Numera 15:1-41
15 Ua fetalai mai pea Ieova iā Mose e faapea:
2 “Ia e fai atu i le fanauga a Isaraelu, ia e faapea atu iā i latou, ‘Pe a outou oo atu i le laueleele lea ou te tuuina atu iā te outou e tou te nonofo ai,+
3 ma outou avatu se taulaga iā Ieova ua faia i le afi mai i le lafu povi po o le lafu mamoe, e tusa po o se taulaga mū+ po o se taulaga e fai ai se tautoga faapitoa, po o se taulaga tauofo+ po o se taulaga i aso e fai ai a outou tausamiga,+ ina ia avea o se manogi lelei iā* Ieova,+
4 e ao i lē o loo aumaia lana taulaga ona ia avatu faatasi iā Ieova le taulaga i meaʻai o falaoamata lelei,+ e tusa ma le tasi vaesefulu o le efa* ua liligi i ai le tasi vaefā o le sinu* o le suāuu.
5 E te avatu fo‘i le uaina e fai ma taulaga i meainu, e tusa ma le tasi vaefā o le sinu, e avatu faatasi ma le taulaga mū+ po o taulaga o tamaʻi mamoe poʻa uma.
6 A faapea o se mamoe poʻa, e ao ona e avatu le taulaga i meaʻai e tusa ma le lua vaesefulu o le efa o le falaoamata lelei, ua liligi i ai le tasi vaetolu o le sinu o le suāuu.
7 E te avatu foʻi le uaina e fai ai le taulaga i meainu, e tusa ma le tasi vaetolu o le sinu, o se manogi lelei lea iā* Ieova.
8 “‘Ae afai e te avatu se povi poʻa e fai ai le taulaga mū+ po o se taulaga e faia ai se tautoga faapitoa,+ po o taulaga faifaatasi iā Ieova,+
9 ia avatu faatasi ma le povi poʻa le taulaga i meaʻai,+ o le tolu vaesefulu o le efa o le falaoamata lelei ua liligi i ai le ʻafa o le sinu o le suāuu.
10 E te avatu foʻi le uaina e fai ai le taulaga i meainu,+ e tusa ma le ʻafa o le sinu e fai ai le taulaga i le afi, o se manogi lelei lea iā* Ieova.
11 O le mea lea e fai i povi poʻa taʻitasi po o mamoe poʻa taʻitasi, po o tamaʻi mamoe poʻa taʻitasi po o ʻoti taʻitasi.
12 Po o le ā lava le aofaʻiga e tou te avatu, o le mea lava lea e tou te faia i manu taʻitasi e tusa ma lo latou aofaʻiga.
13 O le auala lenei e ao i tagatānuu uma o Isaraelu ona avatu ai le taulaga ua faia i le afi, o se manogi lelei lea iā* Ieova.
14 “‘Afai e iai se tagata ese o loo aumau iā te outou, po o se tasi ua iā te outou mo le tele o o outou tupulaga o loo mulimuli mai, e ao ona ia avatu se taulaga ua faia i le afi, o se manogi lelei lea iā* Ieova, e pei ona outou faia e faapea foʻi ona ia faia.+
15 E tasi le tulafono mo outou o tagata o le faapotopotoga, ma le tagata ese o loo aumau iā te outou. E fai ma tulafono tumau mo outou ma o outou tupulaga uma o loo mulimuli mai. E tutusa le tagata ese ma outou i luma o Ieova.+
16 E ao ona tasi le tulafono ma e tasi foʻi le iʻuga o faamasinoga mo outou, ma le tagata ese ua aumau iā te outou.’”
17 Ua fetalai mai pea Ieova iā Mose:
18 “Ia e fai atu i le fanauga a Isaraelu ma e faapea atu iā i latou, ‘Pe a outou taunuu atu i le atunuu ou te avatua i ai outou,
19 ma outou aai i meaʻai* o le laueleele,+ e ao ona faia sa outou foaʻi iā Ieova.
20 E tou te avatu a outou foaʻi o uluaʻi fua+ o fatu ua tuʻininii ua faia ai falaoa lapotopoto. E pei o le foaʻi e mai i le mea e soli ai saito,* e faapea foʻi ona outou foaʻi atu.
21 E tou te avatu foʻi nisi o uluaʻi fua o fatu ua tuʻininii e fai ma foaʻi iā Ieova, e faia e outou ma o outou tupulaga o loo mulimuli mai.
