O le Tusi i le Faapotopotoga i Filipi 4:1-23
4 O lenei, oʻu uso e, o ē ou te alofa ma naunau i ai, o loʻu olioli ma loʻu pale,+ ia outou tutū mausalī+ i le Alii e pei ona ou apoapoaʻi atu ai.
2 Ou te ʻaiʻoi atu iā Evotia ma Sunetui, ina ia tutusa o la manatu i le autasi i le Alii.+
3 Ioe, ou te talosaga atu foʻi iā te oe, o lē e faamaoni na ma galulue faatasi, ina ia fesoasoani atu pea i nei fafine, o ē na matou tauivi faatasi e talaʻia le tala lelei, atoa ma Kelemene ma isi foʻi o ē na matou galulue faatasi, ua tusia o latou igoa i le tusi o le ola.+
4 Ia olioli e lē aunoa i le Alii. Ou te toe fai atu foʻi, Ia olioli!+
5 Ia iloa e tagata uma lo outou magafagafa.+ Ua lata mai le Alii.
6 Aua neʻi popole i se mea,+ ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai;+
7 ona leoleoina ai lea o o outou loto+ ma mafaufau i le filemu+ mai i le Atua, lea e silisili i mea uma lava e tatou te malamalama ai, e ala iā Keriso Iesu.
8 O le mea lea le ʻauuso e, o mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le alofa, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.+
9 O mea foʻi ua outou aʻoaʻoina ma talia, ma faalogo, ma vāai mai ai iā te aʻu, ia outou faia na lava mea,+ ona iā te outou lea o le Atua o le filemu.
10 Ou te matuā olioli i le autasi i le Alii, ona o lea ua outou toe manatu mamafa mai iā te aʻu.+ E ui sa outou manatu mamafa iā te aʻu, ae e leʻi maua se avanoa e faaalia mai ai.
11 Ou te lē o fai atu ona o le lē tagolima, auā ua aʻoaʻoina aʻu ina ia lotomalie i mea ua ou maua, e tusa lava po o ā tulaga e oo iā te aʻu.+
12 Ua ou iloa feagai ma le lē tagolima,+ ua ou iloa foʻi feagai ma le tele o mea e maua. O mea uma lava ma tulaga uma lava, ua ou aʻoaʻoina ai le auala e feagai ai ma le maʻona ma le matelāina, atoa ma le tele o mea ma le leai o ni mea.
13 O mea uma lava, ua ou maua le malosi mai i lē na foaʻi maia iā te aʻu le mana.+
14 E ui i lea, sa outou agalelei i lo outou fesoasoani mai iā te aʻu i oʻu puapuaga.
15 O outou Filipi e, ua outou iloa foʻi, ina ua faatoʻā uma ona outou aʻoaʻoina le tala lelei ma ou tuua ai Maketonia, e leai lava se faapotopotoga na aufaatasi ma aʻu i le foaʻi atu ma le talia mai, e na o outou lava;+
16 auā foʻi a o oʻu iai i Tesalonia, e leʻi faatasi ae e faalua ona outou auina mai iā te aʻu se mea na ou lē tagolima ai.
17 E lē ona ua ou naunau e saʻili se meaalofa, ae ona o loʻu naunau e saʻili le fua e atili ai ona lelei o outou tulaga.*
18 Peitaʻi, ua ou maua mea uma ou te manaʻomia ma ua matuā tele lava. Ua matuā faamalieina aʻu talu ai ua ou maua meaalofa na outou auina mai e ala iā Epaferoti,+ o se mea manogi lelei,+ o le taulaga talileleia, e matuā finagalo malie i ai le Atua.
19 O le mea lea, e foaʻi atu e loʻu Atua iā te outou mea uma ua outou lē tagolima ai+ e tusa ma le anoanoaʻi o lona tamaoaiga e ala iā Keriso Iesu.
20 O lenei, ia faamamaluina lo tatou Atua, o le Tamā lea, e faavavau, faavavau lava. Amene.
21 E momoli atu oʻu alofaaga i le ʻaupaia uma o ē ua autasi ma Keriso Iesu. E momoli atu foʻi iā te outou alofaaga o le ʻauuso o loo matou faatasi.
22 O loo momoli atu alofaaga o le ʻaupaia uma, aemaise lava i latou o le aiga o Kaisara.+
23 Tau ina ia iai le agalelei faifua o le Alii o Iesu Keriso i le agaga ua outou faaalia.
Faamatalaga Pito i Lalo
^ E faasino atu i le auala e silasila ai le Atua i a latou galuega.
