Faamaumauga a Ioane 19:1-42
19 Ona ave lea e Pilato o Iesu ma matuā sasaina o ia.+
2 Ua fili foʻi e fitafita se pale tuitui ma tuu i lona ao, ma faaofu o ia i se ofu tele violē,+
3 ma ua latou ō mai pea ma faapea mai iā te ia: “Talofa* le Tupu o tagata Iutaia!” Ua faaauau foʻi ona latou tapō ona fofoga.+
4 Ua toe alu Pilato i fafo ma faapea atu iā i latou: “Vaai! Ua ou aumaia o ia i fafo iā te outou ina ia outou iloa ai, ou te lē iloa se mea sesē ua ia faia.”+
5 Ona sau lea o Iesu i fafo, o loo i lona ao le pale tuitui ma o loo ofu i le ofu tele violē. Ua fai atu Pilato iā i latou: “Faauta! O le tagata!”
6 Ae ina ua vāai mai le ʻaufaitaulaga sili ma leoleo iā te ia, ona latou alalaga mai lea: “Ia tutuʻi o ia i luga o le laau! Ia tutuʻi o ia i luga o le laau!”+ Ua fai atu Pilato iā i latou: “Ia outou ave o ia ma tutuʻi i luga o le laau, auā ou te lē iloa se mea sesē ua ia faia.”+
7 Ua tali mai tagata Iutaia iā te ia: “E iai la matou tulafono, ma e tatau ona oti o ia+ e tusa ma le tulafono, auā ua ia fai mai, o ia o le atalii o le Atua.”+
8 Ina ua faalogo Pilato i a latou tala, ona atili ai lea ona fefe o ia,
9 ona toe ulufale atu lea o ia i le maota o le kovana ma faapea mai iā Iesu: “O fea e te sau ai?” Ae ua lē tali atu Iesu iā te ia.+
10 Ona fai mai lea o Pilato iā te ia: “Pe e te musu ea e tali mai iā te aʻu? Pe e te lē iloa ea, ua iā te aʻu le pule e faasaʻoloto ai oe, ma ua iā te aʻu foʻi le pule e tutuʻi ai oe i luga o le laau?”
11 Ua tali atu Iesu iā te ia: “E leai lava sau pule e faasala ai aʻu, pe ana lē tuuina mai iā te oe mai lugā. O le mea lea, ua sili ai le agasala a le tagata na tuuina atu aʻu iā te oe.”
12 O le mea lea ua taumafai ai pea Pilato e saʻili se auala e faasaʻoloto ai o ia, ae ua alalaga mai tagata Iutaia: “Afai e te faasaʻolotoina lenei tagata, e lē o oe o se uō a Kaisara. O so o se tasi e na te faia o ia ma tupu, e tetee o ia iā Kaisara.”+
13 Ina ua faalogo Pilato i nei upu, ona ia ave lea o Iesu i fafo, ma ua nofo o ia i le nofoa faamasino, i le mea ua taʻua o le Paepae Maa, ae i le gagana Eperu, e taʻua o Kapata.
14 O le aso lea o Sauniuniga+ mo le Paseka, ma e tusa lea o le itula e ono.* Ona ia fai atu lea i tagata Iutaia: “Vaai! O lo outou tupu!”
15 Peitaʻi, ua latou alalaga mai: “Ia fasioti o ia! Ia fasioti o ia! Ia tutuʻi o ia i luga o le laau!” Ua fai atu Pilato iā i latou: “Po ou te tutuʻi ea i luga o le laau lo outou tupu?” Ua tali mai le ʻaufaitaulaga sili: “E leai so matou tupu ua na o Kaisara.”
16 Ona ia tuuina atu loa lea o ia iā i latou ina ia tutuʻi i luga o le laau.+
Ona latou ave ai lea o Iesu.
17 Ua ia amo le laau e faapuapuagatia ai* o ia, ona alu atu lea o ia i le mea ua taʻua o le Ulupoo,+ ae i le gagana Eperu, o Kolokota.+
18 O i inā ua tutuʻi ai o ia i le laau,+ faatasi ma isi tamāloloa e toʻalua, o le isi i le tasi itu, ma le tasi i le isi itu, ae ogatotonu ai Iesu.+
19 Ua tusi foʻi e Pilato se faaupuga ma tuu i luga aʻe o le laau e faapuapuagatia ai.* Ua tusia ai e faapea: “O Iesu le Nasareta, le Tupu o tagata Iutaia.”+
20 E toʻatele tagata Iutaia na faitau i lenei faaupuga, auā e latalata i le aai le nofoaga ua tutuʻi ai Iesu i luga o le laau, ma ua tusia i le gagana Eperu, Latina, ma le gagana Eleni.
21 Peitaʻi, ua fai atu le ʻaufaitaulaga sili a Iutaia iā Pilato: “Aua le tusia, ‘Le Tupu o tagata Iutaia,’ ae ia tusi ai lana faamatalaga e faapea, ‘O aʻu o le Tupu o tagata Iutaia.’”
