O le Tusi a Iakopo 4:1-17
4 O le ā le pogai ua outou fetauaʻi ma femisaaʻi ai? Pe e lē pogai mai ea i tou tuʻinanauga faaletino o loo feteenaʻi i totonu o outou?*+
2 Ua outou tuʻinanau ae ua outou lē maua lava. Ua outou fefasiotia‘i ma mananaʻo tele, ae ua outou lē maua. Ua outou femisaaʻi ma fetauaʻi.+ Ua outou lē maua auā ua outou lē ōle atu.
3 Pe afai foʻi e tou te ōle atu, e tou te lē mauaina auā e sesē le māfuaaga ua outou ōle atu ai, ina ia faamalieina o outou tuʻinanauga faaletino.
4 O outou tagata mulilulua e,* pe e tou te lē iloa ea o le faauō atu i le lalolagi ua fai ai se tasi ma fili o le Atua? O lea la, o so o se tasi e fia uō ma le lalolagi ua fai o ia ma fili o le Atua.+
5 Po ua outou manatu ea ua taʻua fua i tusitusiga paia e faapea: “O le agaga o le matauʻa lea e i totonu o i tatou, ua ala ai ona tatou manaʻonaʻo pea”?+
6 Peitaʻi, e sili atu lava le agalelei faifua ua Ia foaʻi mai. O lea ua faapea mai ai: “E tetee atu le Atua i ē e faamaualuluga,+ ae e foaʻi mai e ia le agalelei faifua i ē e lotomaulalo.”+
7 O lea la, ia outou gauaʻi atu i le Atua+ ae ia tetee atu i le Tiapolo,+ ona sola ese ai lea o ia mai iā te outou.+
8 Ia outou mafuta vavalalata atu i le Atua, ona mafuta vavalalata mai lea o ia iā te outou.+ O outou tagata agasala e, inā fafano ia o outou lima.+ O outou tagata faalotolotolua e, inā faamamā ia o outou loto.+
9 Inā faanoanoa ia ma faavauvau ma fetagisi.+ Ia liua lo outou ʻataʻata i le faavauvau, ma ia liua lo outou olioli i le lotomafatia.
10 Inā faamaulalo ia outou i luma o le silafaga a Ieova,*+ ona faaeaina lea o outou e ia.+
11 Le ʻauuso e, aua le faitio le tasi i le isi.+ O lē e faitio pe faamasino i lona uso, ua faitio ma faamasino e ia le tulafono. O lenei, afai e te faamasino i le tulafono, e lē o oe o sē e usiusitaʻi i le tulafono a o se faamasino.
12 E toʻatasi lava le Faitulafono ma le Faamasino,+ o lē e mafai ona ia faaola ma faaumatia.+ A o oe, o ai ea oe e te faamasino ai i lou tuaoi?+
13 O lenei, o outou o ē faapea mai: “O le asō po o a taeao e tatou te malaga atu ai i lenā aai, ma nonofo ai mo se tausaga, e fai ai se pisinisi ma maua ai ni polofiti,”+
14 ae e tou te lē iloa le mea o le a tupu iā te outou a taeao.+ Auā ua pei lava outou o le puao e aliali mai i sina taimi puupuu, ona toe mou atu lea.+
15 Nai lo o lea, e ao ona outou faapea atu: “Pe a finagalo i ai Ieova,*+ o le a tatou maua le ola, ma faia ai lea mea ma lea mea.”
16 A o lenei ua outou faamaualuluga i a outou upu faasausili. E leaga na upu faasausili.
17 O lea la, afai ua iloa e se tasi le mea saʻo e ao ona fai, ae e lē faia, ua agasala ai o ia.+
