Faamaumauga a Ioane 12:1-50
12 Ua toe ono aso oo i le Paseka, ma ua taunuu atu Iesu i Petania i le mea ua iai Lasalo,+ o lē na toe faatūina e Iesu mai i le oti.
2 Ona latou saunia ai lea o se taumafataga i le afiafi i inā mo ia. Ua tautua Mareta,+ a o Lasalo, o ia o se tasi o loo aai* faatasi ma ia.
3 Ona ave lea e Maria o le pauna* o le suāuu manogi, o le nato māoʻi e sili ona taugatā, ua liligi i vae o Iesu ma soloi i lona lauulu. Ua sasala ai le manogi o le suāuu i le fale atoa.+
4 Ae ua fai mai le tasi o ona soo, o Iuta le Sekara,+ o lē ua toeitiiti faalataina o ia:
5 “Aiseā ua lē faatau atu ai lenei suāuu manogi i le 300 tenari,* ma avatu i ē e matitiva?”
6 Peitaʻi, ua ia fai mai lenei tala, e lē ona o le manatu mamafa i ē e matitiva, ae ona o ia o se gaoi, o loo iā te ia le pusa tupe, ma e masani ona ia gaoia tupe na tuu ai i totonu.
7 Ona faapea atu lea o Iesu: “Tuu ai pea o ia, ina ia faia e ia lenei sauniuniga mo le aso o loʻu tanuga.+
8 Auā tou te faatasi pea ma tagata matitiva,+ ae tou te lē faatasi pea ma aʻu.”+
9 I le taimi lenā, ua iloa e le motu o tagata e toʻatele o Iutaia ua iai o ia i inā, ona latou ō mai ai lea, e lē na o le fia vāai iā Iesu, ae ona o le fia vāai foʻi iā Lasalo, o lē na ia toe faatūina mai i le oti.+
10 Ona taupulepule lea o le ʻaufaitaulaga sili ina ia fasiotia foʻi Lasalo,
11 ona o ia ua māfua ai ona ō atu le toʻatele o tagata Iutaia i inā, ma faatuatua iā Iesu.+
12 I le aso na sosoo ai, ua faalogo ai le motu o tagata e toʻatele o ē ua ō mai i le tausamiga, e maliu mai Iesu i Ierusalema.
13 Ona latou ave lea o lālā o laau o pama, ma ō atu e faafeiloaʻi o ia. Ona latou alalaga lea: “Matou te tatalo ia faaolaina o ia! E manuia lē e maliu mai i le suafa o Ieova,*+ o le Tupu o Isaraelu!”+
14 Ina ua maua e Iesu se tamaʻi asini, ona ia tiʻetiʻe ai lea+ e pei ona tusia:
15 “Aua e te fefe, le tama fafine a Siona. Faauta! o loo afio mai lou tupu, o loo tiʻetiʻe i le tamaʻi asini.”+
16 E leʻi malamalama ona soo i nei mea i le taimi muamua, ae ina ua faamamaluina Iesu,+ ona latou toe manatua ai lea ua tusia nei mea e uiga iā te ia, ma na latou faia nei mea iā te ia.+
17 Ua molimau atu pea e uiga iā te ia, le motu o tagata+ na faatasi ma ia a o ia valaau atu iā Lasalo i le tuugamau,+ ma toe faatūina o ia mai i le oti.
18 O le mea foʻi lea ua ō atu ai le motu o tagata e faafeiloaʻi iā te ia, auā ua latou faalogo i lenei faailoga na ia faia.
19 Ona talatalanoa lea o le ʻau Faresaio: “Ua tatou iloa, ua leai se mea tatou te mafaia. Vaai foʻi! Ua mulimuli atu le lalolagi uma iā te ia.”+
20 Ua iai foʻi nisi o tagata Eleni i ē ua ō aʻe e tapuaʻi i le tausamiga.
21 Ona ō atu lea o i latou nei iā Filipo,+ o lē e sau mai i Petesaita i Kalilaia, ua latou talosaga atu iā te ia e faapea: “Lau susuga e, e matou te fia vāai iā Iesu.”
22 Ua alu atu Filipo ma taʻu atu iā Aneterea. Ona ō mai lea o Aneterea ma Filipo, ua taʻu mai iā Iesu.
23 Ae ua tali atu Iesu iā i laʻua: “Ua oo mai le itula e faamamaluina ai le Atalii o le tagata.+
24 E moni, e moni, ou te fai atu iā te outou, afai e lē paʻū le fatu saito i le eleele ma pala ai, e tumau pea o se fatu saito; ae afai e pala,+ ona fua tele mai ai lea.
25 O lē e faapelepele i lona ola, e faaumatia ai, a o lē e ʻinoʻino i lona ola+ i lenei lalolagi, e faasaoina ai mo le ola e faavavau.+
26 Afai e fia auauna mai se tasi iā te aʻu, inā mulimuli mai ia o ia iā te aʻu, ma o le mea ou te iai, e iai foʻi laʻu auauna.+ Afai e auauna mai se tasi iā te aʻu, e faamamaluina o ia e le Tamā.
