Iopu 22:1-30
22 Ona tali mai lea o Elifasa+ le Timanu e faapea:
2 “Pe e aogā ea le tagata i le Atua?
Pe e aogā iā te ia o lē ua iai le tofā mamao?+
3 Pe e manatu mai ea* Lē e ona le malosi uma lava ina ua e amiotonu,Pe e aogā foʻi iā te ia pe a e tausisi i le faamaoni?+
4 Pe e na te faasalaina ea oeMa alu atu i le faamasinoga faatasi ma oe ona o lou faaaloalo?
5 Pe e lē ona ua matuā tele lou amioleagaMa leai se gataaga o au mea sesē?+
6 Auā ua e faoa fua mai i ou uso mea e faamau ai le tautoga,Ma ua e avea foʻi ofu o tagata matitiva, ma ua lē lavalavā ai i latou.*+
7 Ua e lē avatua i lē ua vaivai se vai e inu ai,Ua e taofia foʻi le meaʻai mai i lē o loo fia ʻai.+
8 O le tagata malosi e fai mo ia le laueleele,+E mau ai foʻi lē ua faamamaluina ona o le faaituʻau.
9 Ae ua e aauina ese atu fafine ua oti a latou tane e aunoa ma ni mea,Ua e faavaivaia* foʻi lima o tamaiti ua leai ni o latou tamā.*
10 O le mea lea ua siʻomia ai oe i mailei,*+Ua faaatuatuvaleina foʻi oe i le mataʻu faafuaseʻi;
11 O le mea lea ua matuā pōuliuli ai ua e lē iloa ai se mea,Ma ua lofia foʻi oe i vai e tele.
12 Pe e lē o iai ea le Atua i le lagi i lugā?
Ia vaai atu i fetu uma, ua maualuluga lava.
13 Ae ua e faapea mai: ‘O le ā moni lava e silafia e le Atua?
Pe e mafai ea ona ia faamasino e ati atu i le pogisa tele?
14 Ua punitia o ia i ao ua lē mafai ai ona ia silasila maiA o fealuaʻi o ia i le faataaliʻoliʻo o le lagi.’
15 Pe e te mulimuli ea i le ala o aso anamuaNa savavali ai tagata amioleaga,
16 O tagata ia ua seʻiesea* a o leʻi oo i o latou taimi,O ē ua tafiesea lo latou faavae i se lolo?*+
17 Ua latou fai atu i le Atua moni: ‘Tuu ia i matou!’
Ma ‘O le ā se mea e faia e Lē e ona le malosi uma lava iā i matou?’
18 Peitaʻi, ua faatumuina e Ia lava o latou fale i mea lelei.
(Ua mamao lava ma aʻu mafaufauga leaga faapena.)
19 E vāai o ē e amiotonu i lenei mea ma olioli ai,E tauemu foʻi o ē ua lē sala iā i latou ma faapea mai:
20 ‘Ua fano o ē e tetee mai iā i tatou,E ʻaina foʻi e le afi mea na totoe o i latou.’
21 Ia e faamasani iā te Ia, ona e maua ai lea o le filemu;Ona oo mai ai lea o mea lelei iā te oe.
22 Ia e talia le tulafono mai i lona fofoga,Ma ia teu i lou loto ana afioga.+
23 Afai e te toe foʻi atu i Lē e ona le malosi uma lava, ona toe faafo‘isia lea o oe;+Afai foʻi e te aveesea le amiolētonu mai i lou faleʻie,
24 Afai e te lafoaʻi au auro i le efuefuMa le auro o Ofeira+ i le papa i le ālia,
25 Ona avea ai lea o Lē e ona le malosi uma lava ma au auro,E avea foʻi o ia ma au siliva e sili ona lelei.
26 Ona e fiafia ai lea i Lē e ona le malosi uma lava,E tepa aʻe foʻi ou mata i le Atua.
27 E te ʻaiʻoi atu iā te ia ona faafofoga mai lea o ia iā te oe;E te faataunuuina foʻi au tautoga.
28 O so o se mea e te filifili e fai, e taulau manuia,Ma e susulu mai le malamalama i ou ala.
29 E faalumaina oe pe a e tautala ma le faasausili,Ae e na te faaolaina lē e lotomaulalo.*
30 E laveaʻiina e ia tagata e lē sala;Afai la e mamā ou lima, e laveaʻiina lava oe.”
Faamatalaga Pito i Lalo
^ Po o le “Pe e fiafia ea.”
^ Epe., “toese ofu o ē e lē lavalavā.”
^ Epe., “gauia.”
^ Po o le “ua mātuaoti.”
^ Epe., “mailei manu.”
^ Po o le “ua faapuupuuina o latou ola.”
^ Epe., “vaitafe.”
^ Po o “lē e mata faanoanoa.”
