Galuega a le ʻAuaposetolo 5:1-42
5 Peitaʻi, e iai se tagata e igoa iā Anania ma lana avā o Safaira, na faatau atu so la fanua.
2 Na ia nanā se isi vaega o le tau o le fanua, ae avatu na o se vaega i le ʻauaposetolo,+ ma na iloa foʻi e lana avā lenei mea.
3 Ona fai atu lea o Peteru: “Anania e, aiseā ua faaosoosoina ai oe e Satani ina ia pepelo+ i le agaga paia,+ ma nanā se vaega o le tau o le fanua?
4 A o iai iā te oe le fanua, pe e leʻi avea ea ma ou fanua? Ina ua uma foʻi ona faatau atu, pe e te leʻi pule ai ea i le tau? Aiseā ua e fuafua ai i lou loto e faia lenei gaoioiga? Ua e lē pepelo i tagata, a o le Atua.”
5 Ina ua faalogo Anania i nei upu, ona paʻū ai lea o ia i lalo ma oti ai. Ua matuā fefefe foʻi i latou uma na faalogo i lenei mea.
6 Ona tutū lea i luga o tauleleʻa ma taataʻai o ia i ʻie, ua ave o ia i fafo ma tanu.
7 Ina ua mavae sina taimi e tusa ma le tolu itula, ae sau loa lana avā, e na te leʻi iloa le mea ua tupu.
8 Ua fai atu Peteru iā te ia: “Seʻi e taʻu mai iā te aʻu, po o le tau atoa lea na lua faatau ai le fanua?” Ua ia fai mai: “Ioe, o le tau lenā.”
9 Ona fai atu lea o Peteru iā te ia: “Aiseā ua oulua malilie faatasi ai e tofotofo i le agaga o Ieova?* Faauta! O na e tutū mai i le faitotoʻa i latou na tanuina lau tane, ma o le a latou aveina foʻi oe.”
10 Ona paʻū loa lea o ia i luma o Peteru ma oti ai. Ina ua ō mai i totonu tauleleʻa, ua latou maua o ia ua oti, ona latou ave lea o ia ma tanu i tafatafa o lana tane.
11 Ona matuā fefefe ai lea o le faapotopotoga atoa faapea i latou uma ua faalogo i lenei mea.
12 Ua faia foʻi e lima o aposetolo le tele o faailoga ma mea ofoofogia* i luma o tagata,+ ma e masani ona latou faapotopoto uma i le Faapaologa o Solomona.+
13 O le mea moni, e leʻi lototetele isi e aufaatasi atu iā i latou; peitaʻi, ua viiviia i latou e tagata.
14 E lē gata i lea, ua faaopoopoina pea le toʻatele o tane ma fafine o ē ua talitonu i le Alii.+
15 Na oo lava ina latou avatu tagata mamaʻi ma faataooto i tamaʻi moega ma fata i ala tetele, ina ia mafai ona lafoia i ai le ata o Peteru i luga o nisi o i latou a o savali ane.+
16 Ua ō mai pea foʻi le toʻatele mai i aai ia e siʻomia ai Ierusalema, ua aumai tagata mamaʻi ma ē ua puapuagatia i agaga leaga, ma ua faamālōlōina i latou uma.
17 Ona ō mai lea o le ositaulaga sili ma i latou uma ua faatasi ma ia, o ē e iai i le lotu a le ʻau Satukaio, ma ua tutumu i latou i le lotoleaga.
18 Ua latou puʻea aposetolo ma tuu i latou i le falepuipui o le aai.+
19 Peitaʻi, na tatala e le agelu a Ieova* faitotoʻa o le falepuipui+ i le pō, ma aumai i latou i fafo ma faapea atu:
20 “Inā ō ia outou ma tutū i le malumalu, ma taʻutaʻu atu pea i tagata mea uma e uiga i lenei olaga.”
21 Ina ua uma ona latou faalogo atu i nei mea, ona latou ulufale atu lea i le malumalu i le tafa o ata, ma amata ona aʻoaʻo atu.
Ina ua taunuu mai le ositaulaga sili ma i latou ua faatasi ma ia, ona latou faapotopoto lea o le Faamasinoga Sili ma toeaina o le fanauga a Isaraelu, ma aauina atu leoleo i le falepuipui e aumai le ʻauaposetolo i o latou luma.
