Esera 8:1-36
8 O alii sili nei o aiga o o latou tamā, ma ē na tusia i le tusi o gafa na matou ō aʻe faatasi mai i Papelonia i le taimi o le nofoaiga a le tupu o Aretaseta:+
2 e mai i le fanauga a Fineaso,+ o Keresoma; e mai i le fanauga a Itamaro,+ o Tanielu; e mai i le fanauga a Tavita, o Hatusa;
3 e mai i le fanauga a Sekania ma le fanauga a Parose, o Sakaria, ma sa iā te ia tane e toʻa 150 na tusia o latou igoa;
4 e mai i le fanauga a Paka-moapi,+ o Elioenai le atalii o Serakia, ma sa iā te ia tane e toʻa 200;
5 e mai i le fanauga a Satu,+ o Sekania le atalii o Iaaseelu, ma sa iā te ia tane e toʻa 300;
6 e mai i le fanauga a Atini,+ o Epete le atalii o Ionatana, ma sa iā te ia tane e toʻa 50;
7 e mai i le fanauga a Elama,+ o Iesaia le atalii o Atalia, ma sa iā te ia tane e toʻa 70;
8 e mai i le fanauga a Sefatia,+ o Sepatia le atalii o Mikaele, ma sa iā te ia tane e toʻa 80;
9 e mai i le fanauga a Ioapo, o Opetaia le atalii o Ikielu, ma sa iā te ia tane e toʻa 218;
10 e mai i le fanauga a Pani, o Selomita le atalii o Iosefia, ma sa iā te ia tane e toʻa 160;
11 e mai i le fanauga a Pepai,+ o Sakaria le atalii o Pepai, ma sa iā te ia tane e toʻa 28;
12 e mai i le fanauga a Asekata,+ o Iokana le atalii o Hakatana, ma sa iā te ia tane e toʻa 110;
13 e mai i le fanauga a Atonikama,+ o ē na mulimuli, o o latou igoa nei: o Elifaleta, o Ieielu, ma Semaia, ma sa iā i latou tane e toʻa 60;
14 ma e mai i le fanauga a Pikevai,+ o Utai, ma Saputo, ma sa iā i laʻua tane e toʻa 70.
15 Na ou faapotopotoina i latou i le vaitafe e tafe atu i Aava,+ ma faatutū ai o matou faleʻie i inā mo aso e tolu. Ae ina ua ou suʻesuʻeina le nuu ma le ʻauositaulaga, e leai se tasi o le ʻau sa Levī na ou maua ai i inā.
16 Ona ou aami lea o Elisara, o Arielu, o Semaia, o Elenatana, o Iaripa, o Elenatana, o Natano, o Sakaria, o Mesulama, o taʻitaʻi i latou, ma Ioiaripa, ma Elenatana, o aʻoaʻo i laʻua.
17 Ona ou poloaʻi atu lea iā i latou e ō iā Ito le taʻitaʻi o le nuu o Kasipeia, ma fai atu iā Ito ma ona uso o loo i Kasipeia, o ē na tupuga mai i aiga o auauna o le malumalu,* ina ia tuuina mai iā i matou o auauna mo le fale o lo matou Atua.
18 Ona sa iā i matou le aao agalelei o lo matou Atua, na latou aumaia ai se tagata faautauta mai i le fanauga a Maali,+ o le atalii o le atalii o Levi le atalii o Isaraelu. O ia lea o Serepeia+ ma ona atalii, ma ona uso, e toʻa 18 tane.
19 Na latou aumaia fo‘i Hasapea, ma sa iā te ia Iesaia mai i le fanauga a Merari,+ o ona uso, ma o latou atalii, e toʻa 20 tane.
20 Na iai foʻi auauna o le malumalu* e toʻa 220, o ē na tuuina atu e Tavita ma perenise mo le auaunaga a le ʻau sa Levī, ma ua tusia uma o latou igoa i le tusi.
21 Ona ou talaʻi atu lea o le anapogi i inā i le vaitafe o Aava, ina ia faamaulalo i matou lava i luma o lo matou Atua, ina ia saʻili ai lana ta‘ita‘iga mo la matou malaga, o i matou, o a matou fanau ma a matou mea uma.
