O le Tusi a Iuta 1:1-25
1 O aʻu o Iuta o se pologa a Iesu Keriso, ma o se uso o Iakopo.+ O le tusi lenei i ē ua valaauina+ ma ua alofagia e le Atua le Tamā, ma ua leoleoina mo Iesu Keriso:+
2 Ia faatuputeleina iā te outou le alofa mutimutivale, le filemu, ma le alofa o le Atua.
3 Le ʻaupele e, sa ou matuā naunau e tusi atu iā te outou e uiga i lo tatou faaolataga.+ A o lenei, e tatau ona ou tusi e fautua atu iā te outou ina ia finafinau mo le faatuatua,+ lea e na o le faatasi lava ona tuuina atu i le ʻaupaia.
4 Auā ua ō mai faananā isi tagata faalēmataʻu, o ē na muaʻi valoia i Tusitusiga Paia e oo i ai lenei faasalaga. Ua latou liua le agalelei faifua o lo tatou Atua, e fai ma faamolemolega e faia ai amioga faauamaaa,*+ ma ua lē faamaoni ai i lo tatou matai e toʻatasi ma le Alii, o Iesu Keriso.+
5 E ui lava ua outou iloa lelei nei mea uma, ae ou te fia faamanatu atu pea, na faaolaina e Ieova* tagata mai i le nuu o Aikupito,+ ae na mulimuli ane faaumatia e ia o ē na lē faatuatua.+
6 O agelu foʻi o ē e leʻi tumau i lo latou tulaga na iai muamua, ae na tuua le mea na tatau ona latou nonofo ai,+ ua taofia e ia i noataga e faavavau i le pogisa mo le faamasinoga i le aso tele.+
7 E faapena foʻi tagata o Sotoma ma Komoro ma aai na siʻomia ai, na faaauau ona latou faia amioga lē mamā taufeusuaʻiga,* ma faamalieina o latou tuʻinanauga matagā e lē masani ai.+ Ua fai i latou ma faaaʻoaʻoga e lapataʻia ai i tatou, auā na faasalaina i latou i le faaumatiaga* e faavavau.+
8 E ui i lea, o nei tagata fo‘i e moemiti i mea leaga, e latou te faaleagaina isi, ‘ino‘ino i le pule, ma fai upuleaga i ē e mamalu.+
9 Ae ina ua finau Mikaele+ le agelu sili+ ma le Tiapolo i le tino o Mose,+ e leʻi manaʻo o ia e lafo atu se upuleaga e faasala ai o ia,+ ae na ia faapea atu: “Tau ina ia aʻoaʻia oe e Ieova.”*+
10 Peitaʻi, ua upuleaga nei tagata i mea uma e latou te lē malamalama i ai.+ Ua pei i latou o meaola e leai ni mafaufau, e amioa‘i e pei o meaola i mea uma e latou te faia,+ ma ua faaleagaina ai i latou lava.
11 Oi talofa iā i latou, auā ua latou mulimuli i le ala o Kaino,+ ma taufetuli i le ala sesē o Palaamo+ ona o le taui, ma fano ai i latou i upu fouvale+ a Koru!+
12 O i latou o papa ua natia i le vai, a o latou aai faatasi ma outou i a outou faiga‘ai alofa,+ o i latou o leoleo mamoe ua aai ma le lē matataʻu;+ o ao ua leai ni vai ua feaveaʻi solo e matagi;+ o laau e lē fua mai i le faaiʻuga o le tau e afu ai mea, ua matuā mamate,* ma ua liaʻieseina.
13 Ua pei i latou o peau sousou o le sami, e aveina aʻe i le matafaga mea e lē mamā e tatau ona māsiasi ai.+ O i latou foʻi o fetu ua fegasoloa‘i, ua na ona faatali i le pogisa o le pōuliuli e faavavau.*+
14 O lea, na valoia mai e Enoka,+ o le lona fitu lea o augātamā mai iā Atamu, e uiga iā i latou na e faapea: “Faauta! ua afio mai Ieova* ma ana ʻaupaia e mano ni mano,*+
15 e faamasino i tagata uma,+ ma faasala i ē uma e amio faalēmataʻu e tusa ma a latou galuega leaga uma na faia ma le faalēmataʻu, e tusa foʻi ma upu faifai uma na faia iā te ia e tagata agasala faalēmataʻu.”+
16 O i latou o tagata muimui+ ma faitio i o latou lava olaga, ma amioaʻi e tusa ma o latou lava tu‘inanau,+ ua tautatala o latou gutu i upu faasausili, ma faaviivii atu i tagata* ina ia maua ai ni a latou mea.+
17 A o outou le ʻaupele e, ia manatua upu na muaʻi fai mai ai aposetolo* a lo tatou Alii o Iesu Keriso.
18 Na masani ona latou fai atu iā te outou: “O aso e gata ai* o le a iai ē tauemu, e amioaʻi e tusa ma o latou lava tuʻinanauga i mea leaga.”+
19 O i latou ia ua faatupuina fevaevaeaʻiga,+ e amio faamanu,* ma e lē taʻitaʻia e le agaga o le Atua.
20 A o outou le ʻaupele e, ia atiaʻe lo outou faatuatua e sili ona paia, ma tatalo i le ta‘ita‘iga a le agaga paia,+
21 ina ia outou faatumau ai iā te outou i le alofa o le Atua,+ a o faatalitali atu i le alofa mutimutivale o lo tatou Alii o Iesu Keriso, lea e iʻu ai i le ola e faavavau.+
22 Ia faaauau foʻi ona alolofa mutimutivale+ i ē o iai masalosaloga.+
23 Ia faaola iā i latou+ i le seʻi ese mai i le afi. Ia faaauau ona alolofa mutimutivale i isi, ia faia ma le mata‘u, ae ia outou ʻinoʻino i amioga ua pisia i le agasala.*+
24 O le Atua o lē na te leoleoina outou ina neʻi paʻuʻū i le agasala, ma ia lē ponā+ i luma o lona mamalu ma le olioli tele.
25 O ia o lo tatou Atua e toʻatasi o lo tatou Faaola lea, ia iā te ia i le taimi nei e ala iā Iesu Keriso lo tatou Alii, le viiga, le mamalu, le malosi ma le pule, e mai i le vavau e oo i le faavavau. Amene.
Faamatalaga Pito i Lalo
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Po o “amioga matagā taufeusuaʻiga.” Tagaʻi i le Uiga o Upu.
^ Ele., “afi.” Tagaʻi i le Uiga o Upu, “Kena.”
^ Ele., “mamate faalua.”
^ E faasino atu i le faaumatiaga e faavavau.
^ Po o le “faitau sefulu afe.”
^ Po o le “maofa i uiga o isi.”
^ Po o “mea na valoia e aposetolo.”
^ Ele., “I le taimi mulimuli.”
^ Po o le “o ni tagata faaletino.”
^ Ele., “ʻinoʻino i le ofu pito i totonu ua pisia i le tino.”
