Ieremia 27:1-22
27 I le amataga o le nofoaiga a Ioakima le atalii o Iosia, o le tupu o Iuta, na oo mai ai le afioga lenei a Ieova iā Ieremia:
2 “O le mea lenei ua fetalai mai ai Ieova iā te aʻu, ‘Ia e faia mo oe ni noanoaga ma ni amo, ma ia e tuu i lou ua.
3 Ia e avatu na mea i le tupu o Etoma,+ o le tupu o Moapi,+ o le tupu o le fanauga a Amoni,+ o le tupu o Turo,+ ma le tupu o Saitonu,+ e ala i lima o avefeʻau o ē e ō mai i Ierusalema iā Setekaia le tupu o Iuta.
4 Ia e avatu lenei poloaʻiga i o latou matai:
“ʻ“O le mea lenei ua fetalai mai ai Ieova o ʻau, o le Atua o Isaraelu; o le mea lenei tou te fai atu ai i o outou matai,
5 ‘O aʻu lava, na ou faia le lalolagi, o tagata, ma manu o loo i luga o le fogāeleele, i loʻu mana tele ma loʻu lima faaloaloa; ma ua ou tuuina atu i so o se tasi ou te mana‘o i ai.*+
6 A o lenei, ua ou tuuina atu nei nuu uma i le lima o laʻu auauna o Nepukanesa+ le tupu o Papelonia; ua ou tuuina atu foʻi ma manufeʻai o le fanua e auauna iā te ia.
7 E auauna foʻi atunuu uma iā te ia, o lona atalii, ma le atalii o lona atalii, seʻia oo mai le taimi o lona lava nuu,+ pe a fai o ia ma pologa a atunuu e tele ma tupu sili.’+
8 “ʻ“‘A o le atunuu ma le malo e lē mana‘o e auauna iā Nepukanesa le tupu o Papelonia, ma lē mana‘o e tuu atu lona ua i le amo a le tupu o Papelonia, ou te faasalaina lenā atunuu i le pelu,+ o le oge, ma le faamaʻi,’ ua fetalai mai ai Ieova, ‘seʻia ou faaumatia i latou i lona lima.’
9 “ʻ“‘O lea, aua tou te faalogo i o outou perofeta, o o outou tagata e faia valovaloga faataulāitu, o o outou faimiti, o o outou tagata e faia faiga faaagaga, ma o outou taulāitu, o ē e fai atu iā te outou: “E tou te lē auauna i le tupu o Papelonia.”
10 Auā ua latou vavalo atu iā te outou mea pepelo, ina ia ave mamao ese ai outou mai i lo outou laueleele, ma ou faataapeape ai outou ma faaumatia outou.
11 “ʻ“‘A o le atunuu e tuu atu lona ua i le amo a le tupu o Papelonia ma auauna iā te ia, ou te faataga o ia ina ia nofo ai pea* i lona laueleele,’ ua fetalai mai ai Ieova, ‘e galue ma nofo ai.’”’”
12 Na ou tautala atu foʻi faapea iā Setekaia+ le tupu o Iuta: “Ia tuu atu o outou ua i le amo a le tupu o Papelonia, ia auauna iā te ia ma lona nuu ma outou ola ai pea.+
13 Aiseā o le a tou feoti ai ma lou nuu i le pelu,+ o le oge,+ ma le faamaʻi,+ e tusa ma le fetalaiga a Ieova i le atunuu e lē auauna i le tupu o Papelonia?
14 Aua neʻi faalogo atu i upu a perofeta ua faapea mai iā te outou, ‘E tou te lē auauna i le tupu o Papelonia,’+ auā ua latou vavalo atu mea pepelo iā te outou.+
15 “‘Auā ou te leʻi aauina atu i latou,’ ua fetalai mai ai Ieova, ‘ae ua faia e i latou valovaloga pepelo i loʻu igoa, o le mea lea ou te faataapeapeina ai outou, ma fano foʻi outou, o outou ma le ʻauperofeta o loo vavalo atu iā te outou.’”+
16 Na ou fai atu foʻi i ositaulaga ma lenei nuu uma: “O le mea lenei ua fetalai mai ai Ieova, ‘Aua neʻi outou faalogo atu i upu a o outou perofeta ua vavalo atu iā te outou, e faapea: “Faauta! Ua toeitiiti nei ona toe aumaia lea o ipu o le fale o Ieova mai i Papelonia!”+ auā ua latou vavalo atu mea pepelo iā te outou.+
17 Aua neʻi faalogo atu iā i latou. Ia auauna i le tupu o Papelonia ma outou ola ai pea.+ Aiseā o le a fai ai lenei aai ma mea e faatafunaina?
18 Ae afai o ni perofeta i latou ma afai foʻi ua iā i latou le afioga a Ieova, faamolemole seʻi o latou ʻaiʻoi atu iā Ieova o ʻau, ina ia lē avatua i Papelonia ipu o loo totoe i le fale o Ieova, ma le fale o le tupu o Iuta, ma Ierusalema.’
19 “Auā o le mea lenei ua fetalai mai ai Ieova o ʻau e faatatau i poutū,+ o le vai,*+ o taavale toso,+ ma ipu o loo totoe o loo iai pea i lenei aai,
20 e leʻi avea e Nepukanesa le tupu o Papelonia, ina ua ia ave faapagota Iekonia le atalii o Ioakima, o le tupu o Iuta, mai i Ierusalema i Papelonia, faatasi ai ma tamālii uma o Iuta ma Ierusalema;+
21 ioe, o le mea lenei ua fetalai mai ai Ieova o ʻau, o le Atua o Isaraelu e faatatau i ipu o loo totoe pea i le fale o Ieova, ma le fale o le tupu o Iuta, ma Ierusalema:
22 ʻ“E aveina atu lava na mea i Papelonia,+ ma e iai pea i inā seʻia oo i le aso ou te manatua ai i latou,” ua fetalai mai ai Ieova. “Ou te toe aumaia na mea ma toe faafoʻisia i lenei nofoaga.”’”+
Faamatalaga Pito i Lalo
^ Epe., “ou te tuuina atu i lē ua ou iloa e tatau i ai.”
^ Epe., “mālōlō.”
^ E faasino atu i le faatanoa vai telē ʻapamemea o le malumalu.