22 Na ou māsiasi e talosaga atu i le tupu mo ni fitafita ma ni tagata tiʻetiʻe solofanua, ina ia puipuia i matou mai i fili i le ala, auā na matou faapea atu i le tupu: “O le aao lelei o lo matou Atua ua i luga o ē uma o loo saʻili atu iā te ia,+ a o lona malosi ma lona toʻasā o loo i ē uma ua tuua o ia.”+
23 Ona matou anapopogi lea ma talosaga atu i lo matou Atua e faatatau i lenei mea, ona faafofoga mai lea o ia i la matou ʻaiʻoi.+
24 Na ou vavaeese foʻi le toʻa 12 mai i ta‘ita‘i o le ʻauositaulaga, o Serepeia ma Hasapea,+ faapea ma o la uso e toʻasefulu.
25 Ona ou fuaina atu lea iā i latou o siliva, o auro, ma ipu, o mea nei na foaʻi mai mo le fale o lo matou Atua e le tupu, o ana faufautua, o ona perenise ma tagata uma o Isaraelu na iai i lea mea.+
26 Na ou fua atu i o latou lima o taleni* siliva e 650, o ipu siliva e 100 e tusa ma le 2 taleni, o taleni auro e 100,
27 o tamaʻi ipu auro faaofuofu e 20 e tusa ma le 1,000 tareki,* ma ipu e 2 o le ʻapamemea lelei e lanu mūmū iila, e tautele e pei o le auro.
28 Ona ou fai atu lea iā i latou: “E paia outou iā Ieova,+ e paia foʻi ipu, ma o siliva ma auro o foaʻi tauofo ia iā Ieova le Atua o o outou augātamā.
29 Ia outou leoleo ma le faaeteete ia mea, seʻia outou fuaina atu i luma o ta‘ita‘i o le ʻauositaulaga ma le ʻau sa Levī, ma perenise o aiga o tamā o Isaraelu, i potu* o le fale o Ieova i Ierusalema.”+
30 Ona ave lea e ositaulaga ma le ʻau sa Levī o siliva, o auro, ma ipu na fuaina atu iā i latou, ina ia avatu i Ierusalema i le fale o lo matou Atua.
31 Mulimuli ane, ona matou ō ese lea mai i le vaitafe o Aava+ i le aso lona 12 o le uluaʻi masina+ ina ia matou ō i Ierusalema, sa faatasi foʻi ma i matou le aao o lo matou Atua, ma ua ia laveaʻi i matou mai i lima o le fili, ma ʻau na lalafi i le ala.
32 Ona matou ō mai lea i Ierusalema+ ma nonofo ai i inā mo aso e tolu.
33 O le aso lona fā na matou fuaina ai siliva, o auro, ma ipu i le fale o lo matou Atua,+ ma tuu atu iā Meremota+ le atalii o Uria le ositaulaga, sa iā te ia foʻi o Eleasaro le atalii o Fineaso, ma sa faatasi fo‘i ma i laʻua le ʻau sa Levī o Ieosapa+ le atalii o Iesua, ma Noataia le atalii o Penui.+
34 Ua faitauina le aofaʻi ma fuaina le mamafa o mea uma, ua faamauina fo‘i le mamafa o mea uma.
35 O ē na toe fo‘i mai mai i le aveina faapagota, ua latou faia taulaga mū i le Atua o Isaraelu, e 12 povi poʻa+ mo Isaraelu uma, e 96 mamoe poʻa,+ e 77 tamaʻi mamoe poʻa, ma ʻoti poʻa e 12+ e fai ma taulaga o agasala; o mea uma ia o taulaga mū iā Ieova.+
36 Ona matou avatu lea o tulafono a le tupu+ i faipule a le tupu ma kovana i le vaipanoa i tala atu o le vaitafe,*+ ma ua latou lagolagoina le nuu ma le fale o le Atua moni.+
Faamatalaga Pito i Lalo
^ Po o “o le ʻau Netini.” Epe., “o i latou ua tuuina atu.”
^ Po o “le ʻau Netini.” Epe., “i latou ua tuuina atu.”
^ Po o “potu ʻai.”
^ O le vaipanoa i tala atu o le vaitafe, e faasino atu i laueleele i le itu i sisifo o le vaitafe o Eufirate.
