Galuega a le ʻAuaposetolo 14:1-28
14 A o iai i Ikonio, ua la ulufale faatasi atu i le sunako o tagata Iutaia, ma o lo la tautatala atu i upu faaoso naunau, ua talitonu ai le toʻatele o tagata Iutaia ma tagata Eleni.
2 A o tagata Iutaia e leʻi talitonu, ua latou faaita ma faasesēina tagata o nuu ese ina ia tetee atu i le ʻauuso.+
3 O lea, ua umi se taimi o la tautatala atu ma le lototetele e ala i le pule mai iā Ieova,* o lē ua molimau i le upu o lona agalelei faifua, i le faatagaina o i laʻua e faia faailoga ma mea ofoofogia.*+
4 Ae ua vaeluaina le toʻatele o tagata o le aai; o isi ua ʻau i tagata Iutaia, a o isi ua ʻau i aposetolo.
5 Ona taupulepule lea o tagata o nuu ese ma tagata Iutaia faatasi ma o latou taʻitaʻi, ina ia sauāina ma fetogi i laʻua i maa.+
6 Ina ua la iloa lenei mea, ona la sosola ai lea i aai o Lukaonia, o Lusa, o Teipe, ma nuu tuaoi.+
7 Ua la folafola atu ai pea le tala lelei i inā.
8 E iai se tamāloa i Lusa o loo saofaʻi ona na pipili o ia talu ona fanau mai, ma e leʻi savali lava o ia.
9 O loo faalogologo mai lenei tagata a o tautala atu Paulo. Ua pulatoʻa atu Paulo iā te ia, ma iloa ai o loo i lenei tagata le faatuatua e malosi ai,+
10 ma ua faapea atu ma le leotele: “Ia tū i luga.” Ona oso lea o ia i luga ma savali.+
11 Ina ua vāai atu le motu o tagata i le mea ua faia e Paulo, ona latou alalaga atu lea i le gagana Lukaonia: “Ua liutagata atua, ma ua ō ifo iā i tatou!”+
12 Ua latou faaigoa Panapa iā Seu, a o Paulo iā Hereme, ona o ia lea o loo taulamua e tautala atu.
13 E tū le malumalu o Seu i le mea e ulu atu ai i le aai, ma ua aumaia e le ositaulaga a Seu i faitotoʻa o le aai, o povi poʻa ma pale, ma ua manaʻo e ofo atu taulaga faatasi ma le motu o tagata.
14 Peitaʻi, ina ua faalogo i ai aposetolo o Panapa ma Paulo, ona la saeia lea o o la ofu ma feosofi atu i le motu o tagata, ua alalaga atu e faapea:
15 “Alii e, aiseā ua outou faia ai nei mea? O i maʻua foʻi o ni tagata e iai vaivaiga e pei lava o outou.+ O loo ma folafola atu le tala lelei iā te outou, ina ia outou liliuese mai i nei mea lē aogā, ae liliu atu i le Atua soifua, o lē na faia le lagi ma le lalolagi, ma le sami, ma mea uma ua iai.+
16 Na ia tuu i le faitalia a nuu ese i tupulaga ua mavae, e savavali i o latou lava ala,+
17 ae na ia saunia se molimau+ e ala i mea lelei na ia faia; na ia foaʻi mai le timu mai i le lagi ma fuata o le tau,+ ma faamalieina outou i le anoanoaʻi o meaʻai, ma ua tutumu ai o outou loto i le olioli.”+
18 Peitaʻi, e ui lava ina la fai atu nei mea, ae e toetoe lava a lē mafai ona la taofia le motu o tagata, mai i le faia o taulaga iā i laʻua.
19 Ae ua taunuu ane tagata Iutaia mai i Anetioka ma Ikonio, ma latou faaoso i le motu o tagata.+ Ona latou fetogi ai lea o Paulo i maa ma toso o ia i tua o le aai, ma le manatu ua oti o ia.+
20 Peitaʻi, ina ua siʻosiʻomia o ia e le ʻausoo, ona ia tū lea i luga ma alu atu i le aai. I le aso na sosoo ai, ua la ō atu ai ma Panapa i Teipe.+
21 Ina ua uma ona la folafolaina atu le tala lelei i lenā aai, ma maua mai ai le tele o soo, ona la toe foʻi lea i Lusa, Ikonio, ma Anetioka.
22 Ua la faamalosiau i le ʻausoo,*+ ma faalaeiau i latou ina ia tumau i le faatuatua ma faapea atu: “E tatau ona tatou sao atu i le Malo o le Atua i le tele o puapuaga.”+
23 Ua la tofia foʻi toeaina mo i latou i faapotopotoga taʻitasi,+ ua tatalo ma anapopogi,+ ma ua la tuuina atu i latou i le tausiga a Ieova,* o lē ua latou talitonu i ai.
24 Ona la ui atu lea i Pisitia ma oo atu ai i Pafulia,+
25 ma ina ua uma ona folafola atu le upu i Pereka, ona la ō ifo ai lea i Ataleia.
26 Ua la folau mai foʻi i inā agaʻi i Anetioka, lea na tuuina atu ai i laʻua i le agalelei faifua o le Atua mo le galuega lea ua la faataunuuina.+
27 Ina ua taunuu i laʻua, ona la faapotopoto faatasi lea o le faapotopotoga, ma faamatala atu le tele o mea na faia e le Atua e ala iā i laʻua, ma ua ia tatalaina le faitotoʻa o le faatuatua mo nuu ese.+
28 E tele foʻi aso ua la nonofo ai ma le ʻausoo.
