Esoto 10:1-29
10 Ua fetalai mai Ieova iā Mose: “Ia e alu iā Farao, auā ua ou tuu pea lona loto ma loto o ana auauna e faamaaaina,+ ina ia ou faia aʻu faailoga nei i ona luma,+
2 ina ia e folafola atu i ou atalii, ma atalii o ou atalii loʻu faapuapuagatiaina o Aikupito ma aʻu faailoga na ou faia iā i latou;+ ma e tou te iloa ai lava o aʻu o Ieova.”
3 Ona ō atu lea o Mose ma Arona iā Farao ma faapea atu iā te ia: “O le mea lenei ua fetalai mai ai Ieova le Atua o tagata Eperu, ‘O le ā le umi e te musu ai e gauaʻi mai iā te aʻu?+ Ia e tuu mai loʻu nuu e ō ina ia latou auauna mai iā te aʻu.
4 Auā afai e faaauau ona e lē tuuina mai loʻu nuu e ō, o le a ou aumaia sē akerise i ou laufanua a taeao.
5 O le a ufitia ai le fogāeleele atoa, ma e lē mafai ona iloa atu le laueleele. E ʻaina e nei sē mea uma e leʻi faaleagaina e le uatoʻa ma mea uma ua totoe iā te outou, ma e ʻaina foʻi e nei sē o laau uma o loo tutupu mo outou i le laufanua.+
6 E tutumu ai foʻi ou fale, o fale o au auauna ma fale uma o Aikupito, i le tele e leʻi iloa muamua e ou tamā ma tamā o ou tamā, talu ona latou soifua i lenei nuu seʻia oo mai i le asō.’”+ Ona ia liliu lea ma alu ese mai iā Farao.
7 Ona fai mai lea o auauna a Farao iā te ia: “O le ā le umi e faaauau ai ona faasoesa* lenei tagata iā i tatou? Ia tuu atu tagata e ō ina ia latou auauna iā Ieova lo latou Atua. Pe e te leʻi silafia ea ua faatamaʻia Aikupito?”
8 Ona toe aami lea e Farao o Mose ma Arona ma ua ia faapea mai iā i laʻua: “Ia outou ō ma auauna iā Ieova lo outou Atua. O ai tonu lava e ō?”
9 Ua tali atu Mose: “E matou te ō ma o matou tagata talavou, o tagata matutua, o matou atalii, o matou afafine, o a matou mamoe, ma a matou povi,+ auā matou te faia se tausamiga iā Ieova.”+
10 Ua ia fai mai iā i laʻua: “Pe afai ou te tuuina atu outou e ō ma a outou fanau, o lona uiga o loo faatasi Ieova ma outou.+ E manino mai o loo outou fuafua e faia se mea leaga.
11 E leai! Ia ō na o tane matutua e auauna iā Ieova, auā o le mea lenā na outou talosaga mai ai.” Ona tutuliese lea o i laʻua mai i luma o Farao.
12 Ona fetalai mai lea o Ieova iā Mose: “Ia faaloaloa lou lima i luga o le laueleele o Aikupito, ina ia ō mai ai sē akerise i luga o le laueleele o Aikupito, ma ʻai laau uma o le fanua, o mea uma ua totoe mai i le uatoʻa.”
13 Ona faaloaloa loa lea e Mose o lona tootoo i luga o le laueleele o Aikupito, ma ua faapogaia e Ieova se matagi mai i sasaʻe e agi mai i luga o le laueleele i lea aso atoa ma le pō atoa. Ua oo i le taeao ona aumaia lea e le matagi mai i sasaʻe o sē akerise.
14 Ua lolofi mai sē akerise i le laueleele atoa o Aikupito, ma ua iai pea i le atunuu atoa o Aikupito.+ Ua fai ma faafitauli tugā nei sē akerise,+ ma e leʻi iai lava se taimi na tele ai faapea ni sē akerise, ma e lē toe faapea lava.
15 Ua ufitia uma ai le fogāeleele atoa, ma ua pogisa ai le atunuu; ua ʻai e nei sē akerise laau uma o le fanua ma fua uma o laau ia na totoe mai i le uatoʻa; ua lē toe iai ni mea lanu meamata i laau po o vao o le fanua i le atunuu atoa o Aikupito.
16 Ua aami faavave e Farao o Mose ma Arona ma faapea mai: “Ua ou agasala iā Ieova lo outou Atua ma outou foʻi.
17 O lea, faamolemole, ia faamagalo laʻu agasala i lenei taimi, ma ia ʻaiʻoi atu iā Ieova lo outou Atua ina ia aveese lenei mala mataʻutia mai i oʻu luga.”
18 Ua alu ese o ia* mai iā Farao ma ʻaiʻoi atu iā Ieova.+
19 Ona suia lea e Ieova o le matagi ina ia agi malosi mai i sisifo, ma ua aveese ai sē akerise ma avatu i le Sami Ulaula. E augapiu ma se sē akerise na totoe i le atunuu atoa o Aikupito.
20 Peitaʻi, ua tuu pea e Ieova Farao e faamaaa i lona loto,+ ma e na te leʻi tuuina mai le fanauga a Isaraelu e ō.
21 Ua fetalai mai Ieova iā Mose: “Ia faaloaloa lou lima i le lagi, ina ia pogisa ai le atunuu o Aikupito, ia matuā pogisa lava.”
22 Ua faaloaloa e Mose lona lima i le lagi, ona matuā pogisa ai lea o le atunuu atoa o Aikupito mo aso e tolu.+
23 Ua lē mafai ona vaai atu le tasi i le isi, ma e leai ma se tasi ua alu ese mai i lona fale i aso e tolu; ae ua malamalama pea le mea o loo nonofo ai le fanauga uma a Isaraelu.+
24 Ona aami lea e Farao o Mose ma fai mai: “Ia outou ō e auauna iā Ieova.+ E na o a outou mamoe ma povi o le a tuu pea i inei. E mafai ona outou ō ma a outou fanau.”
25 Ae ua fai atu Mose: “Ia e tuu mai fo‘i iā i matou o* taulaga ma taulaga mū, ma matou faia ai taulaga iā Ieova lo matou Atua.+
26 E matou te ave foʻi a matou lafumanu. E lē tuua se manu e tasi,* auā e matou te faaaogāina nisi o ia manu i la matou tapuaʻiga iā Ieova lo matou Atua, ma e matou te lē iloa po o ā mea e fai ai taulaga i le tapuaʻiga iā Ieova, seʻiloga ua matou taunuu i o.”
27 O lea, ua tuu ai pea e Ieova Farao e faamaaa i lona loto, ma e leʻi lotomalie o ia e tuuina mai i latou e ō.+
28 Ona fai mai lea o Farao iā te ia: “Ia alu ese loa mai iā te aʻu! Aua e te toe taumafai e vaai mai iā te aʻu, auā o le aso e te vaai ai iā te aʻu o le a e oti ai.”
29 Ua tali atu Mose: “Ua lelei pe afai o lau saunoaga lenā. Ou te lē toe taumafai e vaai iā te oe.”
Faamatalaga Pito i Lalo
^ Epe., “avea ma mailei.”
^ E foliga mai o Mose.
^ Po o le “Ia e faataga i matou e fai.”
^ Epe., “se atigivae.”
