Numera 28:1-31
28 Ua toe fetalai mai Ieova iā Mose:
2 “Ia e poloaʻi atu i le fanauga a Isaraelu, ma ia e faapea atu iā i latou, ‘Ia outou aumaia pea iā te aʻu o aʻu taulaga, o laʻu meaʻai. O aʻu taulaga ua faia i le afi, o se manogi lelei iā te aʻu,* e tatau ona fai i taimi ua atofaina.’+
3 “Ia e fai atu iā i latou, ‘O le taulaga lenei e tou te avatu iā Ieova ua faia i le afi: e lua tamaʻi mamoe poʻa e matuā lelei lava e taʻitasi tausaga, mo aso taʻitasi e fai ma taulaga mū faifai pea.+
4 E te fai taulaga i le isi tamaʻi mamoe poʻa i le taeao, a o le isi tamaʻi mamoe poʻa e te fai taulaga ai i le afiafipō,*+
5 e te avatu faatasi ma ia taulaga le taulaga i meaʻai,+ ua faia i le tasi vaesefulu o le efa* o le falaoamata lelei, ua liligi i ai le tasi vaefā o le sinu* o le suāuu olive ua tuʻia.
6 O le taulaga mū faifai pea,+ lea sa faavaeina i le mauga o Sinai o se manogi lelei,* o le taulaga iā Ieova ua faia i le afi,
7 faatasi ma taulaga i meainu, o le tasi vaefā o le sinu mo tamaʻi mamoe poʻa taʻitasi.+ Ia liligi atu le ʻava malosi i le mea paia e fai ma taulaga i meainu iā Ieova.
8 E te fai taulaga i le isi tamaʻi mamoe poʻa i le afiafipō.* E te faia faatasi foʻi ma le taulaga i meaʻai e pei ona faia i le taeao, e faapea foʻi i le taulaga i meainu, e te ofo atu o se taulaga ua faia i le afi, o se manogi lelei lea iā* Ieova.+
9 “‘Peitaʻi i le aso Sapati,+ ia e ofo atu ni tamaʻi mamoe poʻa se lua e taʻitasi tausaga e matuā lelei lava, ma le lua vaesefulu o le efa o le falaoamata lelei ua iai sina suāuu e fai ma taulaga i meaʻai, faatasi ma le taulaga i meainu.
10 O le taulaga mū lea mo le Sapati, faatasi ma le taulaga mū faifai pea ma taulaga i meainu.+
11 “‘I le amataga o masina ta‘itasi,* ia outou aumaia ni tamaʻi povi poʻa se lua, o le mamoe poʻa e tasi, ma tamaʻi mamoe poʻa e fitu e matuā lelei lava e taʻitasi tausaga, e fai ai le taulaga mū iā Ieova,+
12 ma le tolu vaesefulu o le efa o le falaoamata lelei ua iai sina suāuu e fai ma taulaga i meaʻai+ mo povi poʻa taʻitasi, ma le lua vaesefulu o le efa o le falaoamata lelei ua iai sina suāuu, e fai ma taulaga i meaʻai mo le mamoe poʻa e tasi,+
13 ma le tasi vaesefulu o le efa o le falaoamata lelei ua iai sina suāuu, e fai ma taulaga i meaʻai mo tamaʻi mamoe poʻa taʻitasi, e fai ai le taulaga mū, o se manogi lelei lea,*+ o se taulaga iā Ieova ua faia i le afi.
14 O taulaga i meainu e tatau ona iai le ʻafa o le sinu o le uaina mo se povi poʻa,+ o le tasi vaetolu o le sinu mo le mamoe poʻa,+ ma le tasi vaefā o le sinu mo le tamaʻi mamoe poʻa.+ O le taulaga mū lenei i masina taʻitasi i masina uma o le tausaga.
15 E ao foʻi ona fai le taulaga i le tamaʻi ʻoti e tasi, e fai ma taulaga o agasala iā Ieova e ese mai i le taulaga mū faifai pea lea e fai faatasi ma le taulaga i meainu.
16 “‘O le masina muamua, i le aso lona 14 o le masina, e fai ai le Paseka a Ieova.+
17 E fai le tausamiga i le aso 15 o lea masina. E ʻai ai falaoa e lē faafefeteina mo aso e fitu.+
18 O le aso muamua e fai ai le tauaofiaga paia. Aua tou te faia ai ni galuega mamafa.
19 E tou te aumaia tamaʻi povi poʻa e lua, o le mamoe poʻa e tasi ma tamaʻi mamoe poʻa e fitu e taʻitasi tausaga, ina ia fai ai ni taulaga i le afi, o le taulaga mū lea iā Ieova. E ao ona outou avatu manu ua matuā lelei lava.+
20 E ao ona outou avatu faatasi ma na manu taulaga i meaʻai, o le falaoamata lelei ua iai sina suāuu,+ o le tolu vaesefulu o le efa mo le povi poʻa, ma le lua vaesefulu o le efa mo le mamoe poʻa.
21 E te avatu le tasi vaesefulu o le efa mo tamaʻi mamoe poʻa taʻitasi e fitu,
22 ma le ʻoti e tasi e fai ai le taulaga o agasala ina ia fai ma togisala mo outou.
23 E tou te fai taulaga i ia mea e ese mai i le taulaga mū o le taeao, lea e fai ma taulaga mū faifai pea.
24 O le auala lava lea e tou te fai ai le taulaga i ia mea i aso taʻitasi mo aso e fitu o meaʻai* ia, o le taulaga ua faia i le afi, o se manogi lelei lea iā* Ieova. E ao ona avatu faatasi ma le taulaga mū faifai pea atoa ai ma le taulaga i meainu.
25 E ao ona outou faia se tauaofiaga paia i le aso lona fitu.+ Aua tou te faia ai ni galuega mamafa.+
26 “‘I le aso o uluaʻi fua ua matutua,+ pe a outou avatu a outou taulaga i meaʻai fou iā Ieova,+ e ao ona outou faia se tauaofiaga paia i la outou tausamiga o vaiaso.+ Aua tou te faia ai ni galuega mamafa.+
27 E tou te avatu ni tamaʻi povi poʻa se lua, o se mamoe poʻa e tasi, ma tamaʻi mamoe poʻa e fitu e taʻitasi tausaga, e fai ai le taulaga mū, o se manogi lelei lea iā* Ieova,+
28 ma o taulaga i meaʻai e avatu faatasi ma ia manu, o le tolu vaesefulu o le efa o le falaoamata lelei ua iai sina suāuu mo povi poʻa taʻitasi, o le lua vaesefulu o le efa mo le mamoe poʻa e tasi,
29 o le tasi vaesefulu o le efa mo tamaʻi mamoe poʻa taʻitasi o tamaʻi mamoe poʻa e fitu,
30 atoa ma le tama‘i ʻoti e tasi e fai ai le togisala mo outou.+
31 E tou te faia ia taulaga e ese mai i taulaga mū faifai pea ma taulaga i meaʻai. E ao ona matuā lelei lava ia manu,+ atoa ai ma taulaga i meainu.
Faamatalaga Pito i Lalo
^ Po o le “manogi ua faamalieina ai aʻu.”
^ Epe., “le vā o afiafi e lua.”
^ Po o le “manogi e faamalieina ai.”
^ Po o le “manogi ua faamalieina ai.”
^ Epe., “le vā o afiafi e lua.”
^ Epe., “o o outou masina.”
^ Po o le “manogi e faamalieina ai.”
^ Epe., “falaoa.”
^ Po o le “manogi ua faamalieina ai.”
^ Po o le “manogi ua faamalieina ai.”