22 Ua tali mai Pilato: “O le mea ua ou tusia, ua ou tusia lava.”
23 Ina ua tutuʻi e fitafita Iesu i luga o le laau, ona latou ave lea o ona ofu tele, ua vaevae i vaega e fā, ma ua tofu fitafita taʻitasi ma le vaega, ua latou aveina foʻi le ofu pito i totonu. Ae o le ofu pito i totonu, e leai se sooga, ua lalagaina mai i luga e oo i lalo.
24 Ona latou talatalanoa ai lea ma faapea ane: “Aua neʻi o tatou saeia le ofu, ae seʻi tatou faia le vili* e iloa ai po o ai e ave ma ia.”+ Ua tupu lenei mea, ina ia taunuu ai tusitusiga paia e faapea: “Ua latou tufatufa oʻu ofu iā i latou, ma ua latou fai le vili i loʻu ofu.”+ O mea tonu lava na ua faia e fitafita.
25 Ae e lata ane i le laau o loo faapuapuagatia ai* Iesu, o loo tutū ai lona tinā, o le uso o lona tinā,+ faapea Maria le avā a Kalopa, ma Maria le Makatala.+
26 Ina ua silasila atu Iesu i lona tinā, ma le soo ua ia alofa i ai+ o loo tutū latalata ane, ona ia fetalai atu lea i lona tinā: “Le mafine e, vaai foʻi! O lau tama!”
27 Ona ia faapea atu lea i lona soo: “Vaai! O lou tinā!” O le taimi lava lenā ua ave ai e lona soo o ia i lona aiga.
28 Mulimuli ane, ua silafia e Iesu ua faataunuuina nei mea uma, ae ina ia taunuu tusitusiga paia, ua ia fetalai atu: “Ua ou fia inu.”+
29 O loo iai i inā se ipu ua tumu i le uaina oona. Ona latou tuu lea i le pito o le laau o le isopo,* o se omomi ua uma ona fufui i le uaina oona, ma avatu ma tuu atu i lona fofoga.+
30 Ua talia e Iesu le uaina oona, ona ia fetalai atu lea: “Ua taunuu!”+ ua faagaugau lona ao, ona tō ai lea o lana mānava.*+
31 Talu ai o le aso lea o le Sauniuniga,+ ma ina ia lē tuua ai pea tino i luga o laau+ i le Sapati (auā o le Sapati sili lenā),+ ua talosaga atu ai tagata Iutaia iā Pilato, ina ia gauia o latou vae ma aveese o latou tino.
32 Ona ō mai lea o fitafita ma gaui vae o le tamāloa muamua ma vae o le isi tamāloa, ia na faatautauina faatasi ma ia.
33 Ae ina ua oo atu iā Iesu, ua latou iloa ai ua maliu o ia, ma latou te leʻi gauia ona vae.
34 Ae ua tutuʻi e se tasi o fitafita lona itu i le tao,+ ona tafe mai ai lea o le toto ma le vai.
35 A o lē na vaai i lenei mea, ua molimau atu, ma e moni lava lana molimau, ma ua ia iloa e moni mea ua ia taʻuina atu, ina ia outou talitonu ai foʻi.+
36 O le mea moni, ua tutupu nei mea ina ia taunuu ai tusitusiga paia e faapea: “E leai sona ivi e gau.”*+
37 Ua fai mai foʻi le isi mau i tusitusiga paia: “E latou te vāai atu i lē na latou tuʻia.”+
38 Ua mavae nei mea, ona sau ai lea o Iosefa mai Arimataia, o se soo o Iesu, ae sa faalilolilo ona o lona fefe i tagata Iutaia,+ ua talosaga atu iā Pilato e na te aveina le tino o Iesu, ma na ioe i ai Pilato. Ona sau ai lea o ia ma ave lona tino.+
39 Ua sau foʻi Nikotemo,+ o le tagata lea na alu atu muamua iā Iesu i le pō, ua aumai se paluga* o muro ma aloe, pe tusa e 100 pauna* le mamafa.+
40 Ona latou ave lea o le tino o Iesu ma fusi i ʻie lino faatasi ma mea manogi,+ e pei o le tū masani a tagata Iutaia mo le tanuina o se tasi.
41 E iai se togālaau i le nofoaga ua tutuʻi ai o ia i luga o le laau, ma o loo iai i inā se tuugamau fou+ e leʻi tuuina ai se tasi.
42 Talu ai o le aso lea o le Sauniuniga+ a tagata Iutaia, ma e latalata ane le tuugamau, o lea ua latou tuu ai Iesu i inā.
Faamatalaga Pito i Lalo
^ Po o le “Ia soifua.”
^ E faasino atu i le pe ā o le 12 i le aoauli.
^ Tagaʻi i le Uiga o Upu.
^ Tagaʻi i le Uiga o Upu.
^ Tagaʻi i le Uiga o Upu.
^ Tagaʻi i le Uiga o Upu.
^ Tagaʻi i le Uiga o Upu.
^ Po o le “ona maliu ai lea o ia.”
^ Po o le “nutililiia.”
^ Pe atonu “tāʻaiga.”
