Isaia 5:1-30
5 Faamolemole, seʻi oʻu pese atu i laʻu peleO se pese e uiga i laʻu pele ma lana togāvine.+
Na iai se togāvine a laʻu pele i luga o le aʻega o le laueleele e fua tele mai.
2 Na ia suatia le fanua ma aveese maa.
Ua ia totō ai vine mūmū e sili ona lelei,Na ia fausia ai se ʻolo i le ogatotonu,Ma ia tāina se mea e soli ai vine.+
Na ia faamoemoe o le a fua mai ai ni vine lelei,Ae na fua mai ai vine leaga.+
3 O lea ua ia faapea ane: “O lenei, o outou o ē nonofo i Ierusalema ma outou o tagata o Iuta,Faamolemole ia faamasino mai iā te aʻu ma laʻu togāvine.+
4 O le ā se mea e toe faia i laʻu togāvineOu te leʻi faia i ai?+
Aiseā foʻi na fua mai ai vine leaga,Ae na ou faamoemoe e fua mai ai ni vine lelei?
5 A o lenei faamolemole, seʻi oʻu faailoa atu iā te outouLe mea o le a ou faia i loʻu togāvine:
O le a ou aveesea le pā laau,Ma o le a susunuina le togāvine.+
O le a ou soloia i lalo ona pā maa,Ma o le a solia le togāvine.
6 Ou te tuu ai e pei ua faaumatia;+E lē teuina pe faamalūina le eleele.
O le a lilofia i vao tuitui ma vao leaga,+Ma ou te poloaʻi atu i ao ina ia aua neʻi totō ifo i ai se timu.+
7 Auā o le togāvine a Ieova o ʻau o le aiga lea o Isaraelu;+O tagata foʻi o Iuta o lana faatoʻaga lea na fiafia i ai.
Sa ia faamoemoe pea mo le faamasinotonu,+Ae faauta foʻi! ua iai faiga lē tonu;Sa ia faamoemoe mo le amiotonu,Ae faauta foʻi! o le ōi.”+
8 Oi talofa i ē e faaopoopoina isi fale i o latou fale,+Ma ē e faaopoopo isi fanua i o latou fanua+Seʻia lē toe iai se mea mo isiMa outou nonofo ai na o outou lava i le laueleele!
9 Na ou faalogo i le tautoga a Ieova o ʻau e faapea,O le tele o fale e ui ina tetelē ma matagofie,O le a avea ma mea e fefefe ai,Ma e leai se tasi e nofo ai.+
10 O le a fua mai e le sefulu eka o le togāvine, e na o le tasi le paita* o uaina,O le a fua mai foʻi e le tasi le somera* o fatu, e na o fua e tusa ma le tasi le efa.*+
11 Oi talofa iā i latou o ē e fealapō i le taeao ina ia inu i le ʻava malosi,+O ē e inu pea seʻia oo i le afiafipō, ma ua lē pulea a latou amio ona o le uaina!
12 E masani ona iai le kitara* ma le meafaifaaili e fai uaua,O le topa,* o le fagufagu ma le uaina i a latou faigaʻai;Ae latou te lē manatunatu i gaoioiga a Ieova,Ma latou te leʻi vāai foʻi i galuega a ona aao.
13 O le mea lea, e ave faapagota ai loʻu nuu i se isi atunuuOna o lo latou lē iloaina o aʻu;+O le a matelāina o latou tagata aloaʻia,+Ma e galala i le fia feinu o latou tagata uma.
14 O lea la, ua faalautele ai e le Tuugamau* o ia lavaMa faamaga lona gutu e leai se mea e gata mai ai;+O le a ō ifo lava i aiO ē maualuluga o i Ierusalema, ma ona tagata pisapisaō ma onanā e toʻatele.