22 “‘Afai ua outou faia se sesē ma lē tausia mea uma ua poloaʻi mai ai Ieova iā Mose,
23 o mea uma na poloaʻi mai ai Ieova iā te outou e ala iā Mose mai i le aso na poloaʻi mai ai Ieova, ma faasolo atu ai i o outou tupulaga o loo mulimuli mai,
24 ma afai ua fai se mea sesē ma e lē iloa e le faapotopotoga, e avatu e le faapotopotoga atoa le tamaʻi povi poʻa e tasi e fai ma taulaga mū, o se manogi lelei lea iā* Ieova, atoa ma le taulaga i meaʻai, o le taulaga i meainu e tusa ma le faiga masani,+ ma le tamaʻi ʻoti e fai ai le taulaga o agasala.+
25 E fai e le ositaulaga le togisala mo le faapotopotoga atoa o le fanauga a Isaraelu, ona faamagaloina ai lea o i latou,+ auā o le mea sesē lea, ma na latou aumaia la latou taulaga, o le taulaga lea iā Ieova ua faia i le afi, ma la latou taulaga o agasala i luma o Ieova ona o a latou mea sesē.
26 E faamagaloina le faapotopotoga atoa o le fanauga a Isaraelu ma le tagata ese ua aumau iā i latou, ona o le mea sesē ua faia e tagata uma.
27 “‘Afai e faia e se tasi se agasala e aunoa ma le mafaufauina, e ao ona ia avatu se ʻoti fafine faatoʻā atoa le tausaga e fai ai le taulaga o agasala.+
28 E faia e le ositaulaga le togisala i luma o Ieova mo le tagata ua agasala ona o se mea sesē ua faia e aunoa ma le mafaufauina, e faia le togisala ona o lea mea, ma e faamagaloina o ia.+
29 E tasi le tulafono iā te outou, o tagatānuu o le fanauga a Isaraelu ma tagata ese ua aumau iā i latou, e tusa ma le faia o se mea e aunoa ma le mafaufauina.+
30 “‘Ae o le tagata e faia se mea ma le loto i ai,+ e tusa po o se tagatānuu po o se tagata ese e aumau, ua upuleaga o ia iā Ieova, e ao lava ona fasiotia o ia.
31 Auā ua ʻinoʻino o ia i le afioga a Ieova ma ua ia solia ana poloaʻiga, e fasiotia lava o ia.+ E paʻū i ona lava luga lana mea sesē.’”+
32 A o nonofo le fanauga a Isaraelu i le toafa, ua latou maua ai se tamāloa o fai fafie i le aso Sapati.+
33 Ona avatu lea o ia iā Mose ma Arona ma le faapotopotoga atoa e i latou na mauaina o ia o loo fai fafie.
34 Ua tuuina atu o ia e leoleoina+ ona e leʻi faailoa tuusaʻo mai le mea e fai iā te ia.
35 Ona fetalai mai lea o Ieova iā Mose: “Ia fasiotia lava o ia,+ ia fetogia o ia i maa e le faapotopotoga atoa i tua o le togālauapi.”+
36 Ona avatu lea o ia i tua o le togālauapi e le faapotopotoga atoa, ma ua latou fetogi iā te ia i maa ma oti ai o ia, e pei ona poloaʻi mai ai Ieova iā Mose.
37 Ona fetalai mai lea o Ieova iā Mose e faapea:
38 “Ia e fai atu i le fanauga a Isaraelu ia latou suʻi ni fele i le pito i lalo o o latou ofu, o i latou ma o latou tupulaga o loo mulimuli mai, e ao foʻi ona latou tuu ai se manoa lanu moana i luga aʻe o le fele i le pito i lalo o le ofu.+
39 ‘Ia outou fai lenei fele ina ia outou vāai i ai ma manatua poloaʻiga uma a Ieova ma tausia.+ Ia aua ne‘i outou usiusitaʻi i o outou loto ma o outou mata, auā e i‘u atu ai i lo outou faia o faiga faatalitane faaleagaga.+
40 Ua faia lenei mea ina ia outou manatua ai, ma ia outou tausia aʻu poloaʻiga uma, ma ia paia foʻi outou mo lo outou Atua.+
41 O aʻu o Ieova lo outou Atua, o lē na aumaia outou mai i le atunuu o Aikupito, ina ia faailoa atu iā te outou o aʻu o lo outou Atua.+ O aʻu o Ieova lo outou Atua.’”+
Faamatalaga Pito i Lalo
^ Po o le “manogi ua faamalieina ai.”
^ Po o le “manogi ua faamalieina ai.”
^ Po o le “manogi ua faamalieina ai.”
^ Po o le “manogi ua faamalieina ai.”
^ Po o le “manogi ua faamalieina ai.”
^ Epe., “falaoa.”
^ Pe e faasino atu foʻi i le karite.
^ Po o le “manogi ua faamalieina ai.”
