafai ona tatou faia taitoatasi, ina ia faaaafia ai o tatou olaga e pei ona tatau ai, i itu e autasia ai ia ua tatou talanoaina?

[Fesili mo le Suʻesuʻega]

 [Ata atoa i le itulau 4]