Esoto 35:1-35
35 Mulimuli ane, ua faapotopoto mai e Mose le faapotopotoga atoa o le fanauga a Isaraelu ma faapea atu iā i latou: “O mea nei na poloaʻi mai Ieova ia faia:+
2 E ono aso e fai ai galuega, a o le aso lona fitu o le aso paia lea iā te outou, o le sapati e matuā mālōlō ai iā Ieova.+ E fasiotia se tasi na te faia galuega i lea aso.+
3 Aua tou te tutu se afi i le aso Sapati i so o se mea e tou te nonofo ai.”
4 Ua faapea atili atu Mose i le faapotopotoga atoa o le fanauga a Isaraelu: “O le mea lenei ua poloaʻi mai ai Ieova,
5 ‘Ia outou faia se foaʻi mo Ieova.+ Ia taʻitasi ma fai lana foaʻi mo Ieova e tusa ma lona lotomalie:+ o auro, o siliva, o ʻapamemea,
6 o filo lanu moana, o fulufulu mamoe lanu violē, o mea ua vali mūmū sesega, o ʻie lino lelei, o fulufulu ʻoti,+
7 o paʻu o mamoe poʻa ua vali mūmū, o paʻu o takesa, o laau o le setima,
8 o le suāuu mo molī, o le suāuu pasama e faauu ai ma fai ai le mea manogi lelei e mū,+
9 o maa soama, ma isi maa e teuteu ai le efota+ ma le ufifatafata.+
10 “‘Ia ō mai o ē uma e tomai*+ ua iā te outou ina ia faia mea uma ua poloaʻi mai ai Ieova,
11 o lona uiga o le faleʻie paia ma ona vaega eseese, o ona ufiufi, o ona lave, o ona auivi laupapa, o ona pou faalava, o ona poutū, ma ona lagolago;
12 o le Atolaau+ ma ona amo,+ o lona ufiufi,+ ma le ʻie puipui+ e vaelua ai;
13 o le laulau+ ma ona amo ma mea uma e faaaogā ai ma le falaoa e laulauina;+
14 o le tuugāmolī+ e faamalamalama ai ma mea uma e faaaogā ai, ma ona molī ma le suāuu e faamalamalama ai;+
15 o le fata faitaulaga e faamū ai mea manogi+ ma ona amo; o le suāuu e faauu ai ma le mea manogi lelei e mū;+ o le ʻie pupuni i le mea e ulufale ai i le faleʻie paia;
16 o le fata faitaulaga e fai ai taulaga mū+ ma le mea valavala ʻapamemea, o ona amo ma mea uma e faaaogā ai; o le faatanoa ma lona tulaga;+
17 o ʻie e tautau i le lotoā,+ o poutū ma ona lagolago; o le ʻie pupuni o le mea e ulufale ai i le lotoā;
18 o pine o le faleʻie paia, o pine o le lotoā ma ona maea;+
19 o ofu ua lelei ona lalagaina+ mo le auaunaga i le mea paia, o ofu paia mo Arona+ le ositaulaga, ma ofu o ona atalii o ē e auauna o ni ositaulaga.’”
20 Ona ō ese ai lea o le faapotopotoga atoa o le fanauga a Isaraelu mai i luma o Mose.
21 Ua ō mai ē uma ua uunaʻia i latou e o latou loto,+ ma ua faagaeetia i latou e aumaia a latou foaʻi mo Ieova e faaaogā mo le faleʻie o le feiloaʻiga, o mea uma e manaʻomia mo le auaunaga i inā, ma ofu paia.
22 Ua latou ō mai pea o tane faatasi ma fafine, o ē uma ua lotomalilie, ma ua latou aumaia o pine teuteu, o tautaliga, o mama, o isi teuga, ma mea eseese ua faia i le auro. Ua ofoina atu e i latou uma a latou taulaga* o auro iā Ieova.+
23 O i latou uma o ē ua iai o filo lanu moana, o fulufulu mamoe lanu violē, o mea ua vali mūmū sesega, o ʻie lino lelei, o fulufulu ʻoti, o paʻu mamoe poʻa ua vali mūmū, ma paʻu takesa, ua latou aumaia ia mea.
24 O i latou uma ua faia a latou foaʻi i le siliva ma le ʻapamemea, ua latou faia le foaʻi mo Ieova, ma o i latou uma ua iai laau o le setima ua latou aumaia foʻi mo so o se galuega.
25 O fafine tomai uma+ ua latou milo filo, ma ua latou aumaia mea na latou miloina: o le filo lanu moana, o le fulufulu mamoe lanu violē, o mea ua vali mūmū sesega, ma le ʻie lino lelei.
26 O fafine tomai uma foʻi ua uunaʻia i latou e o latou loto, ua latou milo filo mai i fulufulu ʻoti.
27 Ua aumaia e taʻitaʻi o maa soama, ma isi maa e teuteu ai le efota ma le ufifatafata,+
28 o le suāuu pasama ma le suāuu e faamalamalama ai, ma le suāuu e faauu ai+ ma fai ai le mea manogi lelei e mū.+
29 O tane ma fafine uma o ē ua faagaeetia i latou e o latou loto, ua latou aumaia se mea mo le galuega na poloaʻi mai ai Ieova e ala iā Mose ina ia faia; ua aumaia e le fanauga a Isaraelu o se taulaga tauofo iā Ieova.+
30 Ona faapea atu lea o Mose i le fanauga a Isaraelu: “O lea ua filifilia e Ieova o Pesaleli le atalii o Auri, le atalii o Huro mai i le ituaiga o Iuta.+
31 Ua ia faatumuina o ia i le agaga o le Atua, ina ia maua e ia le atamai, le malamalama, ma le poto e faia ai galuega eseese uma
32 i le tusiaina ma le tomai o ata, i le faia o galuega i auro, siliva, ma ʻapamemea,
33 i le vaneina o maa ina ia faamau ai, ma galue i laau ina ia faia ai galuega atamai eseese.
34 Ua ia tuuina i lona loto le tomai e aʻoaʻo atu ai, o ia ma Oliavu+ le atalii o Aisamako mai i le ituaiga o Tanu.
35 Ua ia faatumuina i laʻua i le tomai*+ e faia ai galuega a se tufuga, o sē e suʻi teuteu, o sē e lalaga i filo lanu moana, i fulufulu mamoe lanu violē, i mea ua vali mūmū sesega, i ʻie lino lelei, ma sē e lalagaina mea. O tane ia ua faia galuega eseese uma, ma saunia ata eseese uma.
Faamatalaga Pito i Lalo
^ Epe., “e atamai o latou loto.”
^ Po o “taulaga lūlū.”
^ Epe., “i le atamai o le loto.”