15 O le a faamaulaloina le tamāloa,Ma taʻufaatauvaaina le tagata,E faamaulaloina foʻi mata o ē e faamaualuluga.
16 O le a faasilisilia Ieova o ʻau e ala i ana faamasinoga;O le Atua moni, o Lē e Paia,+ o le a ia faapaiaina o ia lava e ala i le amiotonu.+
17 E saʻoloto le aai a tamaʻi mamoe e pei o loo i o latou lava laufanua;E aai foʻi tagata ese i mea gaogao ia na nonofo muamua ai manu pepeti.
18 Oi talofa iā i latou ua latou toso le sesē i maea o le pepelo,Ma toso foʻi le agasala e pei o maea o loo toso ai se taavale toso;
19 O ē o loo faapea ane: “Ia faavave e Ia lana galuega;Ia vave ona oo mai, ina ia tatou vāai i ai.
Ia faataunuuina le finagalo o* Lē e Paia o IsaraeluIna ia tatou iloa ai!”+
20 Oi talofa iā i latou ua faapea mai e lelei le leaga, ma e leaga le lelei,+O i latou ua suia le pogisa i le malamalama, ma le malamalama i le pogisa,O i latou ua suia le mea oona i le mea suamalie, ma le mea suamalie i le mea oona!
21 Oi talofa i ē e popoto i o latou lava manatu,Ma e faautauta e tusa ma o latou lava taofi!+
22 Oi talofa i ē e inu tele i le uainaMa tagata e popoto i le suiina o le ʻava malosi,+
23 O i latou e taʻutonuina ē e amioleaga ona o faiga faaalatua+Ma lē faia le faamasinogatonu mo le tagata amiotonu!+
24 O lea, e pei ona faaumatia e le afi le tagutugutu o laauMa mou atu mutia mamago i le afi,E faapea foʻi ona pala o latou aa,Ma o le a mamago o latou fuga ma lelea e pei o le pauta,Ona ua latou teena le tulafono* a Ieova o ʻau,Ma lē āva i le afioga a Lē e Paia o Isaraelu.+
25 O le mea lea ua matuā toʻasā ai Ieova i lona nuu,E na te faaloaloa ai lona aao faasaga iā i latou ma taia i latou.+
O le a gatete mauga,Ma o le a pei o latou tino oti o ni otaota i le auala tele.+
Ona o nei mea uma, e leʻi liliuese ai lona toʻasā,Ae ua faaloaloa pea lona aao e taia i latou.
26 Ua ia faatū se faailoilo* mo se atunuu e mamao;+Ua ia tuufaaili atu iā i latou ina ia ō mai mai i tuluʻiga o le lalolagi;+Ma vaai foʻi! o le a faavavevave lava ona latou ō mai.+
27 E leai se tasi o i latou e lē lavā pe tautevateva.
E leai se tasi e tautulemoe pe moe.
E lē matala le fusi o loo fusi ai o latou puimanava,Pe motu foʻi nonoa o o latou seevae;
28 Ua maʻai a latou aū uma,Ma ua lolo‘u* a latou ʻaufana uma.
O atigivae o a latou solofanua ua pei o se maa malō,Ma e pei o le matagi malosi uili o a latou kariota.+
29 O la latou tagi e pei o le leona;E latou te fetagisi e pei o tamaʻi leona.*+
E latou te gū ma pupu‘e manuMa aumai e aunoa ma se tasi e na te laveaʻiina.
30 O lea aso, o le a latou gū ai i na meaE pei o le gogolo o le sami.+
O so o se tasi e vaai atu i le laueleele, o le a vaaia le pogisa e puapuagatia ai;Ua pogisa foʻi le malamalama ona o ao.+
Faamatalaga Pito i Lalo
^ O se meafaifaaili anamua e ese mai i le kitara i aso nei. O le upu Peretania, o le harp.
^ O se meafaifaaili e tagitagi. O le upu Peretania, o le tambourine.
^ Po o “Seoli.” Tagaʻi i le Uiga o Upu.
^ Po o le “faaiʻuga a; fautuaga a.”
^ Po o le “faatonuga.”
^ Po o le “pou faailoilo.”
^ Po o le “ua sauni e fana.”
^ Po o “tama‘i leona taanoa.”
