Iopu 5:1-27
5 “Inā valaau atu ia faamolemole! Pe e iai se tasi e tali mai iā te oe?
Po o ai foʻi se tasi o le ʻaupaia e te liliu atu i ai?
2 E fasiotia le tagata valea i le ita,E fasiotia foʻi lē ua maileiagofie i le matauʻa.
3 Ua ou vaaia le tagata valea ua mauaa,Ae e teʻi lava ua malaia le mea e mau ai.
4 Ua mamao lava ona atalii mai i le tulaga saogalemu,Ua tuʻimomomoina foʻi i latou i le faitotoʻa o le aai,+ e aunoa ma sē e laveaʻia i latou.
5 Ua ʻaina e lē ua fia ʻai mea na ia seleseleina,Ua aumaia foʻi e ia mai i laau matuitui,Ma ua faoa a latou oloa.
6 Auā e lē tupu mai i le efuefu mea e tigā ai,E lē tupu aʻe foʻi mai i le eleele o faafitauli.
7 Auā ua fanau mai le tagata mo faafitauli,E faapei ona felelei aʻe i luga o aloiafi.
8 Ae ou te ʻaiʻoi atu i le Atua,Ou te tuuina atu foʻi i le Atua laʻu mataupu,
9 O Lē ua faia mea tetele e lē masuʻesuʻeina,O mea ofoofogia foʻi e lē mafaitaulia.
10 E na te faatotō mai le timu i le laueleele,Ma na te faasūsū le fanua i vai.
11 E na te tuuina i se mea maualuga o ē e faatauvaa,Ma e na te faaeaina i le faaolataga o ē e faanoanoa.
12 E na te faalēaogāina faufauga a ē e faaʻoleʻole,Ina ia lē taulau galuega a o latou lima.
13 E na te maua tagata atamamai i a latou lava togafiti,+Ina ia fenuminumiaʻi ai fautuaga a ē e faaʻoleʻole.
14 E oo iā i latou le pōuliuli e tusa lava pe ao,E latou te tautagotago foʻi i le tutonu o le lā e peiseaʻī o loo pō.
15 E na te faaolaina le tagata mai i le pelu i o latou gutu,E faaolaina le tagata mativa mai i le lima o lē e malosi,
16 Ina ia iai le faamoemoe o lē e faatauvaa,Ae punitia le gutu o lē e amiolētonu.
17 Faauta! E fiafia le tagata e aʻoaʻia e le Atua;Aua foʻi e te teena le aʻoaʻiga a Lē e ona le malosi uma lava!
18 Auā o ia lava e na te faatigāina, ae e fusia foʻi e ia le manuʻa;E na te faamanu‘aina, ae e faamālōlōina foʻi e ona aao.
19 E na te laveaʻia oe mai i mala e ono,Ma e oo foʻi i le mala lona fitu, e te lē tigā ai.
20 E na te laveaʻiina oe mai i le oti i le taimi o le oge,Mai i le malosi foʻi o le pelu i le taimi o le taua.
21 E puipuia oe mai i le tā a le laulaufaiva e pei o le sasa,+E te lē fefe foʻi i le faatafunaina pe a oo mai.
22 E te ʻata i le faaumatiaga ma le oge,E te lē fefe foʻi i manufeʻai o le eleele.
23 E te lē tigā i maa o le fanua,*E te nofo filemu foʻi ma manufeʻai o le vao.
24 E te iloa ai ua saogalemu* lou faleʻie,Ma e leai se mea ua leiloa pe a e asiasi i ou tuāfanua.
25 E te olioli i le toʻatele o lau fanau,E pei foʻi le toʻatele o ē e tupuga mai iā te oe o vao o le eleele.
26 E te alu i le tuugamau a o e malosi lava,E faapei o fusi saito ua faaputuina i o latou tau.
27 Faauta! O le mea lenei ua matou iloiloina, ma e faapenei.
Ia faalogo ma taliaina.”
Faamatalaga Pito i Lalo
^ Po o le “E fai la outou feagaiga (o se maliega) ma maa o le fanua.”
^ Epe., “filemu.”
