Numera 20:1-29
20 I le masina muamua, ua ō atu ai le faapotopotoga atoa o le fanauga a Isaraelu i le toafa o Tisina, ma ua nonofo ai i le nuu o Katesa.+ O i inā na oti ai Miriama+ ma tanu ai o ia.
2 Ua leai se vai mo le faapotopotoga,+ ona latou faapotopoto ai lea ma tetee atu iā Mose ma Arona.
3 Ua finau tagata ma Mose+ ma ua latou faapea mai: “Sa sili ai pe ana matou feoti i le taimi na feoti ai o matou uso i luma o Ieova!
4 Aiseā ua oulua aumaia ai le faapotopotoga a Ieova i lenei toafa, ina ia matou feoti ma mamate ai a matou lafumanu?+
5 Aiseā foʻi ua oulua aumaia ai i matou mai i Aikupito ma tuu i matou i lenei nofoaga leaga?+ E lē ola ai i lenei mea ni fatu, o mati, o vine, ma rimoni, ma e leai foʻi ni vai e feinu ai.”+
6 Ua ō atu Mose ma Arona mai i luma o le faapotopotoga i le faitotoʻa o le faleʻie o le feiloaʻiga, ua faapaʻuʻū faō, ona faaali mai lea o le mamalu o Ieova iā i laʻua.+
7 Ua fetalai mai Ieova iā Mose:
8 “Ia tago i le tootoo ma faapotopoto mai le faapotopotoga, o oe ma Arona lou uso a o vāai mai i latou, ma ia lua tautatala atu i le papa ina ia tafe mai ai le vai; ma e te aumaia le vai mo i latou mai i le papa e feinu ai le faapotopotoga ma a latou lafumanu.”+
9 Ona ave lea e Mose o le tootoo mai i luma o Ieova,+ e pei ona Ia poloaʻi mai ai iā te ia.
10 Ona faapotopoto ai lea e Mose ma Arona o le faapotopotoga i luma o le papa, ona ia fai atu lea iā i latou: “O outou tagata fouvale, faalogo mai ia! Pe e ma te aumaia ea mai i lenei papa se vai mo outou?”+
11 Ua sii i luga e Mose lona lima ma tā faalua le papa i lona tootoo, ona tafe tele mai ai lea o le vai, ma ua feinu ai le faapotopotoga ma a latou lafumanu.+
12 Mulimuli ane ua fetalai mai Ieova iā Mose ma Arona: “Ona ua oulua lē faatuatua mai iā te aʻu ma ua lē faapaiaina aʻu i luma o le fanauga a Isaraelu, o lea, o le a oulua lē avatua lenei faapotopotoga i le laueleele ou te foa‘iina atu iā i latou.”+
13 O vai nei o Meripa,*+ ia na finau ai le fanauga a Isaraelu ma Ieova, ma ua faapaiaina ai o ia i lea mea i luma o tagata.
14 Ua auina atu e Mose ni avefeʻau mai i Katesa i le tupu o Etoma:+ “O le tala lenei a lou uso o Isaraelu+ e faapea, ‘Ua e silafia lelei faigatā uma na oo iā i matou.
15 Na ō o matou tamā i Aikupito+ ma na matou nonofo ai pea i Aikupito mo le tele o tausaga,*+ na sauāina foʻi i matou ma o matou tamā e tagata Aikupito.+
16 Ona matou alalaga atu lea iā Ieova+ ma na ia faafofoga i o matou leo ma ia auina mai se agelu,+ ma aveese i matou mai i Aikupito; ona matou nonofo ai lea i Katesa, o se aai i le tuaoi o lou laueleele.
17 Faamolemole seʻi o matou ui atu i lou laueleele. E matou te lē ui i se fanua po o se togāvine, e matou te lē feinu foʻi i se vai o se vaieli. E matou te malaga i le Auala a le Tupu e aunoa ma le afe i le itu taumatau po o le itu tauagavale, seʻia matou sopoʻia lou laueleele.’”+
18 Peitaʻi ua tali mai Etoma iā te ia: “Aua neʻi e uia loʻu laueleele, ina neʻi oʻu alu atu ma le pelu e faafetaui ai oe.”
19 Ona fai atu lea o le fanauga a Isaraelu iā te ia: “E matou te ō aʻe i le ala tele; ma afai e matou te feinu ma a matou lafumanu i lou vai, e matou te avatu le tau o lea mea.+ E leai se mea matou te mananaʻo ai tau lava o lo matou savavali e ui atu ai.”+
20 Ae ua ia faapea mai lava: “Aua tou te ui ane.”+ Ona ō mai lea o Etoma ma tagata e toʻatele ma se ‘autau* malosi ina ia faafetaui iā te ia.
21 Ua lē faatagaina e Etoma Isaraelu e ui ane i lona laueleele, ona liliuese ai lea o Isaraelu mai iā te ia.+
22 Ua malaga ese le fanauga a Isaraelu, o le faapotopotoga atoa mai i Katesa ma ua oo atu i le mauga o Horo.+
23 Ona fetalai mai lea o Ieova iā Mose ma Arona i le mauga o Horo i le tuaoi o le laueleele o Etoma:
24 “O le a faatasia Arona ma ona tagata.*+ E lē ulu atu o ia i le laueleele ou te avatu i le fanauga a Isaraelu, talu ai ua oulua fouvale i laʻu faatonuga e tusa ai ma vai o Meripa.+
25 Ia aumai Arona ma Eleasaro lona atalii ma ave i laʻua i le mauga o Horo.
26 Ia tatala ese ofu ositaulaga o Arona,+ ma faaofu ai Eleasaro+ lona atalii; ma e oti Arona i inā.”*
27 Ona faia lea e Mose e pei ona poloaʻi mai ai Ieova, ma ua latou ō aʻe i le mauga o Horo a o vāai atu le faapotopotoga atoa.
28 Ona tatala lea e Mose o ofu ositaulaga o Arona ma faaofu ai Eleasaro lona atalii. Ona maliu ai lea o Arona i inā i le tumutumu mauga.+ Ua ō ifo Mose ma Eleasaro mai i le mauga.
29 Ua iloa e le faapotopotoga atoa ua maliu Arona, ona fetagisi ai lea o le aiga o Isaraelu i aso e 30+ ona o Arona.
Faamatalaga Pito i Lalo
^ Lona uiga “Finauga.”
^ Epe., “aso.”
^ Epe., “lima.”
^ O se faaupuga faafatusolo lea mo le oti.
^ Po o le “ma e faatasia Arona ma ona tagata ma oti ai i inā.”
