Iona 1:1-17
1 Ua oo mai le afioga a Ieova iā Iona*+ le atalii o Amitai, e faapea:
2 “Inā tulaʻi ia ma alu i Nineva+ le aai telē, ma folafola atu i ai lona faasalaga, auā ua oo mai i oʻu luma a latou amioga leaga.”
3 Ae ua tulaʻi Iona e sola i Tasesa mai i luma o Ieova; ua alu ifo o ia i Iopa ma maua ai se vaa e alu i Tasesa. Ona ia totogi lea o lona pasese ma alu i le vaa, ina ia ō faatasi ma le ʻaumalaga i Tasesa, e sola ese ai mai i luma o Ieova.
4 Ona faaoo mai lea e Ieova o se matagi malosi, ua matuā sou ai le sami ma ua toetoe lava ina a malepe ai le vaa.
5 Ua matuā fefefe le ʻauvaa, ma ua taʻitoʻatasi ma alaga atu i lona lava atua mo se fesoasoani. Ua latou lafoaʻi foʻi i le sami mea ua i le vaa ina ia faamāmā ai le vaa.+ Peitaʻi, o loo iai Iona i le vaega pito i totonu o le vaa, o loo taoto ma moegase ai.
6 Ua alu atu le kapeteni o le vaa iā te ia ma faapea atu: “Aiseā ua e moe ai? Inā nofo ia i luga ma valaau atu i lou atua! Atonu e manatu alofa mai le Atua moni iā i tatou ma tatou lē feoti ai.”+
7 Ona faapea ane lea o le tasi i le isi: “Ō mai ia seʻi o tatou faia le vili,*+ ina ia iloa ai po o ai ua māfua ai lenei mala.” Ua latou faia le vili ma ua faasaga le vili iā Iona.+
8 Ua latou faapea atu iā te ia: “Seʻi taʻu mai faamolemole, o ai ua māfua ai lenei mala ua oo mai iā i tatou? O le ā lau galuega, o fea foʻi e te sau ai? O fea lou atunuu, ma o ai tagata e te tupuga mai ai?”
9 Ua ia faapea mai: “O aʻu o le tagata Eperu, ma ou te mataʻu* iā Ieova le Atua o le lagi, o Lē na faia le sami ma le laueleele mātūtū.”
10 Ona matuā fefefe ai lea o tamāloloa ma ua latou faapea atu iā te ia: “O le ā lenei mea ua e faia?” (Auā ua iloa e tamāloloa ua sola ese o ia mai i luma o Ieova, ona na ia taʻu atu iā i latou.)
11 Ona latou fai atu lea iā te ia: “O le ā se mea e matou te faia iā te oe ina ia toe malū ai le sami mo i matou?” Auā ua faasolo ina matuā sou le sami.
12 Ua ia faapea mai: “Ia sii aʻu ma lafo ifo i le sami, ona malū ai lea o le sami mo outou; auā ua ou iloa o aʻu ua māfua ai ona agi mai lenei matagi malosi iā te outou.”
13 Ua alo malosi e tamāloloa le vaa ina ia oo i le laueleele mātūtū, ae ua lē mafai, auā ua faateteleina pea le sou o le sami.
14 Ona latou alalaga lea iā Ieova ma faapea atu: “O lenei Ieova e, faamolemole aua neʻi o matou feoti ona o lenei tagata!* Aua foʻi e te tuuina i luga o i matou le toto o lē ua lē sala, auā o oe Ieova e, e te faia le mea e te finagalo i ai!”
15 Ua latou sii Iona ma lafo ifo i le sami; ona lē toe sou ai lea o le sami.
16 Ona matuā matataʻu ai lea o tamāloloa iā Ieova,+ ma ua latou avatu se taulaga iā Ieova ma faia ni tautoga.
17 Ua saunia e Ieova se iʻa telē e foloina Iona, ma ua iai Iona i le manava o le iʻa i ao e tolu ma pō e tolu.+
Faamatalaga Pito i Lalo
^ Lona uiga “Lupe.”
^ Tagaʻi i le Uiga o Upu.
^ Po o le “tapuaʻi.”
^ Po o le “ona o le ola o lenei tagata!”
