Hosea 1:1-11
1 O le afioga a Ieova na oo mai iā Hosea,* le atalii o Peeri i aso o Usia,+ o Iotama,+ o Aasa+ ma Esekia,+ o tupu o Iuta,+ ma i aso foʻi o Ierepoamo+ le atalii o Ioasa+ le tupu o Isaraelu.
2 Ua amata ona folafola atu e Ieova ana afioga e ala iā Hosea, ma ua fetalai mai Ieova iā Hosea: “Inā alu ia ma e faaipoipo i se fafine talitane* ma o le a iai sau fanau ona o lana talitane,* talu ai o faiga faatalitane* ua liliuese atoatoa ai le nuu mai iā Ieova.”+
3 Ona alu lea o ia ma faaipoipo iā Komeri le afafine o Tipelaima, ma ua tō o ia ma fanau mai ai sona atalii.
4 Ona fetalai mai lea o Ieova iā Hosea: “Ia faaigoa o ia iā Isereelu,* auā ua toeitiiti ona ou taui atu lea i le aiga o Ieʻu+ ona o le toto masaa o Isereelu, ma ou te faamutaina le pulega tautupu a le aiga o Isaraelu.+
5 I lenā aso, ou te gausia ai le ʻaufana a Isaraelu i le vanu* o Isereelu.”
6 Ua toe tō Komeri ma fanau mai ai se tama teine. Ona fetalai mai lea o le Atua iā Hosea: “Ia faaigoa o ia iā Loruama,* auā ou te lē toe alofa mutimutivale+ i le aiga o Isaraelu, ma ou te matuā aveesea i latou.+
7 Ae ou te alofa mutimutivale i le aiga o Iuta,+ o le a ou laveaʻiina i latou, o aʻu o Ieova lo latou Atua;+ ou te lē faaolaina i latou i se ʻaufana, po o se pelu, po o se taua, po o solofanua po o tagata tiʻetiʻe solofanua.”+
8 Ua faateʻa e ia Loruama ma le susu, ma ua toe tō o ia ma fanau mai ai se tama tama.
9 Ona Ia fetalai mai lea: “Ia faaigoa o ia iā Loama,* auā e lē o outou o soʻu nuu, ma e lē o so outou Atua foʻi aʻu.
10 “O le faitau aofaʻi o le fanauga a Isaraelu o le a pei o le oneone o le sami e lē mafai ona fuatia pe faitauina.+ O le nofoaga foʻi na faapea atu ai iā i latou, ‘E lē o soʻu nuu outou,’+ o le a faapea atu ai iā i latou, ‘O atalii o le Atua soifua outou.’+
11 O le a faapotopoto faatasi le fanauga a Iuta ma le fanauga a Isaraelu i le autasi,+ ma o le a latou filifilia mo i latou se taʻitaʻi e toʻatasi, ma ō ese mai i le atunuu, auā o se aso tāua tele lea iā Isereelu.+
Faamatalaga Pito i Lalo
^ O le faapuupuuga o Hosaia, o lona uiga “Faaolaina e Ioa.”
^ Po o le “faitaaga; e feusuaʻi solo.”
^ Po o le “faitaaga; lona feusuaʻi solo.”
^ Po o “le faitaaga; le feusuaʻi solo.”
^ Lona uiga “E Lūlūina e le Atua Fatu.”
^ Po o “le fanua laugatasi.”
^ Lona uiga “E Leʻi Faaalia i ai le Alofa Mutimutivale.”
^ Lona uiga “E Lē o Soʻu Nuu.”
