Iosua 1:1-18
1 Ina ua mavae le maliu o Mose le auauna a Ieova, ona fetalai mai lea o Ieova iā Iosua*+ le atalii o Nuno, o lē na auauna+ iā Mose:
2 “Ua maliu laʻu auauna o Mose;+ o lea ia e tulaʻi ma sopoʻia atu le vaitafe o Ioritana, o oe ma lenei nuu uma, ma ō atu i le laueleele ou te foaʻiina atu iā i latou, o le fanauga a Isaraelu.+
3 Ou te foaʻi atu iā te outou o mea uma lava e solia e o outou vae, e pei lava ona ou folafola atu iā Mose.+
4 E amata atu lo outou laueleele mai i le toafa* se‘ia oo i Lepanona ma le vaitafe tele o Eufirate, e oo atu i le Sami Tele* i le itu i sisifo,*+ ma le laueleele uma o tagata Hetī.+
5 E leai se tasi e tū mai e tetee iā te oe i aso uma o lou ola.+ E pei ona ou faatasi ma Mose, e faapea foʻi ona ou faatasi ma oe.+ Ou te lē tuua oe, ou te lē tuulafoaʻia lava oe.+
6 Ia e lototele ma faamalosi,+ auā e te taʻitaʻiina atu lenei nuu e fai mo latou tofi le laueleele na ou tautō ai i o latou augātamā e foaʻi atu iā i latou.+
7 “Tau lava ina ia e lototele ma matuā faamalosi, e faia e tusa ma mea uma o i le Tulafono na poloaʻi atu ai laʻu auauna o Mose iā te oe. Aua neʻi e liliuese ai i le itu taumatau po o le itu tauagavale,+ ina ia e gaoioi ai ma le poto i mea uma e te faia.+
8 Aua neʻi teʻa ese lenei tusi o le Tulafono mai i lou gutu,+ ae ia e faitau lē leoa* i ai i le ao ma le pō, ina ia e faia e tusa ma mea uma ua tusia ai;+ ona manuia ai lea o ou ala, ma e gaoioi ai ma le poto.+
9 Po ou te leʻi poloaʻi atu ea iā te oe? Ia lototele ma faamalosi. Aua le fefe pe mataʻu, auā e faatasi Ieova lou Atua ma oe i mea uma e te alu i ai.”+
10 Ona poloaʻi atu lea o Iosua i alii o le nuu e faapea:
11 “Ia ō atu i le togālauapi ma fai atu i le nuu, ‘Inā sauni ia ni mea mo outou, auā e toe tolu aso ona outou sopoʻia atu lea o le vaitafe o Ioritana, ma nonofo i le laueleele ua foaʻi atu e Ieova lo outou Atua e fai mo outou.’”+
12 Ona fai atu lea o Iosua i tagata Reupena, o tagata Kato ma le ʻafa o le ituaiga o Manase:
13 “Ia manatua le poloaʻiga a Mose le auauna a Ieova iā te outou e faapea,+ ‘Ua avatu e Ieova lo outou Atua le mālōlōga ma foaʻi mai lenei laueleele mo outou.
14 E nonofo a outou avā, o a outou fanau, ma a outou lafumanu i le laueleele na avatu e Mose iā te outou i lenei itu* o le vaitafe o Ioritana;+ ae e ao ona sopo atu o outou tane totoa ma malolosi uma+ e pei o se ‘autau e muamua atu i o outou uso.+ E ao ona fesoasoani i o outou uso
15 se‘ia avatu e Ieova le mālōlōga iā i latou e pei ona ia avatu iā te outou, ma latou nonofo ai foʻi i laueleele ua foaʻiina atu e Ieova lo outou Atua e fai mo i latou. Ona outou toe fo‘i mai lea e fai mo outou le laueleele o loo outou nonofo ai, o le laueleele i le itu i sasa‘e o le vaitafe o Ioritana lea na avatu e Mose, o sē e auauna iā Ieova.’”+
16 Ona latou tali mai lea iā Iosua: “O mea uma ua e poloaʻi mai ai, e matou te faia lava, o mea uma foʻi e te aauina atu i ai i matou, e matou te ō lava.+
17 E pei ona matou usitaʻi iā Mose i mea uma, e faapea foʻi ona matou usitaʻi iā te oe. Tau ina ia faatasi Ieova lou Atua ma oe, e pei ona faatasi o ia ma Mose.+
18 O se tagata e tetee i lau faatonuga ma lē usitaʻi i au poloaʻiga, e fasiotia o ia.+ Tau ina ia e lototele ma faamalosi.”+
Faamatalaga Pito i Lalo
^ Lona uiga “O Ieova o le Faaolataga.”
^ Tagaʻi i le Uiga o Upu.
^ E faasino atu i le Metitirani.
^ Po o “i le itu e goto i ai le lā.”
^ Po o le “ia e manatunatu loloto.”
^ E faasino atu i le itu i sasaʻe.