27 O lenei, ua popole tele loʻu loto,+ ma o le ā saʻu tala a fai atu? Loʻu Tamā e, ia e faaola iā te aʻu mai i le mea o le a tupu.*+ Ae ui i lea, o le mea lava lenei ua ou sau ai.
28 Loʻu Tamā e, ia faamamaluina lou suafa.” Ona oo mai ai lea o le siʻufofoga+ mai i le lagi e faapea: “Ua ou faamamaluina loʻu igoa, ma o le a ou toe faamamaluina.”+
29 Ona faapea ane lea o le motu o tagata o loo tutū ai i inā ma faalogo i ai, ai o se faititili. Ae ua faapea ane nisi: “O se agelu lea ua fetalai mai iā te ia.”
30 Ua tali atu Iesu: “Ua oo mai lenei siʻufofoga e lē ona o aʻu, ae ona o outou.
31 O lenei, ua faamasinoina lenei lalolagi, ma o le a tuliesea+ le pule o lenei lalolagi.+
32 Ae pe a siitia aʻe aʻu mai i le eleele,*+ o le a tosina mai tagata eseese iā te aʻu.”
33 Ua ia fetalai i nei mea e faailoa ai le auala e maliu ai o ia.+
34 Ona tali mai lea o le motu o tagata iā te ia: “Na matou faalogo i le Tulafono e faapea, e tumau e faavavau le Keriso.+ E faapefea ona e fai mai e tatau ona siitia i luga* le Atalii o le tagata?+ O ai lenei Atalii o le tagata?”
35 Ona fetalai atu lea o Iesu iā i latou: “O le a iai iā te outou le malamalama mo sina taimi. Ia outou savavali a o iai pea iā te outou le malamalama, ina ia lē manumalo le pōuliuli iā te outou; o lē e savali i le pōuliuli e na te lē iloa le mea o alu i ai o ia.+
36 Inā faatuatua ia i le malamalama manū o iā te outou le malamalama, ina ia avea ai outou ma atalii o le malamalama.”+
Ua fetalai Iesu i nei mea, ona alu ese lea o ia ma lafi mai iā i latou.
37 E ui lava i le tele o faailoga na ia faia i o latou luma, ae latou te leʻi faatuatua lava iā te ia,
38 ina ia taunuu ai upu a le perofeta o Isaia e faapea: “Ieova* e, o ai ua faatuatua i le mea ua faalogo ai mai iā i matou?*+ O ai foʻi ua faaalia i ai le aao o Ieova?”*+
39 O le māfuaaga na lē mafai ai ona latou talitonu, auā na faapea atili mai Isaia:
40 “Ua ia faatauasoina o latou mata, ma ua ia faamaaa o latou loto, ina neʻi o latou iloa se mea i o latou mata, ma malamalama o latou loto ma liliu mai, ma ou faamālōlōina ai i latou.”+
41 Ua fai mai e Isaia nei upu, auā na ia vaai i lona mamalu, ma ua ia tautala atu e uiga iā te ia.+
42 Ae ua faatuatua le toʻatele o taʻitaʻi iā te ia.+ Peitaʻi, ona o le ʻau Faresaio, ua latou lē faailoa mai ai o ia, ina neʻi tutuliesea i latou mai i le sunako.+
43 Auā ua sili lo latou naunau i le viiga mai i tagata, nai lo o le viiga mai i le Atua.+
44 Ua alaga Iesu ma faapea atu: “O lē e faatuatua mai iā te aʻu, e lē na o aʻu ua faatuatua i ai, a o lē foʻi na auina mai aʻu;+
45 ma o lē ua vaai mai iā te aʻu, ua vaai foʻi o ia i Lē na auina mai aʻu.+
46 Ua ou sau e pei o le malamalama i le lalolagi,+ ina ia lē tumau pea i le pōuliuli i latou uma e faatuatua iā te aʻu.+
47 Ae afai e faalogo se tasi i aʻu upu ae lē tausia, ou te lē faamasinoina o ia, auā ou te leʻi sau e faamasino le lalolagi, ae ia faaolaina.+
48 O sē e manatu māmā iā te aʻu ma e lē talia aʻu upu, e iai lē e faamasinoina o ia. O le upu ua ou fai atu ai, e faamasinoina ai o ia i le aso mulimuli.
49 Auā ou te lē tautala atu i oʻu lava manatu, a o le Tamā o lē na auina mai aʻu, ua ia tuuina mai le poloaʻiga e tusa ma le mea e taʻu atu ma tautala atu ai.+
50 Ou te iloa foʻi, o lana poloaʻiga o le ola lea e faavavau.+ O lea, o so o se mea ua ou tautala atu ai, ua ou tautala atu e tusa ma mea ua faailoa mai e le Tamā iā te aʻu.”+
Faamatalaga Pito i Lalo
^ Po o le “o loo taoto e aai.”
^ Ele., “mai i lenei itula.”
^ E faasino atu i le faatautauina i le laau.
^ E faasino atu i le faatautauina i le laau.
^ Po o “i la matou faamatalaga?”
