Iosua 2:1-24
2 A o latou iai i Setima,+ ona aauina faalilolilo atu lea e Iosua le atalii o Nuno ni tamāloloa se toʻalua o ni sipai, ma faapea atu: “Inā ō ia oulua ma vaavaai solo i le laueleele, faapea ma Ieriko.” Ona la ō ai lea ma taunuu atu i le fale o se fafine talitane e igoa iā Raava,+ ua la nonofo ai i inā.
2 Ona taʻu atu lea i le tupu o Ieriko: “Faauta! Na ō mai i le pō nei ni tamāloloa Isaraelu e vaavaai solo i le laueleele.”
3 Ona avatu lea o le feʻau a le tupu o Ieriko iā Raava e faapea: “Ia aumai i fafo tamāloloa na ō mai ma o loo nonofo i lou fale, auā na ō mai i laʻua ina ia vaavaai solo i le laueleele uma.”
4 Ae ua ave e le fafine o tamāloloa e toʻalua ma faalalafi iā i laʻua. Ona ia faapea atu lea: “Ioe, na ō mai tamāloloa iā te aʻu, ae ou te lē iloa po o fea e ō mai ai.
5 Ina ua pogisa o le a tapuni le faitotoʻa o le pā, ona ō ai lea i fafo o tamāloloa. Ou te lē iloa po o fea ua ō i ai, ae afai e vave ona outou tuliloa i laʻua, e tou te maua atu lava.”
6 Ae ua ia ave i laʻua i le taualuga o lona fale, ma faalalafi i laʻua i lalo o lālā laau o lino na fola i luga o le fale.
7 Ona tuliloa lea e tagata mai i le tupu o i laʻua agaʻi atu i vaega e sopoʻia ai le vaitafe* o Ioritana,+ ona tapuni loa lea o le faitotoʻa o le pā ina ua ō i latou o ē na tuliloaina i laʻua.
8 A o leʻi taooto tamāloloa e momoe, ua alu ane le fafine iā i laʻua i le taualuga o le fale.
9 Ona faapea atu lea o ia iā i laʻua: “Ua ou iloa e foaʻi atu lava e Ieova iā te outou le laueleele lenei,+ ma ua matou matataʻu foʻi ona o outou.+ Ua vaivai foʻi loto o i latou uma o loo nonofo i le laueleele ona o outou.+
10 Auā ua matou faalogo na faapaʻumātū e Ieova vai o le Sami Ulaula i o outou luma, ina ua outou ō ese mai i Aikupito,+ ma mea na outou faia i tupu e toʻalua o tagata Amorī o Sekono+ ma Oko,+ o ē na outou faaumatia i le isi itu* o le vaitafe o Ioritana.
11 Ina ua matou faalogo i na mea, ona vaivai ai lea o o matou loto, ua lē toe iai foʻi se malosi i se tasi ona o outou, auā o Ieova lo outou Atua, o le Atua o le lagi i lugā ma le lalolagi i lalo nei.+
12 O lea, faamolemole ia oulua tautō mai i le suafa o Ieova, auā ua ou alofa faamaoni atu iā te oulua, ia oulua alolofa faamaoni mai foʻi i le aiga o loʻu tamā, ma faailoa mai iā te aʻu se faailoga maufaatuatuaina.
13 Ia outou faasao i loʻu tamā, o loʻu tinā, o oʻu tuagane, o oʻu uso, ma ē uma ua iā i latou, ia laveaʻi foʻi iā i matou mai i le oti.”+
14 Ona faapea mai lea o tamāloloa iā te ia: “Ia avea o ma ola e sui aʻi outou! Afai e te lē taʻuina atu la maʻua mataupu, o le a matou alolofa faamaoni iā te oe ma tausi i a matou upu, pe a oo ina foaʻi mai e Ieova iā i matou le laueleele.”
15 Ona ia tuu ifo lea o i laʻua i se maea i le faamalama, auā sa nofo o ia i luga o le pā o le aai.+
16 Ona ia faapea atu lea iā i laʻua: “Inā ō atu ia i vaega maugā, ina neʻi maua oulua e i latou o loo tuliloaina oulua; ia lalafi ai i inā mo aso e tolu, seʻia toe foʻi mai i latou, ona oulua ō ai lea i lo oulua ala.”
17 Ona fai mai lea o tamāloloa iā te ia: “O le a ma faataunuuina lenei tautoga ua e faatautō ai i maʻua,+
18 pe a e faia mea nei: Pe a matou ō mai i le laueleele, ia e nonoa lenei maea mūmū sesega i le faamalama na e tuu ifo ai i maʻua. Ia e faapotopoto foʻi lou tamā, o lou tinā, o ou tuagane, ma tagata uma o le aiga o lou tamā i le fale.+
19 A o se tasi e alu i fafo mai i faitotoʻa o lou fale, e i luga o lona ulu lona lava toto, ma e lē taʻusalaina ai i maʻua. Ae o se tasi e nonofo pea ma oe i le fale, e i luga o o ma ulu lona toto pe afai e oo se mea leaga iā te ia.
20 Afai fo‘i e te taʻuina atu la maʻua mataupu,+ e mamā i maʻua i le tautoga na e faatautō ai i maʻua.”
21 Ua fai atu o ia: “Ia faia e tusa ma a oulua upu.”
Ona ia aauina ese atu lea o i laʻua i lo la ala. Mulimuli ane, ona ia nonoa ai lea o le maea mūmū sesega i le faamalama.
22 Ona la ō ai lea ua oo atu i le vaega maugā, ua nonofo ai pea i inā mo aso e tolu, seʻia oo ina toe foʻi ē na tuliloaina i laʻua. Ua latou sa‘ili iā i la‘ua i ala uma, ae e latou te leʻi mauaina.
23 Ona toe ō ifo ai lea o tamāloloa e toʻalua mai i le vaega maugā, ua sopoʻia le vaitafe ma ō atu iā Iosua le atalii o Nuno, ona la faamatala atu lea iā te ia o mea uma na tutupu iā i laʻua.
24 Ona la faapea atu lea iā Iosua: “Ua tuuina mai e Ieova le laueleele uma iā i tatou.+ O le mea moni, ua vaivai loto o tagata o le nuu ona o i tatou.”+