22 Ae ina ua ō atu leoleo i le falepuipui, e latou te leʻi maua i latou. Ona latou toe foʻi lea ma faamatala atu
23 e faapea: “Ua matou maua atu o loo loka le falepuipui ma faamau uma faitotoʻa, o loo tutū foʻi leoleo i faitotoʻa, ae ina ua tatala atu, na matou iloa ai e leai nisi o iai i totonu.”
24 Ina ua faalogo le taʻitaʻi o leoleo o le malumalu ma le ʻaufaitaulaga sili i nei upu, ona fememeaʻi lea o i latou po o le ā o le a iʻu i ai lenei mea.
25 Peitaʻi ua sau se tasi ma faamatala iā i latou e faapea: “Faauta! O tamāloloa ia na outou tuuina i le falepuipui, o loo tutū i le malumalu ma aʻoaʻo atu i tagata.”
26 Ona ō lea o le taʻitaʻi ma ana leoleo e aumai i latou, ae e leʻi faasauā iā i latou ona o le fefefe neʻi fetogia i latou e tagata+ i maa.
27 Ona latou aumaia lea o i latou ma faatutū i luma o le Faamasinoga Sili. Ua fesiligia i latou e le ositaulaga sili
28 ma faapea atu: “Na matou matuā fai atu iā te outou, e matuā sā lava ona toe aʻoaʻo atu i lenā igoa,+ ae faauta! ua outou faatumu Ierusalema i a outou aʻoaʻoga, ma ua outou maumauaʻi e tuuina mai i o matou luga le toto o lenā tagata.”+
29 Ua tali mai Peteru ma isi aposetolo: “E tatau ona matou usiusitaʻi i le Atua o le pule, nai lo o tagata.+
30 Ua faatūina e le Atua o o tatou augātamā Iesu, o lē na outou fasiotia i le faatautauina o ia i le laau.+
31 Ua faaeaina o ia e le Atua i lona itu taumatau+ o le Sui Sili+ ma o le Faaola,+ ina ia mafai ai ona salamō Isaraelu, ma maua ai le faamagaloga o agasala.+
32 O i matou o molimau i nei mea,+ faapea foʻi le agaga paia,+ lea ua tuuina mai e le Atua iā i latou e usiusitaʻi iā te ia o le pule.”
33 Ina ua latou faalogo i lenei mea, ona matuā feita* ai lea ma mananaʻo e fasiotia i latou.
34 Ae ua tulaʻi mai i le Faamasinoga Sili se Faresaio e igoa iā Kamalielu;+ o ia o se faiaʻoga o le Tulafono e faaaloalogia e tagata uma, ma na ia faatonu atu ina ia tuu atu i fafo nei tamāloloa mo sina taimi.
35 Ona ia faapea atu lea iā i latou: “Tagata o Isaraelu e, ia outou faaeteete i le mea ua outou mananaʻo e fai i nei tamāloloa.
36 O se faataʻitaʻiga, i aso ua mavae, na tulaʻi mai ai Tiuta ma faapea mai o ia o se tagata tāua, ma e toʻatele tane pe e tusa ma le toʻa 400 na auai i lana vaega. Ae na fasiotia o ia ma faataapeapeina i latou uma na mulimuli iā te ia, ma lē taulau ai na taumafaiga.
37 Ua mavae atu o ia, ae tulaʻi mai Iuta le Kalilaia i aso o le tusigāigoa, ma na ia taaʻina tagata e mulimuli atu iā te ia. Na oti foʻi lenā tagata, ma na faataapeapeina i latou uma na mulimuli iā te ia.
38 O le mea lea ou te fai atu ai iā te outou, aua tou te aiā i nei tagata, ae tuu ai pea i latou. Auā afai e mai i tagata lenei fuafuaga po o lenei galuega, o le a soloia la;
39 ae afai e mai i le Atua, e lē mafai ona outou soloia,+ ina neʻi mea ane ua outou fai taua i le Atua.”+
40 Ona latou faalogo lea i lana fautuaga, ma aami le ʻauaposetolo, ua sasa i latou+ ma faatonu atu, e aua neʻi toe tautatala i le suafa o Iesu, ma tuu atu loa i latou e ō.
41 Ona ō ese ai lea o i latou mai i luma o le Faamasinoga Sili, ua olioli+ ina ua taʻuaogāina i latou ia faaleagaina ona o lona suafa.
42 Ua lē aunoa ona latou aʻoaʻo atu i aso uma lava, ma folafola atu le tala lelei e uiga iā Iesu le Keriso,+ i le malumalu ma mai i lea fale i lea fale.+
